امەريكاندىق ستۋدەنت قىز ليززي فەنتون كارتەر ەسىمدى جىگىتكە ۇناۋ ماقساتىندا ءوزى تۋرالى Power Point-تا پرەزەنتاسيا جاساعان. الايدا سۇيىكتىسى مۇنداي ەڭبەكتى اسا باعالاي قويماعان. دەسە دە، قىزدىڭ يدەياسى مەن كرەاتيۆتىلىگى جىگىتكە ۇناماسا دا Microsoft كومپانياسىنىڭ كوڭىلىنەن شىققان.
بۇل تۋرالى قامشى اا The Independent-كە سىلتەمە جاساپ حابارلايدى.
«مەنىمەن نە ءۇشىن كەزدەسۋىڭ كەرەك» دەگەن سۇراققا جاۋاپ بەرگەن ءبىرىنشى سلايدىندا فەنتون بىلاي دەپ جازعان ەكەن:
«ەگەر سەنىڭ وتباسىڭ جاقسى قىز ىزدەپ تاپپايسىڭ با دەگەن سۇراقتارمەن سەنى مازالاسا، "مەن" سول پوزيسياعا ەڭ ۇزدىك كانديداتپىن».
«مەن تاماشا اڭگىمەلەسۋشىمىن. كەز-كەلگەن اداممەن تەز ءتىل تابىسىپ كەتە الامىن. سەنىڭ اتا-اناڭمەن دە جاقسى ءتىل تابىساتىنىما سەنىمدىمىن. مەنىڭ كيىنۋ ءستيلىم دە تاماشا. كەز-كەلگەن مەيرامدا سىمباتتى بولىپ جۇرەتىنىمە كۇماندانباساڭ بولادى »-دەيدى ليززي.
ليززي فەنتوننىڭ تاعى ءبىر ەرەكشەلىگى - ول سۇيىكتىسىنىڭ پوليگامياسىمەن دە (كوپ نەكەلىلىك) كۇرەسۋگە دايىن. ارينە تەك وزىندىك ەرەكشە ادىستەرمەن. مىسالى، "ءتۇرلى شاش ۇلگىلەرىن جاساپ ءۇش ءتۇرلى قىز كەيپىنە اۋىسا الامىن" دەيدى بويجەتكەن.
تۆيتتەر جەلىسىندەگى بۇل جازباسىن ليززي ناۋرىزدىڭ سوڭىندا جاريالاعان. وسى قىسقا ۋاقىت ارالىعىندا اتالعان جازباسى ارقاسىندا تانىمال بولىپ كەتكەن. قىزدىڭ سوزىنە قاراعاندا كارتەر وعان: «وتە تارتىمدى. بۇدان بىلاي مەنى مازالاماشى» دەپ جاۋاپ جازعان.
سۇيىكتىسى باعالاماسا دا Microsoft كومپانياسىنىڭ SMM-ماماندارى قىزدىڭ كرەاتيۆتىلىگىن باعالاعان. تۆيتتەر –اككاۋنتىن جۇرگىزەتىن قىزمەتكەر قىزعا بىلاي دەپ پىكىر قالدىرعان:
«سەن ءوزىڭ جايلى تاعى ءبىر ماڭىزدى نارسەنى ايتپاپسىڭ:
« Power Point-پەن پرەزەنتاسيانى كەرەمەت جاسايتىنىڭدى» دەپ جازادى تۆيتتەر جەلىسى.
