رەسەي جوعارعى سوتى «يەگوۆا كۋاگەرلەرى» ءدىني ۇيىمىن ەكسترەميستىك ۇيىم دەپ تانىپ، رەسەي تەرريتورياسىنداعى قىزمەتىنە تىيىم سالدى، دەپ حابارلايدى قامشى اقپاراتتىق اگەنتتىگى ازاتتىق راديوسىنا سىلتەمە جاساي وتىرىپ.

سوت شەشىمى رەسەي ادىلەت مينيسترلىگىنىڭ شاعىمى بويىنشا شىعارىلدى. رەسەيدە زاڭدى تۇردە تىركەلگەن ءدىني ۇيىمدى ەكسترەميستىك ۇيىم دەپ تانىعان وقيعا ءبىرىنشى رەت بولىپ وتىر.

سوت شەشىمى ەڭ الدىمەن «يەگوۆا كۋاگەرلەرىنىڭ» سانكت-پەتەربۋرگتەگى اكىمشىلىك ورتالىعىنا جانە ۇيىمنىڭ ەل اۋماعىنداعى قىزمەتىنە اسەر ەتەدى.

«يەگوۆا كۋاگەرلەرى» ءقازىر ۇيىمنىڭ 170 مىڭعا تارتا وكىلى بارىن ايتادى. رەسەيدە بۇل ۇيىمعا ونىڭ اسكەري قىزمەت، سايلاۋعا قاتىسۋ جانە جالپى مەملەكەتتىك بيلىككە قاتىستى وزگەشە ۇستانىمىنا بايلانىستى بۇرىننان كۇدىكپەن قارايتىن.

«يەگوۆا كۋاگەرلەرى» ورتالىعىنىڭ مالىمدەمەسىندە ورتالىق قىزمەتىنە تىيىم سالۋ ونىڭ جاقتاستارىن ءدىني سەنىمى ءۇشىن، ونىڭ ىشىندە ءىنجىلدى بىرگە وقىپ، بىرگە قۇلشىلىق قىلاتىنى ءۇشىن عانا قىلمىستىق قۋدالاۋعا ۇلاسۋى مۇمكىن دەيدى.

اقش مەملەكەتتىڭ دەپارتامەنتى 2016 جىلى ءدىن ۇستانۋ ەركىندىگى تۋرالى جىل سايىنعى ەسەبىندە رەسەيدە ءدىني ازشىلىقتى قۇرايتىن توپتارعا جۇيەلى تۇردە قىسىم كورسەتىلەتىنىن، ال باس پروكۋراتۋرا «يەگوۆا كۋاگەرلەرى» ءدىني ۇيىمىنىڭ بارلىق 406 جەرگىلىكتى ءدىني بىرلەستىگى مەن 2500-دەن استام قاۋىمىن ەكسترەميزمگە قاتىسى بار دەگەن ايىپپەن جابۋدى تالاپ ەتىپ جاتقانىن مالىمدەگەن.