ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆتىڭ ايتۋىنشا، ءدىني قىزمەت جانە ءدىني بىرلەستىكتەرگە ارنالعان زاڭناماعا وزگەرىستەر ەنگىزۋ جوسپارلانىپ وتىر، دەپ xابارلايدى قازاقپارات.

«قازىرگى كەزدە «قازاقستان رەسپۋبليكاسىنىڭ كەيبىر زاڭنامالىق اكتىلەرىنىڭ ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ازىرلەنىپ جاتىر. زاڭ جوباسىنىڭ نەگىزگى نورمالارى ىشىندە بالالاردى زاڭسىز ءدىني قىزمەتكە تارتقانى ءۇشىن جاۋاپكەرشىلىكتى كۇشەيتۋ ماسەلەسى بار.

سونىمەن بىرگە ءدىني ادەبيەتتى تاراتۋ جانە ءدىني ساراپتامانى وتكىزۋ تاجىريبەسىن جەتىلدىرۋ ۇسىنىلۋدا. شەتەلدە ءدىني ءبىلىم الۋ، ميسسيونەرلىك قىزمەتتى رەتتەۋ نورمالارى دا قاراستىرىلعان. بۇل باستامالاردىڭ بارلىعىن قوعامدىق ۇيىمداردىڭ وكىلدەرى مەن ساراپشىلار ۇسىندى. بۇگىنگى تاڭدا تالقىلاۋ شارالارى جالعاسۋدا. زاڭ جوباسىن جىلدىڭ اياعىنا دەيىن اياقتاۋدى جوسپارلاپ وتىرمىز»، - دەدى ەرمەكبايەۆ مينيسترلىكتىڭ بۇگىنگى القا ماجىلىسىندە.

ايتا كەتەيىك، ءماجىلىس كەزىندە مينيستر مەملەكەت پەن ءدىن اراسىنداعى بايلانىستىڭ جاڭا مودەلىن قالىپتاستىرۋ شارالارىنىڭ قولعا الىنعانىن جەتكىزدى. اتالعان مودەل ءدىن سالاسىنداعى مەملەكەتتىك ساياساتىنىڭ 2017-2020 جىلدارعا ارنالعان تۇجىرىمداماسىنا نەگىزدەلەدى.