«حابار» ارناسىندا ميحايل دوروفەيەۆ جۇرگىزەتىن «اشىق سۇحبات» باعدارلاماسىندا ق ر اقپارات جانە كوممۋنيكاسيا ءمينيسترى داۋرەن ابايەۆپەن سۇحبات بولدى. ءار اپتانىڭ وزەكتى ماسەلەلەرىن تالقىلايتىن باعدارلاماداعى سۇحبات بۇل جولى ەلدەگى سۋ تاسقىنى، ەكسپو كورمەسى قارسىڭىنداعى كەلەڭسىزدىكتەر، ريەۆالۆاسيا ماسەلەلەرى جايىندا ءوربىدى.
ەڭ ءبىرىنشى ماسەلەدە ەلىمىزدىڭ بىرنەشە ايماقتارىن سۋ باسىپ، سالدارىنان تۇرعىندار باسپاناسىز قالدى. بىرنەشە جىلداردان بەرى كۇتپەگەن سۋ تاسقىنى قاراپايىم حالىقتى ەسەڭگىرەتىپ تاستادى. بويلارىن ۇرەي بيلەگەن حالىقتىڭ قورقىنىشىن ەندى كىم سەيىلتپەك؟ شىعىندار وتەلە مە؟ كەلەسى جىلى سۋ تاسقىنىنىڭ قايتالانباسىنا كىم كەپىل؟ وسى ماسەلە تۋراسىندا داۋرەن ابايەۆ ءوز ويىمەن ءبولىستى.
«توتەنشە جاعدايلار كوميتەتىنىڭ بۇرىنعى باسشىسى ۆلاديمير بوجكو بىلاي دەگەن: «2004 جىلدىڭ وزىندە وسى جىلعى تاسقىننان قاراعاندا سۋ اعىنى 50 پايىزعا كەم بولعان». ءيا، بۇل جولعى سۋ تاسقىنى ۇلكەن شىعىن الىپ كەلدى. ادامدار بيلىكتى بۇل وقيعاعا بەيجاي قاراپ وتىر وتىر دەپ ويلايدى. بۇل پىكىردىڭ قاتە ەكەنىن ايتقىم كەلەدى. توتەنشە جاعداي قىزمەتكەرلەرى اۋىل دەمەي، قالا دەمەي، كۇنى-تۇنى، ساعات سايىن، مينۋت سايىن ادامدارعا كومەك كورسەتۋ ءۇشىن تالماي-تىنباي ەڭبەكتەنىپ ءجۇر. ميلليون كۋبومەتر سۋ تازالاندى، ۋاقىتشا بوگەتتەر قۇرىلدى، الايدا ادامداردى تولعاندىراتىن ماسەلە – وتەماقى. تۇرۋعا جارامسىز ۇيلەرىمىزدىڭ ورنىن قالاي كەلتىرەمىز دەيدى؟ ول جاعىنان دا بيلىك ارەكەتسىز ەمەس. الدىمەن سۋ باسقان جەردىڭ كولەمىن انىقتاۋىمىز قاجەت، سودان كەيىن ءبارىنىڭ شىعىنى وتەلەدى. مەملەكەت حالىقتى قاراۋسىز قالدىرمايدى»، دەدى ق ر اقپارات جانە كوممۋنيكاسيا ءمينيسترى.
ونىمەن قوسا، داۋرەن ابايەۆ زارداپ شەككەن تۇرعىندارعا كومەكتەسۋ ءۇشىن اپتالاپ ءۇي بەتىن كورمەي جۇرگەن ەرىكتىلەردى ەرەكشە اتاپ ءوتتى، ولارعا العىسىن ءبىلدىردى.
سونداي-اق، حالىقتىڭ كوكەيىندە جۇرگەن كەلەسى سۇراق – «ءبىزدى وسىنداي جاعدايعا دۋشار ەتكەن كىنالىلەر جازالانا ما؟». اقپارات تىزگىنشىسى بۇل سۇراقتى دا جاۋاپسىز قالدىرمادى. ونىڭ ايتۋىنشا، قانداي جاعداي بولماسىن ارنايى تەكسەرىستەر جۇرگىزىلەدى. وسى جولى اتباسار كەنتىنە قاتىستى تەرگەۋ جۇمىستارى جۇرگىزىلىپ جاتىر. سەبەبى، اۋىلعا بىلتىر عانا بەرىلگەن بوگەت شىداماي جارىلىپ كەتكەن.
كەلەسى كەزەكتە تالقىلانعان ماسەلە – استانا قالاسىندا وتەتىن «ەكسپو-2017» كورمەسى. كوكتەمنىڭ بەل ورتاسى بولدى، كورمەگە دايىندىق قىزۋ ءجۇرىپ جاتىر، الايدا حالىق اراسىندا كورمەگە قاتىستى كەلەڭسىز ماسەلەلەر بوي كوتەرىپ جاتىر. ماسەلەن، ەكسپو-عا بارۋ ءۇشىن مۇعالىمدەرگە، جۇمىسشىلارعا قيناپ بيلەت العىزىپ جاتقان كورىنەدى. بيلىك شىن مانىسىندە وسىنداي ارەكەتتەرگە بارىپ جاتىر ما دەپ ويلايسىڭ. بۇعان قاتىستى داۋرەن ابايەۆ بىلاي دەدى:
«ەشقانداي ماجبۇرلىك بولمايدى. مۇمكىن كەيبىر جەرلەردە بار بولۋى مۇمكىن، الايدا ماجبۇرلەپ بيلەت ساتقاندار جازاسىز قالمايدى».
بۇدان بولەك داۋرەن ابايەۆ ەكسپو-عا كەلۋشىلەردىڭ سانى كوپ بولاتىنىنا سەنىمدى. ونىڭ ويىنشا، كورمەگە دەگەن قىزىعۋشىلىق حالىق اراسىندا كۇن ساناپ ارتىپ كەلەدى. جاقىن ارادا كورمەنىڭ باعدارلاماسى دايىن بولادى، ول باعدارلامانىڭ تەزىرەك شىعۋىن، ءتىپتى شەتەلدىكتەردىڭ ءوزى اسىعا كۇتىپ جۇرگەن كورىنەدى.
ەكسپو كورمەسىنىڭ بيلەت قۇنى دا ەسكەرۋسىز قالمادى. قاراپايىم حالىقتىڭ قالتاسى كوتەرە بەرمەيتىندەي قىمبات ەكەنىن دە ايتا كەتكەن ءجون. دەي تۇرعانمەن، داۋرەن اسكەربەك ۇلى كورمەگە قاتىسۋدىڭ بىرنەشە جولدارىمەن ءبولىستى: 6 جاسقا دەيىنگى بالالار، مۇگەدەكتەر، سوعىس ارداگەرلەرى ت.ب. تەگىن كىرەدى، سونداي-اق دەمەۋشىلەر تاراپىنان دا جەڭىلدىكتەر بار، ماسەلەن مەكتەپ وقۋشىلارى ءۇشىن بيلەت ءقۇنى 50% جەڭىلدىكپەن ساتىلادى.