باۋىرجان وسپانوۆ: تابىسى جوعارى سالالار – اۋىل شارۋاشىلىعى مەن IT سالاسى (ۆيدەو)

    Nurgali Nurtay
    باۋىرجان وسپانوۆ: تابىسى جوعارى سالالار – اۋىل شارۋاشىلىعى مەن IT سالاسى (ۆيدەو)

    مەسەنات باۋىرجان وسپانوۆ قانداي سالالاردان جاقسى تابىس تابۋعا بولاتىنىن ايتتى دەپ حابارلايدى قامشى اقپارات اگەنتتىگى. باۋىرجان كەڭەسبەك ۇلى بيزنەس جاڭالىقتارىن تاراتاتىن Atameken Business Channel" ارناسىنا بەرگەن ەكسكليۋزيۆتى سۇحباتىندا تابىستى سالالار تۋرالى ايتقان.

    ءتىلشىنىڭ «تابىستى سالالار» تۋرالى سۇراعىنا وسپانوۆ: «ارينە ءار سالانىڭ ءوزىنىڭ پايداسى بار. ەگەردە اۋىل شارۋاشىلىعىن جاقسى جولعا قويىپ جۇمىس ىستەيتىن بولسا ەڭ كوپ تابىستى سول جەردەن تابۋعا بولادى. نە بولماسا IT باعىتتاردا ىستەيتىندەردە تابىستار جاقسى بولادى. ەلەكتر ەنەرگەتيكا دا بولادى. ول ماماندارعا بايلانىستى»، - دەپ جاۋاپ بەردى.

    ول «قازاقستاننىڭ بيزنەسىن دامىتۋ ءۇشىن نە ىستەۋ كەرەكتىگى؟» تۋراسىندا «ارينە، ءبىز دامىپ كەتكەن مەملەكەتتەرمەن ءوزىمىزدى سالىستىرا المايمىز. كوپ زاڭدار، جەڭىلدىكتەر كەرەك. قۇر جەڭىلدىك ەمەس قالاq ىسكە اسىرۋدىڭ مەحانيزمدارى كەرەك. ونىڭ ءبارى ۋاقىتىندا ىستەلۋى كەرەك. بەكىتىلگەن مەملەكەتتىك باعدارلامالار، سۋبسيديا بەرۋ ماسەلەسى تۇسىنىكتى بولۋى كەرەك. الدىن الا بەلگىلى بولۋى قاجەت. اۋىل شارۋاشىلىعى ما، مال ونىمدەرى مە، استىق وسىرەتىن بە سۋبسيديالار وسىنشا جىلعا دەپ ايتىلۋى ءتيىس، سوعان بايلانىستى ىستەۋ كەرەك. ءبىر جوباعا بىرنەشە وندىرىستەر اشىلادى. سول سالاعا بايلانىستى. مىسالعا ايتايىق، ەڭ ۇلكەن ماسەلە بىزدە عوي. حالقىمىزدىڭ جارتىسى اۋىلدى جەردە تۇرادى. سوعان شىعارعان باعدارلامالار مال ونىمدەرىنە مە، ءسۇت ونىمدەرى مە، نە بولماسا استىقتارعا سۋبسيديا قانشا جىلعا بەرىلگەنى بەلگىلى بولۋى كەرەك. سول كەزدە سوعان كەرەك زاتتاردى شىعاراتىن زاۋىتتار قويۋعا، كەرەك تەحنيكانى اكەلۋگە بولادى. سول ارقىلى جۇمىس ىستەۋگە بولادى. ءقازىر ۇكىمەت ۇلكەن قاراجاتتار بولگەنىمەن ونىڭ ءبارى شەتەلگە كەتىپ قالادى. ويتكەنى كەرەكتى تەحنيكا، تەحنولوگيا ءبارىن شەتەلدەن اكەلەسىز. اقشانىڭ ءبارى سىرتقا كەتىپ، مۇندا تەك ەڭبەك ەتۋ قالادى. مەن بۇل دۇرىس ەمەس دەپ ويلايمىن. باسەكەگە تۇرا الامىز دەسەك، الەمدەگى كونكۋرەنتتەرگە قاراۋ كەرەك. ءبىز باسەكەگە تۇرا الاتىنداي سۋبسيديا بەرە الاتىن بولساق وندا ونى باستاۋعا بولادى»، - دەيدى.

    ايتا كەتسەك، بەلگىلى قازاق كاسىپكەرى، مەسەنات. "ZHERSU" ينۆەستيسيالىق-وندىرىستىك كورپوراسياسىنىڭ باقىلاۋ كەڭەسىنىڭ ءتوراعاسى، قازاقستان بوكس جانە كۇرەس فەدەراسيالارىنىڭ ۆيسە-پرەزيدەنتى. Forbes Kazakhstan جۋرنالى باۋىرجان وسپانوۆتى 2014 جىلعى قازاقستاننىڭ 50 باي ادامى تىزىمىنە كىرگىزدى. ول تىزىمدە 320 ميلليون دوللارمەن 32 ورىنعا ورنالاستى.

    قاتىستى ماقالالار