قامشى اقپاراتتىق اگەنتتىگىڭ پوشتاسىنا MediaNet حالىقارالىق جۋرناليستيكا ورتالىعىنان لاتىن الىپبيىنە بايلانىستى الەۋمەتتىك ساۋالناما قورىتىندىسى جايلى ماتەريال كەلىپ ءتۇستى. وقىرمان نازارىنا ۇسىنامىز. الايدا، قازاق حالقى قاعىلەز حالىق ەكەندىگىن ەسكەرە وتىرىپ، لاتىن قارپىنە كوشۋ اسا قيىندىق تۋدىرمايتىنىن، تۋدىرعان كۇننىڭ وزىندە مۇنىڭ ءبارى بولاشاقتىڭ، ۇلتتىڭ قامى ءۇشىن جاسالىپ جاتقان جۇمىس ەكەندىگىن ەرەكشە اتاپ وتكىمىز كەلەدى.
DEMOSCOPE قوعامدىق پىكىرگە جەدەل-مونيتورينگ جۇرگىزۋ بيۋروسى قازاقستان ازاماتتارى اراسىندا «قازاق ءالىپبيىن لاتىنعا كوشىرۋ» تاقىرىبىندا ساۋالناما جۇرگىزدى.
ساۋالناماعا استانا، الماتى قالالارى مەن 14 وبلىس ورتالىعىنان 18 جاستان اسقان 1829 ادام قاتىستى. ايەلدەر – 71%، ەر ازاماتتار – 29%. ىرىكتەۋ ىقتيمالدىعى 90%، سوندىقتان ستاتيستيكالىق كورسەتكىش قاتەلىگىنىڭ شەكتى مولشەرى 1،33%-دان اسپايدى.
ساۋالناما ءادىسى – تەلەفون ارقىلى جۇرگىزىلگەن سۇحبات جانە ونلاين-ساۋالناما. زەرتتەۋ 2017 جىلى 17-21 ءساۋىر ارالىعىندا جۇرگىزىلدى.
DEMOSCOPE قوعامدىق پىكىرگە جەدەل-مونيتورينگ جۇرگىزۋ بيۋروسىنىڭ كەزەكتى ساۋالناما قورىتىندىسىنا سايكەس، قازاقستاندىقتاردىڭ 52%-ى قازاق تىلىندە سويلەي الادى، 44%-ى لاتىن الىپبيىمەن تانىس ەمەس. لاتىن ءالىپبيىن مەڭگەرمەگەندەردىڭ كوپشىلىگى (46%) – 40 جاستا نەمەسە 40-تان اسقاندار. جاستار اراسىندا بۇل كورسەتكىش ازىراق. ولاردىڭ 24%-ى لاتىن ءالىپبيىن بىلمەيدى، 43%-ى تۇسىنەدى، ءبىراق لاتىن الىپبيىنە نەگىزدەلگەن بىردە-بىر شەت ءتىلىن مەڭگەرمەگەن. ەلباسى قازاق ءتىلىن لاتىن الىپبيىنە كوشىرۋ باستاماسىن كوتەرگەندە، بالالارىمىز مەكتەپ قابىرعاسىندا اعىلشىن ءتىلىن وقىپ، لاتىن ارىپتەرىن ونسىز دا ۇيرەنەدى. سوندىقتان، جاس بۋىن ءۇشىن ەشقانداي قيىندىقتار بولماۋ كەرەكتىگىن جانە جاس بۋىن وكىلدەرىنىڭ جاڭا الفاۆيتكە تەز كوشە الاتىنىن ايتقان ەدى. ال جاس بۋىن وكىلدەرىنىڭ ءوزى لاتىن الىپبيىنە كوشۋ تۋرالى نە ويلايدى؟
حالىقتىڭ جارتىسى (54%) مۇنداي وزگەرىستەر ەنگىزۋدىڭ قاجەتى جوق دەيدى. بۇل جاۋاپتى تاڭداعانداردىڭ 60%-ى – 18-29 ارالىعىنداعى جاستار. لاتىن الىپبيىنە كوشۋدىڭ ماڭىزىن تۇسىنگەن، ءبىراق ءدال قازىرگى داعدارىس ۋاقىتىندا بۇل وتە كوپ شىعىن قاجەت ەتەدى دەگەندەر – 30%. «بۇل – وزەكتى ماسەلە، قازاق ءالىپبيىن لاتىنعا كوشىرۋ كەرەك» دەپ ءبىراۋىزدان قولداۋ بىلدىرگەن قازاقستاندىقتاردىڭ باسىم بولىگى – ەرەسەكتەر. 50-59 جاس ارالىعىنداعى رەسپوندەنتتەردىڭ 21%-ى 70 جانە ودان ۇلكەن جاستاعى قاتىسۋشىلاردىڭ 30%-ى بۇل پىكىرمەن كەلىسەدى.
