27 ءساۋىر كۇنى قازاق مەملەكەتتىك قىزدار پەداگوگيكالىق ۋنيۆەرسيتەتىندە جوو-عا دەيىنگى ءبىلىم بەرۋ مەن مانساپ ءبولىمىنىڭ ۇيىمداستىرۋمەن بيىلعى جىلدىڭ ءبىتىرۋشى تۇلەكتەرىنە ارنالعان «بوس ورىندار جارمەڭكەسى» بولىپ ءوتتى دەپ حابارلايدى قامشى اقپاراتتىق اگەنتتىگى «قىزدار ۋنيۆەرسيتەتى» مەديا ورتالىعىنا سىلتەمە جاساي وتىرىپ.
شاراعا ۋنيۆەرسيتەتتىڭ 6 فاكۋلتەتىنەن 300-گە جۋىق تۇلەك قاتىستى. جارمەڭكەگە الماتى وبلىسىنان جانە الماتى قالاسى اۋداندىق ءبىلىم بەرۋ مەكەمەلەرىنەن 80-نەن استام مەملەكەتتىك ۇيىمدار قاتىستى. ءبىتىرۋشى تۇلەكتەر جۇمىس بەرۋشىلەرمەن كەزدەسىپ ءوز تۇيىندەمەلەرىن بەرىپ، قاجەتتى اقپاراتتار الا الدى. جارمەڭكەدە ءبىراز جاس ساۋالناما تولتىرىپ، كەلىسىمشارتتارعا قول قويسا، تاعى ءبىرازى ىقپالداستىققا قول جەتكىزدى. جارمەڭكەدە جالپى 100-دەن استام بوس ورىن ۇسىنىلدى. كوپشىلىگى، ءار ءتۇرلى ءپان مۇعالىمدەرى مەن مەكتەپكە دەيىنگى مەكەمەلەردىڭ تاربيەشى قىزمەتتەرى. جارمەڭكەگە قاتىسقان ءبىلىم مەكەمەلەرى ۋنيۆەرسيتەتىمىزدە وقىتىلاتىن بارلىق پەداگوگيكالىق ماماندىقتارعا سۇرانىس جوعارى ەكەنىن ايتتى.
شارا اياسىندا اتىراۋ وبلىسىنان كەلگەن جەكە مەنشىك «LETS» ءبىلىم بەرۋ ورتالىعىنىڭ وكىلدەرى ستۋدەنتتەرگە شەبەرلىك سىنىبىن وتكىزدى.
جارمەڭكەدەن كەيىن جۇمىس بەرۋشى وكىلدەرمەن قىزدار ۋنيۆەرسيتەتىنىڭ وقۋ ءىسى جونىندەگى پرورەكتورى ادىلەت تويبايەۆ كەزدەسۋ وتكىزدى. كەزدەسۋ بارىسىندا ءبىتىرۋشى تۇلەكتەردى جۇمىسقا ورنالاستىرۋ بويىنشا ءبىرقاتار ۇسىنىستار ايتىلىپ، تالقىلاندى. كەزدەسۋگە قاتىسقان جۇمىس بەرۋشى مەكەمە وكىلدەرى باسقا وقۋ ورىندارىمەن سالىستىرعاندا قىزدار ۋنيۆەرسيتەتى ستۋدەنتتەرىنىڭ بۇل جارمەڭكەگە دەگەن قىزىعۋشىلىقتارى وتە جوعارى ەكەنىندىگىن اتاپ ءوتتى. شارا سوڭىندا ءا.تويبايەۆ بولاشاق جاس مامانداردى جۇمىسپەن قامتۋ ماسەلەسىنە ايرىقشا ءمان بەرىپ، ىقپالداستىققا ۇنەمى مۇددەلىلىك تانىتىپ جۇرگەن ۇيىمدار مەن مەكەمە باسشىلارىنا ريزاشىلىعىن ءبىلدىردى.
«كوپ جاعدايدا قولدارىنا ديپلومدارىن ەندى عانا العان ءبىتىرۋشى تۇلەكتەر ءۇشىن جۇمىسقا ورنالاسۋ قيىن بوپ جاتادى. بۇگىنگى شارانى ۇيىمداستىرۋداعى باستى ماقساتىمىز سول جاس ماماندارعا جۇمىسقا تۇرۋعا جاردەمدەسۋ. جىل سايىن وسى شارالاردىڭ ارقاسىندا كوپتەگەن ستۋدەنتتەرىمىز جۇمىسقا ورنالاسىپ كەتتى. ماسەلەن، وتكەن جىلى بىتىرگەن 1 800-دەن استام ستۋدەنتتىڭ 1500ء-ى جۇمىسقا ورنالاستى. سوندىقتان بۇل جارمەڭكەنىڭ جاستارعا بەرەرى مول»، دەيدى جوو دەيىنگى ءبىلىم بەرۋ مەن مانساپ ءبولىمىنىڭ باسشىسى قاليماش ەلشىبايەۆا.
