توقتار جاقاش مىرزا ءوزىنىڭ فەيسبۋكتەگى پاراقشاسىندا قازاقستاننىڭ بۇگىنگى ساياسي جاعدايى تۋراسىندا كەيبىر شەتىن ماسەلەلەرگە توقتالىپتى. وقىرمانعا وي سالار دەگەن نيەتپەن نازارلارىڭىزعا ۇسىنىپ وتىرمىز. 

الماتىداعى فۋتبول فاناتتارىنىڭ ءىسى ءبىراز ويعا جەتەلەيدى. انىعىندا - بۇدان بىرنەشە جىل بۇرىن الماتىدا وتكەن ەكى وقيعانى ەسكە سالىپ وتىر. ول جايلى ءسال كەيىنىرەك. ال قازىرگى "كىشى ءجۇز!" دەپ ۇران كوتەرۋشىلەردىڭ ارتىندا كىم تۇر؟ ءار بولمە ىشىنە كىرگەن شىبىننىڭ قايدان كەلگەنىن مۇقيات تىركەپ وتىرعان ۇقك مۇنى قالاي "بايقاماي" قالعان؟ جاۋابى جوق سۇراقتار وتە كوپ. ال مەنىڭشە، بيلىككە مۇراگەر تاڭداۋ كەزىندە مۇنداي ارانداتۋلار ادەيى جاسالادى. الدەكىمنىڭ ساسىق ساياسي تەحنولوگياسى. مۇنى ۇيىمداستىرۋشىلار شىن مانىندە كىشى ءجۇز وكىلىنىڭ ءبىرىن بيلىككە جىبەرمەۋدى كوزدەگەن. پرەزيدەنتتىڭ مۇراگەرىنە بىرنەشە ادامنىڭ كانديدات ەكەنى بەلگىلى. ءبىراق بيلىكتىڭ ناقتى كىمگە بۇيىراتىنى تۋرالى دۋالى اۋىزدار دا ءدوپ باسىپ ايتا المايدى. ازىرگە "ۇزىنقۇلاقتان" ەستۋىمىزشە دامەلىلەردىڭ قاتارىندا قازاق بولىپ جازىلعان ۇيعىر، رۋى قوجا جانە پرەزيدەنتتىڭ ءوز تۋىستارى عانا بار. ولار "ح" ساعاتى تۋعانشا الدىنا كەسە-كولدەنەڭ تۇرۋى مۇمكىن تۇلعالاردى "تازالاپ" ءوتۋى ءتيىس. دجۋنگلي زاڭى سونداي. ياعني، بۇل تايتالاستا جوعارى ۇپاي جيناۋى مۇمكىن كىشى ءجۇزدىڭ ساياساتكەرىن "سۇلاتۋعا" باعىتتالعان. ال شىن مانىندە سول كىشى ءجۇزدىڭ وكىلىنە مۇنداي ترايباليستىك ءدۇمپۋ نە بەرەدى؟ تۇك تە بەرمەيدى. ول سول ساتتە-اق "ساياسي ولىككە" اينالادى. مۇنى جوعارى دەڭگەيدەگى ساياساتكەر تۇرماق، ورتا دەڭگەيدەگى ءاربىر ادام جاقسى تۇسىنەدى. ءدال وسىنداي ارانداتۋ 2006 جىلدىڭ كوكتەمىندە، "شاڭىراق" وقيعاسىندا كورىنىس تاپتى. بۇل وقيعانى ۇيىمداستىرعان راحات الييەۆ بولاتىن. رەيتينگتىك جانە ساياسي زەرتتەۋمەن اينالىساتىن ورتالىقتارى كوپ "كۇيەۋ بالا" سول كەزدەگى قالا اكىمى ي.تاسماعامبەتوۆتىڭ حالىق اراسىنداعى رەيتينگىنە قاتتى "مازاسىزداندى". قايتكەن كۇندە قالا اكىمىنىڭ بەدەلىن بەس تيىن ەتۋگە بارىن سالدى. ارام پيعىلدى ىسكە اسىرۋ ول ءۇشىن تۇك تە ەمەس ەدى. ونىڭ ۇستىنە، ول "ويىنعا" سول كەزدەگى پرەزيدەنتتىڭ سەنىمدى ادامدارىنىڭ ءبىرى اسلان مۋسين دە كىرىسكەن. ەلدەگى ەڭ بەدەلدى وپپوزيسيالىق باسىلىم "سۆوبودا سلوۆا" ارقىلى الدەبىر بەينەتاسپا جايلى ماقالا باستى. ول ماقالاعا سەنەر بولساق - ي.تاسماعامبەتوۆ اتىراۋ وبلىسىنا ۇشاقپەن ۇشىپ كەلىپ، اقساقالداردى جيناپ، كەلەسى پرەزيدەنت ءوزى بولاتىنى جايلى ايتىپتى-مىس. ەشقانداي لوگيكاعا سىيمايتىن اڭگىمە. ءبىراق كەيىننەن، "رەسپۋبليكا" گازەتى تاپسىرىسپەن جازىلعان الگى ماقالا ءۇشىن گۇلجان ەرعالييەۆانىڭ اسلان مۋسيننەن جۇزدەگەن مىڭ دوللار "قالاماقى" العانى جايلى ماقالا باستى. اق-قاراسىن ءبىر قۇداي بىلەدى. ءبىراق ءمۋسيننىڭ باسپا ءسوز بەتىنە تاپسىرىسپەن ماتەريالدار بەرەتىنىن جانە ول ءۇشىن اياماي اقشا تولەيتىنىن جانە ول اقشانىڭ قانداي كوزدەردەن قالاي بولىنەتىنىن ءتىلشى قاۋىمى ءبىرشاما بىلەدى. "قۇلاننىڭ قاسۋىنا مىلتىقتىڭ باسۋى" ءدوپ كەلىپ، راحات الييەۆ سول كەزدەگى ءىىم ءمينيسترى، ءوزىنىڭ جاقىن دوسى، كەيبىر باسىلىمدار "سىبايلاسى" دەپ اتايتىن باۋىرجان مۇحامەدجانوۆتى "ىسكە قوستى". ءسويتىپ، اياق استىنان "شاڭىراققا" پوليسيا كىرىپ، ۇيلەردى سۇرە باستادى. سەنىمدى كوزدەردىڭ ايتۋىنشا، قالا اكىمى ي.تاسماعامبەتوۆ - ب.مۇحامەدجانوۆ پەن ر.الييەۆتىڭ ايارلىقپەن ۇيىمداستىرعان لاس ىسىنە بارىنشا قارسى تۇرعان. قاتتى بوقتاپ، جاعا ۇستاسقان دەسەدى. انالار قويار بولماعاسىن، پرەزيدەنتكە تىكەلەي حابارلاعان. ءبىراق ول كەزدە وقيعا شيەلەنىسىپ كەتىپتى. ونىڭ سوڭى قان توگىسكە ۇلاستى. راحات الييەۆكە دە كەرەگى وسى ەدى. ءورىستىلدى وپپوزيسيالىق جانە وپپوزيسيالىق ەمەس باسىلىمدار (راحات الييەۆتىڭ ولارعا دا تاپسىرىس بەرگەنىن جوققا شىعارۋعا بولماس) دەرەۋ قالا اكىمىن "بارىنە كىنالى" ەتىپ، بالاعاتتاعان، بىلاپىتتاعان كامپانيانى باستاپ كەتتى. سونىڭ سالدارىنان ي.تاسماعامبەتوۆتى "شاڭىراق" وقيعاسىنا كىنالى دەۋشى قازاقتار دا كوبەيگەن. الماتىداعى مىنا وقيعا تاعى دا سول كەزدەردى ەسكە ءتۇسىرىپ وتىر. شىندىعىنا كەلگەندە ءبىز ترايباليست ەمەسپىز. جاستارىمىز دا رۋشىل ەمەس. ميىڭىزدى ازداپ قوسىپ كورىڭىزشى: قازاقتىڭ جۇز-جۇزگە، رۋ-رۋعا ءبولىنىپ، السىرەگەنى كىم ءۇشىن پايدالى؟ بۇل تەك - قازاقتى جۇز-جۇزىمەن، رۋ-رۋىمەن قوساقتاپ، بيلىك ءۇشىن قۇرباندىققا شالماق بولعان ۇلكەن كابينەتتەردەگى ءدال وسى كىشى جۇزگە قاتىسى جوق نۇربانۋ سياقتىلاردىڭ ارەكەتى عانا! مەن وسىلاي ويلايمىن.

توقتار جاقاش