وزىندىك بىتىم-بولمىسىمەن تىڭدارمەن جۇرەگىنە جول تارتىپ، ءان سۇيەر جۇرتتىڭ جادىندا جاتتالىپ قالاتىن اۋەندەر كوپ ەمەس. وسىنداي اندەردىڭ ءبىرى قىتايداعى قانداستارىمىزدىڭ قىز-بوزبالاسى تۇگەل جاتقا بىلەتىن «قايران قارا بۇرىمدىم» ءانى.

«قايران قارا بۇرىمدىم»  - كونسەرۆاتوريانىڭ ەسىگىن اشپاعان، ءتىپتى نوتا تانىمايتىن، ءۇرىمجى وڭتۇستىگىندەگى تاۋ باۋرايىندا قوي باعىپ ءجۇرىپ-اق شىعارا سالعان قازاق بالاسىنىڭ ءانى.

ءان اۆتورى - ءوز ورتاسىندا تانىمال اقىن ارداق وشان ۇلى. اتالمىش ءاندى جۇرەگى سۇيگەن ارۋعا ارناپ شىعارعان. اۆتور بۇل ءاندى بالا ماحابباتتىڭ، سۇيگەن، سۇيدىرگەن قىزداردىڭ ماعان جانە حالىققا سىيلاعان ساۋعاسى دەپ ەسەپتەيدى. ءان - لاپ ەتىپ جانىپ، جىراققا الىستاي بەرگەن ماحاببات كەيىپكەرىنە دەگەن جۇرەكتىڭ  كىرشىكسىز سىرى.

اتالمىش انگە بايلانىستى ارداق وشان ۇلى: ««ماحاببات قىزىق مول جىلدارىمنىڭ» قايعى مەن قۋانىشى، كۇلكىسى مەن كۇرسىنىسى، ساعىنىشى مەن ارمانى سىندى ءان - جۇرەگىمدى تىنىمسىز تۋلاتىپ، سانا سەزىمىمدى سان تەربەلىسكە سالىپ، جاستىعىمنىڭ جىعىلماس جالاۋىنداي بولدى»، - دەيدى. – «ءان جازىلدى، ايتىلدى، ەش جارناماسىز تارالىپ كەتتى. كوز تانىس قىزدار: «ءان ماعان ارنالعان» دەپ ءوزارا «تالاسىپ» جۇرگەنىن دە ەستىدىم. ونەردى سۇيگەن حالىققا، سول قىزدارعا ۇلكەن العىس بىلدىرەمىن، ماحابباتىم دا باياعىداي»، - دەيدى ءان اۆتورى. ونەرسۇيەر قاۋىمنىڭ نازارىنا «قايران قارا بۇرىمدىم» ءانىن ۇسىنامىز.

 (ورىنداعان: جانات نۇرسۇلتان)

اڭساپ الىستان،

     العاش تانىسقان،

     قوس قايىڭنىڭ تۇبىندە.

جانىم ەلجىرەپ،

     جاسىم مولدىرەپ

    تۇرمىن كۇتىپ بۇل كۇندە.

جىراقتادىڭ سەن،

     جىلاپ قالدىم مەن،

     ءمولدىر جاسپەن جۋىندىم.

مەنى العاش سۇيگەن،

     وتىما كۇيگەن،

     قايران قارا بۇرىمدىم.

ەسىمدە ءسوزىڭ،

    جالىندى ءجۇزىڭ،

    وتسە داعى جىل اۋناپ.

كەتىپ ەڭ سوندا،

    جاۋلىعىڭ قولدا،

    بۇرىمدارىڭ بۇلاڭداپ.

ەستىلسە ءانىم،

     ەسىڭە ال جانىم،

     سىرىن ۇقشى مۇڭىمنىڭ.

ۇمىتپا مەنى،

    جۇرەكتىڭ ەمى،

    قايران قارا بۇرىمدىم.

ايىرىلىپ كەتتىم دەپ،

    تاعدىرعا وكپەلەپ،

    مەنى ويلاۋمەن ءجۇرسىڭ بە.

بىرگە وتەم دەپ،

    سەنى جەتەلەپ،

    ءجۇرۋشى ەدىم تۇسىمدە.

قوسىلماي كەتكەن،

    جىلاۋمەن وتكەن،

   ارماندىنىڭ ءبىرىمىن.

قونباعان باعىم،

    اتپاعان تاڭىم،

    قايران قارا بۇرىمدىم.

دايىنداعان: ەرلان تولەۋباي.