شىعىس قازاقستان وبلىسى، زىريان اۋدانىندا ەكى جاس وز-وزدەرىن ولتىرمەكشى بولعان، دەپ حابارلايدى قامشى اقپاراتتىق اگەنتتىگى وسكەمەن جاڭالىقتارىنا سىلتەمە جاساپ.

وقيعا 9 مامىر كۇنى كەشكى ساعات 8-دەر شاماسىندا ورىن العان.

“كەشكى ساعات 8-دەردىڭ كەزىندە كەزەكشى ءبولىم تۋبديسپانسەردىڭ ارتىندا ورنالاسقان تاۋداعى جوعارعى ۆولتتى كوپىرگە شىعىپ تۇرعانى جايلى حابارلادى. وقيعا ورىنىنا جەتىپ 21 جاستاعى جىگىت پەن 16 جاستاعى قىزدى ۇستادىق”، – دەيدى پوليسيا.

ءتارتىپ ساقشىلارىنىڭ مالىمەتىنشە، جاستار وسىنداي جولمەن ءوز قارسىلىقتارىن بىلدىرمەكشى بولىپتى.

“ايتۋلارىنشا ولار ءبىر-بىرىن سۇيەدى جانە بىرگە تۇرعىلارى كەلەدى. ال قىزدىڭ ءالى وقۋشى ەكەندىگىنە بايلانىستى، اتا-اناسى بۇلارعا قارسى ەكەن”، – دەپ ءتۇسىندىردى قۇقىق قورعاۋشىلار.

وقيعا ورىنىنا پوليسيا قىزمەتكەرلەرىمەن بىرگە اۋدان اكىمى نۇرجان توقسەيىتوۆ تە جەتكەن. بيلىك وكىلدەرى قۇتقارۋ وپەراسياسى اياقتالامىن دەگەنشە ەلەكتر ەنەرگياسىن اجىراتا تۇرۋ تۋرالى شەشىم قابىلداعان.

“جاستاردى قۇتقارۋ ءۇشىن بۇل ءماجبۇرلى قادام بولدى. ويتكەنى ولار تىم بيىككە كوتەرىلىپ كەتكەن. مەكتەپ پسيحولوگى زۋلفيا نۇرسكەنوۆامەن بىرگە 40 مينۋتتاي ولارمەن كەلىسسوز جۇرگىزدىك”، – دەدى پوليسيا.

باقىتقا قاراي، ولاردى تومەنگە ءتۇسىرىپ الۋ مۇمكىن بولعان. ەكەۋى دە وقيعا بارىسىندا زارداپ شەكپەگەن. پوليسيا مالىمەتىنشە قازىرگى تاڭدا تەرگەۋ شارالارى جۇرگىزىلىپ جاتىر.

دايىنداعان: ايگەرىم تاۋباي