سولتۇستىك كورەيا تۋرالى اڭگىمە قوزعار بولساق ەڭ الدىمەن ونىڭ ۇستانعان ساياساتى، اسكەري كۇشى، سىرتقى ساياساتى مەن ماشينا جاساۋ سالاسى ەسكە تۇسەدى. وسىنداي جاعدايدان كەيىن ول ەلدىڭ كوركەمونەرمەن اۋىلى الىس دەپ ويلايتىنىمىز راس. الايدا ول ەلدە اسا ۇلكەن شىعارماشىلىق توپ جۇمىس جاسايدى. ول «مانسۋدا شىعارماشىلىق ۇيىمى» دەپ اتالادى (Mansudae Art Studio). اتالمىش ۇيىم 1959 جىلى قۇرىلعان. الەمدەگى ۇلكەن كوركەمسۋرەت شىعارماشىلىق بازاسىنىڭ ءبىرى. قازىرگى كەزدە 4000 نان استام مۇشەسى بار. سولتۇستىك كورەانىڭ ەڭبەكشىلەر  پارتياسىنا باعىنىشتى.  ءبىر كەزدەرى كيم چەن ءيردىڭ تىكەلەي باسشىلىعىندا بولعان. 

سولتۇستىك كورەيانىڭ سوسياليزم جولىنداعى جەڭىستەرى مەن جەتىستىكتەرىن  ءناسيحاتتايتىن تۋىندىلار جاراتۋ بۇل ۇيىمنىڭ العاش  قۇرىلۋىنى سەبەپ بولعان. ول ەلدىڭ باسشىسىنا قاتىستى ءارتۇرلى تۋىندىلار تەك وسى ۇيىمنىڭ سۋرەتشىلەرىنىڭ قولىمەن عانا جاسالادى. سولتۇستىك كورەانىڭ بۇرىنعى باسشىلارىنىڭ بارلىعى ۇنەمى وسى ۇيىمعا كەلىپ تۇرعان.

بۇل ەلدەگى ايگىلى چولليما مىس ءمۇسىنى، جەڭىس قاقپاسى،  تۇتاستىق اركاسى جانە مانسۋدا الاڭىنداعى بيىكتىگى 20 مەتر بولاتىن كيم ير سەن مەن ونىڭ ۇلى كيم چەن ءيردىڭ مىس ءمۇسىنى مەن پحەنيان قالاسىنداعى باسقا دا ماڭىزدى ەسكەرتكىشتەر وسى ۇيىمداعى سۋرەتشى، مۇسىنشىلدەردىڭ قولىمەن جاسالعان.

سولتۇستىك كورەياداعى ەڭ مىقتى سۋرەتشىلەردىڭ دەنى وسى ۇيىمعا جيناستىرىلعان. ول جەردە جۇمىس جاساۋ ولار ءۇشىن وتە ابرويلى ءىس. الايدا ول جەردە جۇمىس ىستەۋ ءۇشىن كەم دەگەندە تومەندەگى ءۇش ءتۇرلى شارت ورىندالۋى قاجەت.

1. بىلىكتىلىگى

بەلگىلى ءبىر كوركەمدىك سالادا اسا جوعارى ءبىلىمى مەن تاجىريبەسى بولۋى شارت. سولتۇستىك كورەيادا ۋنيۆەرسيتەت وقۋى كەزىندە ءوزىن تالانتىمەن كورسەتە بىلگەن ستۋدەنتتەر بۇل ۇيىمعا جۇمىسقا شاقىرۋ الادى. سونىمەن قاتار ايگىلى سۋرەتشىلەر دە ۇيىمعا ارنايى شاقىرىلىپ جاتادى.

2. ديپلومى

مانسۋدا ۇيىمىنداعى مامانداردىڭ بارلىعى دەرلىك ۋنيۆەرسيتەت نەمەسە كاسىبي سۋرەت ينستيتۋتتارىنىڭ تۇلەگى. سولتۇستىك كورەادا سۋرەت ماماندىعى 8 جىل وقىتىلادى. ەرەكشە تالانتىمەن كوزگە تۇسكەندەرى رەسەيگە جالعاستى بىلىمدەرىن جەتىلدىرۋگە جىبەرىلەدى.

3.ساياسي كوزقاراسى

مانسۋدا ۇيىمىنىڭ ءاربىر قىزمەتكەرى مەملەكەتى مەن ونىڭ باسشىسىنا ادال بولۋى كەرەك. بۇل جەردەگى ونەر يەلەرى مەملەكەت جانە مەملەكەت باسشىسىنا قاتىستى جاساعان تۋىندىلارىنا قاراي «حالىق سۋرەتشىسى»، «1 دارەدەلى سۋرەتشى» جانە «ەڭبەك سىڭىرگەن سۋرەتشى» دەگەن اتاقتاردى يەلەنە الادى. دارەجەلەرىنە قاراي جالاقىلارى دا ءارتۇرلى بولادى. «حالىق سۋرەتشىسى» اتاعى ەڭ جوعارى اتاق بولىپ ونىڭ تۋىندىلارى دا ەڭ قىمباتقا باعالانادى.

الايدا سولتۇستىك كورەياداعى سۋرەتشىلەر مەملەكەت بەرگەن جالاقىعا عانا سۇيەنىپ ءومىر سۇرەدى. ءوز تۋىندىلارىن ساتۋعا تيىم سالىنعان. ساتىلىمعا تۇسكەن جاعدايدا دا قارجى ساتىپ الۋشى مەن مەملەكەتتىك قىزمەتكەردىڭ ارالاسۋىمەن ەسەپ ايىرىلىسىپ قارجى ۇيىم مەن مەملەكەت قازىناسىنا قۇيىلادى. مانسۋدا ۇيىمىنا ەلدەگى ەڭ مىقتى دەگەن سۋرەتشىلىر جينالعاندىقتان ولاردىڭ تۋىندىلارىنىڭ كوركەمدىك دەڭگەيى دە اسا جوعارى. شەتەلدىك كوللەكسيونەرلەردىڭ ايتۋىنشا ولاردىڭ تۋىندىسى ءوز دەڭگەيىمەن سالىستىرعاندا تىم تومەن باعامەن ساتىلادى ەكەن.  

بۇل ۇيىمداعى سۋرەتشىلەر باسقا دا كوركەمونەر سالاسىن زەرتتەيدى. مىسالى، سولتۇستىك كورەياعا ءتان ءتۇرلى-تۇستى ۇساق تاستاردان جاسالاتىن «اسىل تاستى سۋرەت» سول ونەرپازداردىڭ تاپقىرلىعى سانالادى.  ول اسەمدىگىمەن، ءتۇسىنىڭ اشىقتىعىمەن تانىمال. سولتۇستىك كورەانىڭ ونەرى رەتىندە شەتەل باسشىلارىنا سىيلىق رەتىندە بەرىلگەن جانە حالىقارالىق  كورمەلەرگە قويىلىپ ماراپاتتارعا يە بولعان.

1970 جىلى مانسۋدانىڭ شەتەلدەگى  سەرىكتىگى قۇرىلدى. ول نەگىزىنەن كوركەم تۋىندىلاردى باسقا مەملەكەتتەردىڭ باسشىلارىنا سىيلاۋعا جاۋاپتى ەدى. 1990 جىلدان باستاپ تۋىندىلاردى ساتۋمەن اينالىسىپ 2011 جىلدىڭ قاراشا ايىنا دەيىن مەملەكەت قازىناسىنا 1 ميلليورد 600 ميلليون دوللار قارجى قۇيعان.

ايتۋعا قاراعاندا مانسۋدا ۇيىمىنىڭ شەتەلدىك مەردىگەرى بار. ول يتالياندىق Pier Luigi Cecioni. ول تۋىندىلاردى شەتەلدە كورمەگە قويۋ جانە ساتۋ جۇمىسىمەن اينالىسادى. قازىرگە دەيىن ولاردىڭ تۋىندىلارى ءوڭتۇستىڭ كورەا، جۇڭگو، افريكا مەن شىعىس ازيا ەلدەرىنە شىعارىلعان.

جاقىنعى جىلداردا ولاردىڭ نەگىزگى تاپسىرىس بەرۋشىلەرى افريكا ەلىندە ەكەن. اراسىنداعى ەڭ تانىمالى سەنەگال رەسپۋبليكاسىنىڭ استاناسى داكارداعى بيىكتىگى 49 مەتر بولاتىن «افريكانىڭ  قايتا جاڭعىرۋى مونۋمەنتى» سانالادى. بۇدان باسقا  انگولا، بەنين جانە ەفيوپيا

رەسپۋبليكاسى دا ءمۇسىن جاساۋعا تاپسىرىس بەرگەن.

«افريكانىڭ  قايتا جاڭعىرۋى» مونۋمەنتى

بۇل ەلدەردىڭ مانسۋداعا تاپسىرىس بەرۋىنىڭ ەكى سەبەبى بار. ارزان باعاسى جانە ول مۇسىندەردىڭ كولەمىنىڭ ۇلكەندىگى. مانسۋدانىڭ شەبەرلەرى ءدال سونداي ۇلكەن كولەمدەگى مۇسىندەردى جاساۋدىڭ ناعىز شەبەرى سانالادى.

مانسۋدانىڭ افريكا ەلدەرىنەن سىرت گەرمانيانىڭ فرانكفۋرت قالاسىنداعى ەرتەگىلەر سۋبۇرقاعى پەن كامبودجاداعى انكور پانورامالىق مۇراجايى دا ولاردىڭ ماقتان تۇتار ونەر جەتىستىگى.

انكور پانورامالىق مۇراجايى.

دايىنداعان:  ا.ماناپوۆ