«كەلىن» تەلەحيكاياسى ەلىمىزدە 2012 جىلدان بەرى كورسەتىلىپ كەلەدى. نەبارى سەگىز جاسىندا ۇزاتىلاتىن قىزدىڭ تاعدىرىن بايانداۋدان باستالعان كينو بىزگە ەرتەگىدەي كورىنەدى. الايدا بۇل كينو شىندىققا نەگىزدەلىپ تۇسىرىلگەن ەكەن.
ءۇندىستاننىڭ رادجاستان شتاتىنىڭ تۇرعىنى ءوز ورتاسىنداعى ەرتە تۇرمىس قۇرۋ ماسەلەسىن كورىپ، ونىڭ كوپتەگەن ارتىقشىلىعىنا كۋا بولادى. ءسويتىپ مۇنى پوۆەست ەتىپ جازۋدى ۇيعارادى. وسى شىعارما جەلىسىمەن تۇسىرىلگەن تەلەحيكايا الەم نازارىنا ىلىگەدى.
«كەلىن» تەلەحيكاياسىنداعى جاعداي بۇگىنگى تاڭدا ءۇندىستاندا كينودا عانا ەمەس، ومىردە دە كورىنىس تاۋىپ وتىر. رادجاستان جەرىندە قىزدار ورتا ەسەپپەن 15 جاسىندا تۇرمىسقا شىعادى. كاتتيسگار، ماديا-پرادەج، وريسسا، بيحار ايماقتارىندا دا قىز بالا 15-19 جاسىندا ۇزاتىلادى. ولاردىڭ اتا-انالارى قازاقتارداعى بەسىك قۇدا بولۋ سالتى سەكىلدى، بالالاردىڭ 1 جاسىندا كەلىسىمشارت جاساسىپ، قول قويادى.
ءۇندى حالقى ءۇشىن ەرتە تۇرمىسقا شىعۋ تاڭعالارلىق جاي ەمەس، ءحى عاسىردا-اق وسى ءۇردىس بەلەڭ العان. سول تۇستا ەلدى جاۋلاپ العان اسكەرلەر وڭ جاقتاعى قىزداردى كەلىسىمىنسىز ايەلدىككە العان. وسى ماسەلەمەن كۇرەسۋ ماقساتىندا اتا-انالار قىزدارىن ءوز قالاۋى بويىنشا ەرتەرەك تۇرمىسقا بەرۋدى ويلاعان.
قازىرگى كەزدە ءۇندىستان زاڭى بويىنشا، ەرلەر 21 جاستا، قىزدار 18 جاسىندا نەكەلى بوۋلى كەرەك. ال بۇل زاڭدى پىسقىرىپ جاتقان حالىق جوق. زاڭ بۇزىلسا، 150 ەۋرو ايىپپۇل سالىنادى، تۇرمەگە جابىلادى. مۇنداي جازالاردى وتەۋ ۇندىلەرگە قيىن ەمەس. اتا-انالاردىڭ بار ويى – قىزىن باي-قۋاتتى شاڭىراققا تۇرمىسقا بەرىپ، الەۋمەتتىك جاعدايىن رەتتەۋ. ءۇندى جۇرتىنداعى حالىقتىڭ تۇسىنىگى بويىنشا، قىزىن ەرتە كۇيەۋگە بەرگەن اتا-انا ونى كيىندىرۋ، وقىتۋ ماسەلەسىنەن قۇتىلادى، ال جىگىتتىڭ اتا-اناسى تەگىن ءۇي كۇتۋشىگە يە بولادى.
نەكە قيۋ ءۇشىن ارنايى شىركەۋگە بارىپ، رەسمي تىركەۋ مىندەتتى ەمەس. تەك اۋىل، اۋدان قاتىساتىن ۇلكەن توي-مەرەكە جاساسا بولعانى. وعان قارسىلىق بىلدىرگەن قىزداردىڭ قۇقىعىن قورعاۋ ۇيىمدارىنا قارا حالىق ءسالت-داستۇردى سىلتاۋراتىپ، ىستەرىن اقتاپ الادى. «كەلىن» تەلەسەريالىن تۇسىرگەندە رەجيسسەر وسىلايشا قىزداردىڭ قۇقىعىن باسقا جولمەن قورعاۋعا تىرىسىپ، حالىقتىڭ ساناسىنا اسەر ەتكىسى كەلگەن.
دەرەككوز: Massaget.kz
شولۋشى: گۇلىم جاقان
