9 مەترلىك كوپىردەن قۇلاعان ساتتە اناسى بالاسىن كەۋدەسىنە قىسىپ امان الىپ قالعان، دەپ حابارلايدى قامشى اقپاراتتىق اگەنتتىگى.

انا بولۋدىڭ ءوزى ءبىر ەرلىك.  كەيدە انالار ءوز بالاسى ءۇشىن ءتۇرلى قۇرباندىققا بارىپ جاتادى.

23 جاستاعى امەريكا تۇرعىنى دجەننيفەر دۋنكان ءوزىنىڭ 8 ايلىق ۇلى دەنيەلدى بالاباقشاعا اپارا جاتقان.  كوپىر تۇسىندا ايەل كىشىگىرىم جول اپاتىنا ۇشىرايدى.  وقيعا ورنىندا پوليسيا قىزمەتكەرلەرى جەتكەنشە بالاسىن ۇستاپ كوپىر بويىندا تۇرعان.  سول ساتتە ءوزىن جانە ءسابيىن ءقاۋىپسىز جەردە تۇرمىز دەپ ويلاعان.

الايدا سول جەردە تاعى ءبىر جول اپاتى ورىن الادى. ەكى كولىك بىر-بىرىنە جول بەرمەي ، ءبىر كولىك دجەننيفەر مەن ونىڭ ءسابيىن سوعادى. اۋىر سوققىدان انا مەن بالا 9 مەترلىك كوپىردەن اسفالتكە قۇلاعان.

تاڭقالدىراتىنى ، ءسابي ءبىرشاما بيىكتىكتەن اسفالتكە قۇلاسا دا ەش جەرىنە زاقىم كەلمەگەن. ال اناسىنىڭ ومىرتقا بولىگى زاقىمدانىپ، اياعى مەن قابىرعاسى سىنعان.

دجەننيفەرگە سوڭعى 10 اي ىشىندە 14 وپەراسيا جاسالدى. وكىنىشتىسى دارىگەرلەر ناۋقاستىڭ اياعىن قالپىنا كەلتىرە المادى.   بۇگىندە جاساندى اياق ارقىلى قايتا ءجۇرۋدى ۇيرەنىپ ءجۇر.  دجەننيفەر ءوزىنىڭ وسى ۋاقىتقا دەيىن اۋرۋمەن كۇرەسۋىنىڭ باستى سەبەبى ۇلى ەكەنىن ايتقان بولاتىن.

دايىنداعان: ايگەرىم تاۋباي