بۇل جۇمباقتىڭ جاۋابى 50 جىلعا جۋىق ۋاقىت بويى نورۆەگيا جۇرتىن مازالاپ كەلدى. ال ەندى جۇمباقتىڭ شەشىمى تابىلدى دەپ حابارلايدى قامشى اقپاراتتىق اگەنتتىگى.

1970 جىلدىڭ قاراشا ايىندا يسلادەن جازىعىندا وتقا ورانىپ كوز جۇمعان ايەلدىڭ ءمايىتى تابىلعان بولاتىن.

پوليسيا قىزمەتكەرلەرى ايەلدىڭ ءولىمىن زەرتتەۋدى باستايدى.  ءىستىڭ بارىسىندا ءتۇرلى جاسىرىلعان حابارلامالار مەن جاساندى قۇجاتتار تاعى دا باسقا كۇدىكتى ايعاقتار تابىلادى.  الايدا ءىستىڭ نۇكتەسىن قويىپ، ناقتى شەشىم شىعارا الماعان بولاتىن.

46 جىل وتكەن سوڭ نورۆەگيانىڭ پوليسيا قىزمەتكەرلەرى مەن NRK كورپوراسياسىنىڭ  جۋرناليستەرى ءىستى قايتا قاراۋدى ۇسىنادى.

ءبىرىنشى دەرەك: بەلگىسىز ايەلدىڭ ءمايىتى

1970 جىلدىڭ 29 قاراشا كۇنى يسلادەن ايماعىندا جانىنا ەكى قىزىن ەرتكەن ەر ادام ورتەنگەن دەنەنى تاپقان.

ءمايىت  جۇدىرىعىن جۇمعان كۇيىندە جانىپ كەتكەن.

يسلادەن ايماعى  جەرگىلىكتى جەردىڭ تۇرعىندارىنىڭ اراسىندا «ءولىم اڭعارى» دەگەن اتپەن دە بەلگىلى.  ورتا عاسىرلاردا ادامدار وز-وزدەرىنە قول سالۋشىلىققا كوپ بارا بەرمەيتىن. ال 1960 جىلدارى بىرنەشە ساياحاتشىلار تۇماندا اداسىپ كوز جۇمعانى تىركەلگەن.

«وقيعا ورنى تىرشىلىكتەن ءبىرشاما الىس ايماقتا ورنالاسقان» دەپ مالىمدەگەن بولاتىن وقيعا ورنىنا العاش  بولىپ بارعان  پوليسيا زاڭگەرى  كارل حالۆور ااس ءوزىنىڭ سۇحباتىندا.

ونىڭ ايتۋىنشا ەسىندە قاتتى كۇيگەن ءتاننىڭ ءيىسى قالىپتى.

كۇيىك شالعان ايەلدىڭ بەت-بەينەسىن انىقتاۋ مۇمكىن ەمەس بولعان.

ەكىنشى ايعاق: وقيعا ورنىنداعى زاتتار

وقيعا ورنىنان ءتۇرلى اشەكەي بۇيىمدار، ساعات، سىنعان قولشاتىر مەن بىرنەشە بوتەلكە تابىلعان. ال وسى زاتتاردىڭ قالاي ورنالاسىپ تۇرعانى تورمودا بونەستى قاتتى تاڭقالدىرعان.

قول ساعات پەن اشەكەي بۇيىمدار ايەلدىڭ دەنەسىندە ەمەس جانىنان تابىلعان.

زاتتاردىڭ ورنالاسۋىنىڭ وزىندە ءبىر وزگەشەلىك بولدى.  بەلگىلى ءبىر ءراسىم سياقتى كورىنەدى.

وقيعا ورنىنان پوليسيا قىزمەتكەرلەرى رەزىڭكە اياق كيىم مەن شۇلىقتى تاپقان. ونىڭ دەنەسىندە سينتەتيكادان جاسالعان كيىم كوپ بولعان جانە بارلىعى دا جانىپ كەتكەن.

بوتەلكلەردىڭ سىرتىنداعى سۋرەتتەر وشىرىلگەن. ناقتى ايعاقتىڭ تابىلماۋىنان پوليسيا قىزمەتكەرلەرى ايەلدىڭ كىم ەكەنىن انىقتاي الماعان.

سيپاتتاما بويىنشا ايەلدىڭ بويى 164 سم. 24-40 جاس اراسىنداعى قارا شاشتى ايەل دەپ بولجام جاسالعان. ولەرىنىڭ الدىندا شاسىن اق-كوك ءتۇستى لەنتامەن بۋىپ العان.

ەسىمى بەيمالىم ايەل «يسلادەن اڭعارىنداعى ايەل» دەگەن اتپەن تانىمال بولىپ كەتتى.

كەلەسى ايعاق : جول سومكەلەرى

پوليسيا قىزمەتكەرلەرى بەرگەن ۆوكزالىنىڭ زات ساقتاۋ بولىمىنەن ەكى جول سومكە تاپتى. ەكى سومكەنىڭ ىشىنەن كوزىلدىرىك، كيىم، بىرنەشە جاساندى شاش، تاراق، بوياناتىن زاتتار مەن بىرنەشە اس قاسىق تابىلعان.  جانە سومكەلەردىڭ بەلگىسىز ايەلگە تيەسىلى ەكەنى انىقتالىپ وتىر.

قوناقۇيگە ورنالاسقان كەزدە فەنەللا لورح اتتى ەسىممەن تىركەلگەن.  قوناقۇيدەگى مالىمەتتەر بويىنشا ايەل ءار قوناق ۇيدە ءار ءتۇرلى ەسىممەن تىركەلىپ وتىرعان.

بەلگىسىز ايەل 21 جاستاعى ءقوناقۇي قىزمەتكەرىنىڭ قىزىعۋشىلىعىن تۋدىرعان.

ءقوناقۇي قىزمەتكەرىنىڭ ايتۋىنشا، ول تەك اعىلشىن تىلىندە انا  ەمەس نەمىس ءتىلىن دە قولدانعان.

جوبا بويىنشا بەلگىسىز ايەل وزگە ەلدەن كەلگەن  تىڭشى بولعان.

ول كەزدە قان مايدان ءجۇرىپ جاتقانىن ەسكەرسەك، جان-جاقتان كەلەتىن ساياحاتشىلاردىڭ ىشىندە تىڭشىلاردىڭ بولعانى انىق.

NRK مالىمەتى بويىنشا، ءقاۋىپسىزدىڭ قىزمەتىندەگىلەر ايەلدىڭ اسكەري ءىستى باقىلاعانىن، نورۆەگيانىڭ باتىسىندا جاڭا زىمىرانداردى ۇشىرۋ كەزىندە سىناقتان وتكىزۋ سەكىلدى حابارلامالارعا قىزىعۋشىلىق تانىتقانىن مالىمدەدى.   

الايدا بۇل ايعاقتاردى ەسكەرە وتىرىپ نورۆەگيا ناقتى شەشىم شىعارعان جوق.

پوليسيا قىزمەتكەرلەرى ايەلدىڭ زاتتارىان تابىلعان قۇپيا ءسوزدى جاسىرىن قاعازدىڭ شەشىمىن تاپتى. ءبىراق بۇل بەلگىسىز ايەلدىڭ تىڭشى بولعانىن ايعاقتامايدى.

قاعازدا ايەلدىڭ جۇرگەن جولى مەن ارالاعان مەكەندەرى جازىلعان.  مىسالى، و22-و28 ز – (22-28 قازان) ول پاريجدە بولعان.  پاريجدەن ستاۆانگەرگە جولعا شىققانى بەلگىلى بولسا، و29S سونىڭ دالەلى.

نورۆەگيانىڭ قۇقىق قورعاۋ ورگاندارى ايەلدىڭ بەينەسىن ءار ەلگە جىبەرگەن، الايدا ەشكىم ءتانىپ-بىلىپ حابارلاسپاعان.

ءمايىتتى تەكسەرۋ بارىسىندا ايەلدىڭ موينىنان سوققى العانى ءمالىم بولعان. بولجام بويىنشا، بەلگىسىز ايەلدىڭ ءولىمى ازاپقا تولى ءارى اۋىر بولعان. وكپەسىندەگى تۇتىننەن ايەلدىڭ وتقا ورانباي تۇرعان كەزدە ءتىرى بولعانى انىقتالىپ وتىر. ايەلدى ورتەۋ ءۇشىن بەنزين قولدانىلعانى انىقتالعان.

مامانداردىڭ تەكسەرۋ بارىسىندا ايەل اسقازانىنان 50-70  ءدارىنى ىشكەنىن انىقتاعان. ءدارىنىڭ Fenemal اتاۋىمەن شىعارىلعانى دا بەلگىلى بولدى.   الايدا ولەر الدىندا ول ءدارى ءوز كۇشىنە ەنىپ ، قانعا جايىلىپ ۇلگەرمەگەن.  

ايەل ءدارىنى مولشەردەن تىس قولدانعانىنان جانە كومىرتەگى توتىعىنان ولگەنى انىقتالىپ وتىر.

كوپشىلىك بۇل وقيعانى وزىنە-وزى قول جۇمساۋ دەپ سانايدى . الايدا ءوزىن ءولتىرۋ ءۇشىن ەشكىم تۇرمايتىن، تىرشىلىك از مەكەنگە بارىپ وتقا ورانۋى كارل حالۆور ااستى قول جۇمساۋ ەكەنىنە سەندىرە الماعان.

باسقا دەرەكتەر بولماعاندىقتان ايەلدى 1971 جىلى اقپان ايىندا جەر قوينىنا تاپسىرعان. ايەلدى كاتوليك دىنىندە بولعان دەگەن بولجام جاسالعان. سول سەبەپتى كاتوليكتەردىڭ ءداستۇرى بويىنشا جەرلەنگەن.

بەلگىسىز ايەلدىڭ تۋىستارى تابىلادى دەگەن ۇمىتپەن سۋرەتتەرى جيناستىرىلىپ ساقتاۋلى تۇر. بۇل وقيعا ءبىراز سۋرەتشىلەر مەن  جازۋشىلاردىڭ باستى تاقىرىبىنا دا اينالىپ ۇلگەرگەن.

ءبىراق 2016 جىلى ءىستى قايتا قوزعاۋ ءۇشىن دەرەككوز تابىلعان بولاتىن.

كەلەسى ءبىر دەرەك: ايەلدىڭ ءتىسى.

بەلگىسىز ايەلدىڭ 14 تىسىنە پلومبا سالىنعان. بۇل سول جاستاعى ادامدار ءۇشىن ءبىرشاما ەرسى بولاتىن.

گيسلە بانگ ەسىمدى ستوموتولوگيا سالاسىنىڭ پروفەسسورىنىڭ ايتۋىنشا، ايەلدىڭ ءتىسىن ساقتاپ قويۋ سەبەبىم ، وسى سەكىلدى تىستەر قايدا جاسالاتىندىعىن انىقتاۋ ءۇشىن دەپ جاۋاپ بەرگەن بولاتىن.

ءمايىت تابىلعان كەزدە ايەلدىڭ تىسىنەن جامان ءيىس شىققاندىقتان لاقتىرىپ تاستالدى دەلىنگەن بولاتىن. الايدا سوڭعى جىلدارى ءتىس مامانداردىڭ قولىنا تۇسكەن. پروفەسسور ءموريلدتىڭ ايتۋىنشا،  ايەلدىڭ جاق بولىگى حوۋكلەند ۋنيۆەرسيتەتىنىڭ سوت ارحيۆتەر جەرتولەسىنەن تابىلعان.

جاڭا زاماننىڭ دامىعان تەحنولوگياسىن پايدالانا وتىرىپ، بەرگەن ۋنيۆەرسيتەتىنىڭ ماماندارى مەن كريمينالدى ىستەر بويىنشا ماماندار ايەلدىڭ بالا كۇندە ىشكەن سۋىنىڭ قاي جەرگە تيەسىلى ەكەنىنە دەيىن انىقتاي الادى.

ايەلدىڭ ءىش قۇرىلىسىن زەرتتەي كەلە ءتۇرلى ورنەكتەرگە ۇقساس بەلگىلەردىڭ ساقتالىپ تۇرعانى انىقتالدى. ولار جۇرەك، وكپە بولىكتەرىنەن الىنعان.

وسى ءىستىڭ باسى-قاسىندا جۇرگەن NRK تەلەكانالىنى زەرتتەۋ قورىتىندىلارى شىققانشا وقيعانىڭ مان-جايىمەن تانىستىرىپ دەرەكتى ءفيلمدى كورسەتكەن بولاتىن.  بۇل ىسكە قىزىعۋشىلىعى ويانعانداردىڭ سانى 150-دەن اسىپ جاتتى.

نورۆەگيادا بولعان ءىستىڭ ءمان-جايىن اشۋعا تالپىنۋشىلاردىڭ سانى كوپ ەكەنىن مالىمدەدى جۋرناليست ستولە حانسەن.

اناليزدەردىڭ قورىتىندىسى ايەلدىڭ ەۋروپالىق بولعانىن انىقتادى. سول سەبەپتى يزرايل مەملەكەتىنىڭ تىڭشىسى دەگەن كۇدىك ءبىرشاما سەيىلگەن بولاتىن.

ەۋروپالىق پوليسەيلەر ورتالىقتارىنا دنق-نى تەكسەرۋ ءۇشىن ءبىرشاما مالىمەت جىبەرىلگەن.

جۋرناليست ستولە حانسەننىڭ ايتۋى بويىنشا، ايەلدىڭ تۋىستارى تابىلىپ جاتسا، بۇل ۇلكەن جەتىستىك!

دايىنداعان: ايگەرىم تاۋباي