2017 جىلعى 17 مامىردا «رۋحاني جاڭعىرۋ» قوعامدىق سانانى جاڭعىرتۋ باعدارلاماسىنىڭ قۇرامداس بولىگى بولىپ تابىلاتىن «تۋعان جەر» باعدارلاماسى بويىنشا ساراپشىلار كەڭەسىنىڭ ءبىرىنشى وتىرىسى ءوتتى دەپ حابارلايدى قامشى اقاپاراتتىق اگەنتتىگى.

ساراپشىلار كەڭەسى ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ بازاسىندا قۇرىلعان، ونىڭ قۇرامىنا بەدەلدى قوعام جانە عىلىم قايراتكەرلەرى، ۇكىمەتتىك ەمەس ۇيىمداردىڭ وكىلدەرى، جەتەكشى ساراپشىلار مەن ماماندار كىرەدى. 

ساراپشىلار كەڭەسىندە «تۋعان جەر» باعدارلاماسىن جۇزەگە اسىرۋدىڭ باستى تۇجىرىمدامالىق ۇستانىمدارى قارالدى. بۇل باعدارلاما ءتورت بولىكتەن تۇرادى: «تاربيە جانە ءبىلىم»، «اتامەكەن»، «رۋحاني قازىنا»،  «اقپارات تولقىنى». اتالعان  باعدارلامالار 14 باستى باعىتتار بويىنشا جۇرگىزىلەدى، ولاردىڭ ءارقايسىسى بويىنشا ءتيىستى جوبالار مەن ءىس-شارالار ىسكە اسىرىلاتىن بولادى.

باعدارلامانى ءتيىمدى جۇزەگە اسىرۋ ماقساتىندا جوبالىق باسقارۋدىڭ ءادىسناماسىن قولدانۋ جونىندە شەشىم قابىلداندى.

وتىرىس بارىسىندا ساراپشىلار كەڭەسىنىڭ ءتوراعاسى - ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ە.سىدىقوۆ مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ ماڭىزدىلىعىن اتاپ ايتتى، وندا ءپاتريوتيزمدى قالىپتاستىرۋ، ءسالت-داستۇرىمىزدى، مادەنيەتىمىز بەن بىرەگەي ۇلتتىق كودىمىزدى ساقتاۋ سياقتى ماڭىزدى باسىمدىقتار ايقىندالعان. 

ساراپشىلار كەڭەسىنىڭ مۇشەلەرى تۇجىرىمدامالىق ۇستانىمدار بويىنشا ناقتى ۇسىنىستار مەن ۇسىنىمدار بەردى.

كەڭەستىڭ بۇگىنگى جۇمىسىن قورىتىندىلاي كەلە، ە.سىدىقوۆ تالقىلاۋدىڭ سىندارلى بولعانىن، ونىڭ «تۋعان جەر» باعدارلاماسىنىڭ تۇجىرىمدامالىق ۇستانىمدارىن جەتىلدىرۋگە تيگىزەتىن پايداسىن اتاپ ايتتى، سونداي-اق ساراپشىلار كەڭەسىنىڭ مۇشەلەرىنە ساراپشىلار مەن كونسۋلتانتتار رەتىندە جوبالىق توپتاردىڭ جۇمىسىنا جانە ىسكە اسىرىلىپ جاتقان جوبالاردى مونيتورينگتەۋگە بەلسەندى قاتىسۋدى ۇسىندى.

ساراپشىلار كەڭەسىنىڭ ءبىرىنشى وتىرىسىنىڭ قورىتىندىسى بويىنشا «تۋعان جەر» باعدارلاماسىنىڭ تۇجىرىمدامالىق ۇستانىمدارى ماقۇلداندى.