ءابۋ ساييد يبن ماليك ون ءۇش جاسىندا اكەسىمەن بىرگە ۋحۋد شايقاسىنا قاتىسقان ساحابا. سول سوعىستى اكەسى شەيىت بولادى دا، وتباسىنىڭ بۇكىل اۋىرتپاشىلىعى جاپ-جاس ءابۋ ساييدتىڭ موينىنا تۇسەدى دەپ جازادى قامشى اقپاراتتىق اگەنتتىگى muslim.kz-كە سىلتەمە جاساي وتىرىپ. كەدەيلىكتى باستان كەشىرەدى. اشتىقتان قارىندارىنا تاس بايلاپ الاتىن كەزدەرى بولادى. سوندا ۇيىندەگىلەر: «بار دا، اللا ەلشىسىنەن (س.ع.س.) ءبىر نارسە سۇراپ كەل! جۇرتتىڭ ءبارى سۇراپ جاتىر عوي» دەگەن شاعىم ماندەس ءسوز ايتادى. العاشىندا بارعىسى كەلمەيدى. ءبىراق جاعداي قىسىپ بارا جاتقان سوڭ، نە دە بولسا، اللا ەلشىسىنە (س.ع.س.) بارىپ جولىعۋعا بەل بايلايدى

قۇدايدىڭ قۇدىرەتىن قاراڭىز، راسۋلۋللانىڭ (س.ع.س.) قاسىنا بارىپ قالسا، ول حالىققا مىنا ءسوزدى ايتىپ تۇر ەكەن: «كوڭىلىن توق تۇتقان جانە ار-نامىستى جوعارى ۇستاعان كىسىلەردى اللا تاعالا وزگە جۇرتتان باي ەتەدى».

وسى ءسوزدى ەستىگەن ءابۋ ساييد تىلەگىن پايعامبارىمىزعا (س.ع.س.) ايتپاي-اق ۇيىنە قايتىپ كەتەدى. سودان كەيىنگى جاعدايدى ءوز اۋزىمەن بىلاي دەپ جەتكىزگەن: «اللا ەلشىسىنەن (س.ع.س.) ەشتەڭە سۇراماي ۇيگە قايتقان كۇنى اللا بىزگە رىزىق-نەسىبەسىن جىبەردى. سودان بىلاي ىسىمىزگە بەرەكە دارىعانى سونشا انسارلاردىڭ اراسىندا بىزدەن باي ەشكىم بولمادى...» 

مىنە، ءبىزدىڭ نەسىبە ىزدەگەندە جاسايتىن ۇلكەن قاتەلىكتەرىمىزدى ءبىرى وسىندا جاتىر. اينالاداعى اركىمنىڭ داۋلەتىنە كوز تىگىپ، مەن دە سولارداي بولسام عوي دەپ ىشتەي تىلەپ ءجۇرۋدىڭ ءوزى كوڭىلدىڭ توق ەمەس ەكەنىن بىلدىرەدى. ونىڭ ورنىنا اللانىڭ ماعان بەرگەن نەسىبەسى وزىمە جەتەدى، قۇدايعا شۇكىر دەۋ كەرەك. ەكىنشى ماسەلە – ار-نامىستى جوعارى ۇستاۋ. جۇرتقا الاقان جايۋدى نامىس كورۋدىڭ ءوزى ادامدى ەڭبەككە باۋلىپ، تابىسقا قاراي جەتەلەسە كەرەك. اباي اتامىز ايتقانداي، تەلمىرگەن كوزىمىزدى ەمەس، ماڭدايىمىزدان اققان تەرىمىزدى ساتۋىمىز قاجەت. سوندا باي بولامىز. اللا ەلشىسى (س.ع.س.) قاتەلەسپەيدى.

اۆتورى: اسىلبەك اۋەزحان ۇلى

شولۋشى: اسەل وتەشوۆا