تەمەكى – قۇرامىندا نيكوتين (nicotiana) جانە ءتورت مىڭعا جۋىق ۋلى زات بار تەمەكى وسىمدىگىنىڭ مايدالانعان، قۇرعاتىلعان جانە قولدانۋعا دايىن كۇيدەگى جاپىراعىنان جاسالادى دەپ جازادى قامشى اقپاراتتىق اگەنتتىگى muslim.kz-كە سىلتەمە جاساي وتىرىپ. تۇقىمى وتە مايدا بولعاندىقتان، الدىمەن كوشەتى ءوسىرىلىپ، سوسىن ەگىستىك جەرگە وتىرعىزىلادى. تەمەكى–جاپىراعىندا تانين، جەلىم، شايىر، كراحمال جانە الكولويدتار بار وسىمدىك. تەمەكىنىڭ ىشىندە – ەڭ كوپ مولشەردە نيكوتين الكولويدى بار. نيكوتين سۋلفات تۇزدارى اۋىل شارۋاشىلىعىندا قۇرت-قۇمىرسقانى ءولتىرۋ ءۇشىن قولدانىلادى. تەمەكىنىڭ ءتۇتىنى اعزاعا زياندى جانە ۋلى زاتتاردىڭ جيىنتىعىنان تۇرادى. بۇلاردىڭ ىشىندە ەڭ ءقاۋىپتىسى – نيكوتين، سينيل قىشقىلى، كومىر قىشقىلى، سىركە قىشقىلى، ازوت، ەفير مايى جانە وكپە راگىنە ۇشىراتاتىن ءارتۇرلى راديواكتيۆتى ەلەمەنتتەر (بەنزەپيرەن، پولونيي، ۆيسمۋت، ت.ب.).

نيكوتين – سيامينگە پارا-پار ۋ. نيكوتين ۋلى زات بولعاندىقتان، مەديسينادا ءدارى رەتىندە قولدانىلمايدى. ماسەلەن، 5-6 تامشى نيكوتيندى يتكە بەرسە، سول زاماتتا ءولىپ كەتەر ەدى. ال ءبىر قوراپ تەمەكىنىڭ قۇرامىنداعى نيكوتيندى ينەمەن شانشىسا، ادام اپ-ساتتە كوز جۇمادى. الايدا ادام اعزاسى نيكوتيندى قان ارقىلى ەمەس تىنىس جولىمەن قابىلدايتىندىقتان، بىردەن ەمەس، «باياۋ ءولىم» ارقىلى ءوز تۇبىنە ءوزى جەتەدى.

تەمەكى قۇرامىنداعى ۋلى زاتتاردىڭ سانى 70-تەن 300-گە دەيىن جەتەدى. الايدا تەمەكى شەگۋ كەزىندە ۋلى زاتتار ودان سايىن ارتا تۇسەدى. ويتكەنى تەمەكى تۇتاتىلعاندا، تەمپەراتۋرا 600-دەن 900 گرادۋسقا دەيىن كوتەرىلەدى دە، جاڭا ۋلى زاتتار مەن ونىمدەر تۇزىلەدى. وسىلايشا تەمەكىنىڭ قۇرامىنداعى ۋلى زاتتار سانى 4 مىڭعا دەيىن كوبەيەدى.

نيكوتين تەمەكى تۇتىنىمەن اۋىزعا، ودان ءارى تىنىس جولدارىمەن وكپەگە، ودان ادام قانىنا ءسىڭىپ، قان ارقىلى ادام اعزاسىنىڭ تۇكپىر-تۇكپىرىن ۋلايدى. سىلەكەي ارقىلى جۇتىنعاندا، نيكوتين وڭەشكە، اسقازانعا وتەدى. ءسويتىپ، اۋىزداعى، ەرىندەگى، تىلدەگى، تاڭدايداعى وتە سەزىمتال جۇيكە تالشىقتارىن زاقىمدايدى. نيكوتين قان ارقىلى ميعا جەتەدى، اۋەلى ونىڭ جۇيكە كلەتكالارىن (نەيرونداردى) قوزدىرادى، سوسىن ولاردى ۋلاي باستايدى. نيكوتين ءتۇتىن ارقىلى تىنىس جولدارىمەن وتەتىندىكتەن، تەمەكى ءتۇتىنى ونىڭ ىشكى قابىرشاقتارىن ىستايدى، ءىسىندىرىپ، قابىندىرادى، قان تۇيىرشىكتەرىندەگى وتتەگىنى ادام اعزاسىنا تاراتۋشى تامىرلارعا اۋىر زاردابىن تيگىزىپ، قان اينالىمى قيىنداعاننان مي، جۇرەك، باسقا ورگاندار «قورەكسىز» قالادى. كوك ءتۇتiننiڭ سالدارىنان ادامنىڭ بۇكiل قان تامىرلارى جيىرىلىپ، قان الماسۋ قيىندايدى. جۇرەككە ۇلكەن اۋىرتپالىق تۇسەتىندىكتەن، جۇرەك تالماسىنا الىپ كەلەدi. ميعا باراتىن قان مولشەرi ازايىپ، ول ءوز كۇشiندە جۇمىس iستەي المايدى. بارلىق اعزالارعا وتتەگi جەتiسپەگەندiكتەن، باس اۋىرىپ، جۇرەك سىزداپ، اياق-قول قاقسايدى. تەمەكى شەگەتىن انالار تاپقان بالانىڭ قان تۇيىرشىكتەرىنىڭ گەموگلوبينى كەم بولادى.