تۋ – قاي زاماندا دا قاسيەتتى دۇنيە. ول ۇلتتىق نامىس، مەملەكەتتىك نىشان. تۋدىڭ بيىك تۇرعانى حالىق ابرويىنىڭ سيمۆولى. تۋدى قاستەرلەۋدەن ۇلگى الۋعا لايىق مەملەكەتتەر اقش، جۇڭگو، تۇركيا. اقش ەلىنە بولىپ كورمەدىم، الايدا، امەريكاندىقتاردىڭ مەملەكەتتىك تۋدى قالاي قاستەرلەيتىنى اڭىز بولىپ كەتكەن. ولار الەمنىڭ قاي تۇكپىرىندە بولسا دا مەملەكەتتىك تۋىن كورە قالعان جەردەن تاعزىم ەتەدى، ءار ءبىر امەريكاندىق مەملەكەتتىك تۋىن قورعاۋ ءۇشىن كەز كەلگەن قاتەرگە بارا الادى. اقش ءار ءتۇرلى ونىمدەرىندە مەملەكەتتىك تۋىن ايشىقتى جەرلەرگە بەدەرلەيدى. ءتۇرلى فيلمدەردە، مەديا ونىمدەرىندە مەملەكەتتىك تۋ مىندەتتى تۇردە قاتىستىرىلادى جانە قۇرمەتتى جەردەن ورىن الادى. ال، جۇڭگو مەن تۇركيانىڭ مەملەكەتتىك تۋىن قاستەرلەيتىنى سونشالىق – تۋدى قاستەرلەۋدى ۇرپاعىنا مەكتەپ تابالدىرىعىنان-اق ۇيرەتەدى. ءار ءبىر اپتا سايىن بولاتىن مەكتەپتىك جيىندا تۋ شىعارۋ سالتاناتىن وتكىزدى. وعان مەكتەپ وقۋشىلارى تۇگەل جيىلىپ، تۋدىڭ تولىق كوتەرىلىپ بولعانىنشا قۇرمەت ەتەدى. ءتۇرلى پاراد، شەرۋلەردە مىندەتتى تۇردە تۋ الىپ جۇرىلەدى. ال بىزدە شە؟

ءبىر اپتا بۇرىن سۋ دوبىنان ەرلەر اراسىنداعى قازاقستان قۇراماسىنىڭ بۇتتارىنا مەملەكەتتىك تۋ بەدەرلەنگەن پلاۆكي كيىپ الىپ، شەتەلدىكتەر الدىندا ەمىن-ەركىن مەملەكەتتىڭ نامىسىن «قورعاپ» جۇرگەنىنە كۋا بولدىق. مەملەكەتتىك تۋىمىز قورلانعانى جالعىز بۇل ەمەس، تۋدى قوقىس سالاتىن دوربا ەتۋ، ءتۇرلى جەردە قاراپايىم ماتامەن تەڭ قولدانۋ، زاڭمەن بەكىتىلگەن ءىلىنۋى ءتيىس ورىنداردا جىرتىلعانشا قاراۋسىز تۇرا بەرۋ وقيعالارى سوڭعى بىرنەشە جىل ىشىندە ءجيى كەزىكتى. كوشەدەن كەز-كەلگەن ازاماتتان تۋ تۋرالى سۇراي قالساڭىز، ماعىناسىن دا اۆتورىن دا ايتا الماي قالاتىندار كەزىگەدى. مەملەكەتتىك تۋدى، باسقادا رامىزدەردى دۇرىس قولدانباۋدىڭ جازاسى كۇشەيتىلگەن. الايدا، لايىقتى دارەجەدە قاستەرلەي الماي كەلەمىز. ونىڭ باستى سەبەبى مەملەكەتتىك تۋدى قاستەرلەۋگە ءتيىس نامىستىڭ ءار ءبىر ازاماتتىڭ ساناسىنان سىڭىرىلمەۋى.

قاسيەتتى تۋىمىز قورلانىپ، وزگەلەردىڭ الدىندا ۇياتقا قالمايىق دەسەك، مەملەكەت مىنالاردى كەشىكتىرمەي قولعا الۋى ءتيىس:

رەسپۋبليكا بويىنشا مەملەكەتتىك مەكەمەلەردە، جوو-لاردا، مەكتەپتەردە ۇجىم(قىزمەتكەرلەر، وقۋشىلار، ستۋدەنتتەر) تۇگەل قاتىساتىن تۋ شىعارۋ سالتاناتى ءار اپتادا، ءبىر ۋاقىتتا ءوتۋى ءتيىس؛

مەملەكەتتىك قىزمەتكە تۇرۋ، جوو-لارعا وقۋعا ءتۇسۋ الدىندا كەز كەلگەن ازامات رامىزدەر تۋرالى قوسىمشا سىناق تاپسىرۋى قاجەت؛

شەتەلدەن كەلەتىن كەز كەلگەن ازاماتقا شەكارالىق وتكەلدەردە، كەدەندىك بەكەتتەردە قازاقستان رامىزدەرى تۋرالى حالىقارالىق تىلدەردە جازىلعان كىتاپشا تاراتىلىپ، قۇرمەت كورسەتۋگە مىندەتتەلۋى كەرەك.

وسى شارالار قولعا الىنعان جاعدايدا، ءتۇسى وڭىپ، كىرگە باتتاسىپ تۇراتىن، جىرتىلعانشا اۋىسپاي تۇراتىن مەملەكەتتىك تۋ ءار اپتا سايىن جاڭارىپ تۇراتىن بولادى. جانە تۋ شىعارۋ سالتاناتىنا قاتىساتىن كەز-كەلگەن ازاماتتىڭ جادىنا مەملەكەتتىك رامىزدەر جاتتالىپ قالادى. ءار ءبىر ازاماتىمىز مەملەكەتتىك ءرامىزدى قاستەرلەۋ – وتانىمدى قورعاعانىم دەپ ساناۋ كەرەك. ايدىڭ كۇننىڭ امانىندا تۋ قورلانۋىنان ساقتاسىن.

اقكىسى جانكەرىم