«حالىق بانك»  – ەكىنشى دەڭگەيلى بانكتەردىڭ ىشىندەگى ەڭ بەلدىسى. بۇلاي دەيتىنىمىز - ونىڭ كاپيتالى - 2 تريلليون 746 ميلليارد تەڭگەنى قۇرايدى. 

مەن كوپتەن بەرى وسى بانكتىڭ تۇتىنۋشىسىمىن. الايدا، ءبىر تۇسىنە المايتىنىم  - وسى بانكتىڭ كەز-كەلگەن قىزمەتىندە كوميسسيالىق تولەمدەرى مەن قىزمەت اقىلارى الدەقايدا قىمبات. مىسالى جاي عانا حالىق بانككە تيەسىلى كارتوچكاڭىزدا قانشا اقشا بار ەكەنىن ءبىلۋ ءۇشىن بانكوماتقا سالعان جەردەن 40 تەڭگە بەرەسىز. كارتوچكاڭىزبەن بايلانىس قىزمەتتەرىن تولەۋ كەرەك بولساڭىز قانشا سۋمما تولەگەنىڭىزگە قاراماستان كوميسسياعا 50 تەڭگە بەرۋىڭىز كەرەك. وسى بانكتىڭ ينتەرنەت بانكينگىن قولدانىپ، وزگە بانكتەگى كارتوچكالارعا اقشا اۋدارماقشى بولساڭىز 400 تەڭگە تولەۋىڭىز كەرەك. ەسەبىڭىزگە تۇسكەن اقشانى بوساتىپ الۋ ءۇشىن دە اقشاڭىزدىڭ ءبىر پايىزىن بانككە بەرۋىڭىز كەرەك.  وسىلاي ءتىزىپ كەتە بەرسەڭىز 100 تەڭگەلەپ كوميسسيا ۇستايتىن قىزمەتتەر جەتىپ جاتىر. سوعان قاراماستان مەملەكەت كوپتەگەن تولەم وپەراسيالارىن وسى بانك ارقىلى جۇرگىزۋدى مىندەتتەپ قويعان. مىسالى ءسىز جوو-عا قۇجات وتكىزۋ ءۇشىن 300 تەڭگەگە جۋىق كوميسسياسمەن قوسا تولەم جاساۋىڭىز كەرەك. جىل سايىن نەشە ون مىڭداعان وقۋشىنىڭ جوو اۋديتورياسىنا وتىرۋعا نيەتتى ەكەنىن ءبارىمىز بىلەمىز. ال، ءتۇرلى قورلاردىڭ، مەملەكەتتىك ۇيىمداردىڭ، كاسىپورىنداردىڭ ەسەپتەرى دەرلىك وسى بانكتەن اشىلعان. دۇرىسى وسى بانكتەن اشىلۋى مىندەتتەلگەن. وسى بانك ارقىلى كوميسسياسى ۇشان-تەڭىز قىرۋار وپەراسيالاردىڭ جۇرىلۋىنە كىم مۇددەلى ەكەنى تۇسىنىكسىز. شەتەلدە اقشا اۋدارىمدارىنان باسقا بانك ارقىلى جۇرگىزىلەتىن وپەراسيالار مۇلدەم كوميسسياسىز جۇرىلەدى نەمەسە وتە ەلەۋسىز عانا پروسەنت ۇستايدى. 72،3 پايىز اكسياسى تيمۋر جانە دينارا قۇلىبايەۆتاردىڭ يەلىگىندە بولعان، ورىنسىز ءوسىمى كوپ «حالىق بانك» حالىققا قىزمەت كورسەتە الماسا، اتاۋىن وزگەرتىپ العانى ءجون شىعار.

اقكىسى جانكەرىم