مەكتەپتە ساباق بەرگەن ۇستازدارىمنىڭ ءارۋاقتارى كەشىرسىن..
ءبىزدى وقىتقان مۇعالىمدەردىڭ كوپشىلىگى 7-كلاسس ءبىتىرىپ، ارتىنان مۇعالىمدەر كۋرسىن نەمەسە پەد.ۋچيليششە بىتىرگەن مۇعالىمدەر ەدى. كوپشىلىگى سوعىستا بولعان. ەلگە ەركەلەۋ، اراققا جاقىنداۋ...
1970 جىلداردىڭ باسىندا وزگە اۋىلدى بىلمەيمىن، ال ءبىزدىڭ اۋىلدا جوعارى ءبىلىمدى ازاماتتار ساۋساقپەن سانارلىق بولاتىن. 
"ادام قۇقىعى" دەگەن ۇعىم بارىن اكە-شەشەمىز تۇگىلى، "اۋىل ينتەلليگەنسياسى" - مۇعالىمدەرىمىزدىڭ بىلگەنى كۇماندى.
جالپى، بارشا حالىقتىڭ تۇسىنىگى دە سول دەڭگەيدە..
"ەتى سەنىكى، سۇيەگى مەنىكى" دەگەن زاماننىڭ سوڭىن كورىپ قالعان اعايلارىمىز ءۇشىن وقۋشىعا قول جۇمساي سالۋ تۇككە تۇرمايتىن. تەك مايىپ قىلماسا بولعانى.
كەيبىر بۇزىقتاۋ بالالاردى "اكەڭنىڭ اۋىزى" دەپ ءبىزدىڭ كوزىمىزشە، بوقتاپ ۇرعان اعايلارىمىزدى كوردىك..
وقۋشىنىڭ ءبىرىن اعايلارىمىز كوشەنىڭ قارسى بەتىندەگى دۇكەنگە تەمەكى مەن اراققا جۇمساي سالۋىن ەشكىم ەرسى كورمەيتىن.
ءالى ەسىمدە، ءبىز 4ء-ى وقىپ جۇرگەندە مەنىڭ كلاستاسىمنىڭ 7-كلاستا وقيتىن اپكەسىنە كورشى اۋىلدىڭ بالاسى حات جازىپتى. ول حات كلاسس جەتەكشىنىڭ قولىنا تۇسكەن. الگى اپاي بۇكىل كلاسستىڭ الدىندا وزىنە كەلگەن حاتتى ءالى قولىنا ۇستاپ كورمەگەن ءبۇلدىرشىن قىزعا "جالەپ" دەپ ۇرىسقان.
سول قىز سىركە سۋىن ءىشىپ قايتىس بولدى. 
ءبىز جوعارى سىنىپتا وقىپ جۇرگەندە اۋىلىمىزدىڭ ءبىر جىگىتى پەدينستيتۋت ءبىتىرىپ، وزىمەن بىرگە بىتىرگەن كەلىنشەگىن دە اۋىلعا الا كەلدى. ەكەۋى دە مەكتەپتە ءمۇعالىم. الگى جاس جەڭگە-اپايىمىزدىڭ جاقپاي قالعان بالاعا "ءاتاڭا نالەت موزگا" - دەپ بور لاقتىراتىن ادەتى بار بوپ شىقتى.
مارقۇم بولىپ كەتكەن ۇستازدارىمنىڭ ءارۋاقتارىنان تاعى كەشىرىم سۇرايمىن. سولاردىڭ كوپشىلىگى ءبىزدى "قۇداي جوق" دەپ ۇيرەتتى. وزدەرى ىشتەي سەنەر-سەنبەسىن بىلمەيمىن.
ولاردى كىنالاۋدان اۋلاقپىن. ءبىراق يدەال جاساۋعا دا قارسىمىن
كەڭەستىك يدەولوگيا ولاردى سىندىرىپ، يلەپ وزىنە قۇل ەتىپ قويعان ەدى.
ءقازىر زامان باسقا، زاڭ باسقا..
ءوز قۇقىعىن قورعاي الماعان ءقۇل-مۇعالىم بالاڭىزعا جارىتىپ ءبىلىم مەن تاربيە بەرە قويۋى ەكىتالاي..

(فوتو 1968 جىلى تۇسىرىلگەن)

جازبا ءومىر شىنىبەك ۇلىنىڭ Facebook پاراقشاسىنان الىندى.