اتىراۋدا بەلگىلى اقىن، دراماتۋرگ يران-عايىپتىڭ 70 جىلدىق مەرەيتويىنا وراي “ماڭگىلىك ەلدىڭ التىن ادامى” حالىقارالىق تەاترلار فەستيۆالى باستالدى. 

24 مامىرعا دەيىن جالعاساتىن شاراعا 6 تەاتر قاتىسىپ جاتىر. ولار: مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترى، مۇسىرەپوۆ اتىنداعى مەملەكەتتىك اكادەميالىق بالالار مەن جاسوسپىرىمدەر تەاترى، تالدىقورعان وبلىسى بيكەن ريموۆا اتىنداعى قازاق دراما تەاترى، باتىس قازاقستان وبلىستىق حاديشا بوكەيەۆا اتىنداعى قازاق دراما تەاترى، شىعىس قازاقستان وبلىستىق سەمەيدىڭ مەملەكەتتىك اباي اتىنداعى قازاق مۋزىكالىق دراما تەاترى، اتىراۋ وبلىستىق ماحامبەت اتىنداعى قازاق دراما.

فەستيۆالدىڭ اشىلۋ سالتاناتىندا سويلەگەن وبلىس اكىمى نۇرلان نوعايەۆ وتكىزىلىپ وتىرعان فەستيۆالدىڭ ماڭىزىن ءتۇسىندىردى:

“بۇنىڭ بارلىعى ەلباسىمىزدىڭ “بولاشاققا باعدار: رۋحاني جاڭعىرۋ” اتتى ماقالاسىندا كورسەتىلگەن تاپسىرمالاردى ورىنداۋ ءۇشىن، ياعني ەلىمىزدىڭ رۋحاني جاڭعىرىپ، ساناسىنىڭ وزگەرىپ، جاھاندانۋ پروسەسىندە رۋحاني باسەكەلەستىككە دە ساي بولۋى ءۇشىن ىستەلىپ جاتىر.  ەل ازاماتتارى بۇل كوپتەن كۇتكەن ءىسىمىز ەدى، ەلباسىعا راحمەت دەپ قۇلشىنىپ وتىر. مۇنى ىسكە اسىرماساق وزىمىزگە سىن دەگەن باعىتپەن قىزمەت اتقارىپ كەلە جاتىرمىز”، – دەدى ول.

وبلىس اكىمى مادەنيەت جانە سپورت ءمينيسترى ارىستانبەك مۇحامەديۇلىنا جانە فەستيۆالگە قوناق بولىپ كەلگەن وسى ورگاننىڭ ۆيسە-مينيسترى اقتوتى راحمەتوللاقىزىنا مادەني شارالاردى وتكىزۋدەگى قولداۋى ءۇشىن ەرەكشە ريزاشىلىعىن ءبىلدىردى. اقتوتى راحمەتوللا قىزى مادەنيەت جانە سپورت ءمينيسترىنىڭ مەرەيتوي يەسىنە قۇتتىقتاۋىن وقىپ، فەستيۆالدىڭ ۇيىمداستىرىلۋ ساپاسىن جوعارى باعالادى.

اشىلۋ سالتاناتىندا سويلەگەن تەاتر قايراتكەرى ەسمۇحان وبايەۆ اتىراۋ وبلىسىندا ونەر مەن مادەنيەتكە دەگەن ىقىلاستىڭ ەرەكشە ەكەنىن ايتتى:

• اتىراۋ ەلى بۇگىندە ونەردىڭ مەككەسىنە اينالدى. وسى مەن بىلگەلى بەرى جەتى كوللەكتيۆ گاسترولدىك ساپارمەن كەلىپ، فەستيۆالدەر وتكىزدى. ءبىر دراماتۋرگتىڭ فەستيۆالىن وتكىزۋ بۇل – ۇلكەن جومارتتىق، بۇل – ۇلكەن تاۋەكەل. بۇل – ۇلكەن ماقتانىش. جىل سايىن وتەدى دەپ ايتتىڭىز. بۇل تاريحتا بولماعان نارسە. جىل سايىن بۇل جەردە فەستيۆال وتكىزۋ دەگەن... بۇدان بىلاي وسى جۇرت فەستيۆالسىز كۇن كورە المايتىن بولادى»، – دەدى ول. 

مەرەيتويىن تويلاپ وتىرعان اقىن يران-عايىپ فەستيۆالدى ۇيىمداستىرۋشىلار مەن ونەر سۇيەر قاۋىمعا العىس ايتتى:

“مەن سىزدەرگە باسىمدى يەمىن. اتىراۋىم، ابىز الىبىم، اينىماس التىن قالىبىم، ءتاۋ ەتتىم سەنەن. يساتاي-ماحامبەتىڭنەن اينالدىم. وسى تۇرعان بارلىعىڭىزدان اينالدىم. مىناۋ جەتپىسكە كەلگەن ادام اينالعىش بولادى ەكەن. تابىس تىلەيمىن. قۇداي ءارۋاقىت قولداپ، مىنا ساحنا سىزدەرگە ۇناسىن دەپ تىلەيمىن”، – دەدى ول. 

ايتا كەتەلىك، كسرو مەملەكەتتىك سىيلىعىنىڭ لاۋرەاتى، ليتۆالىق رەجيسسەر يوناس ۆايتكۋس ءتوراعالىق ەتەتىن قازىلار القاسىنىڭ قۇرامىندا قىرعىز رەسپۋبليكاسىنىڭ ەڭبەك سىڭىرگەن ءارتيسى ودۋراكايەۆ  بۋسۋرمان؛ ونەرتانۋشى احمەدياروۆا نۇربيكە؛ جازۋشى-جۋرناليست، «ايقىن» گازەتىنىڭ باس رەداكتورى نۇرتورە ءجۇسىپ؛ جازۋشى-جۋرناليست، حالىقارالىق «الاش» ادەبي سىيلىعىنىڭ لاۋرەاتى، «قازاق ادەبيەتى» گازەتىنىڭ باس رەداكتورى جۇماباي شاشتاي ۇلى؛ ونەرتانۋ ماگيسترى، تەاترتانۋشى ابۋعازييەۆا سالتانات بار.

فەستيۆال اياقتالعان سوڭ اتىراۋ قالاسىندا يران-عايىپتىڭ شىعارماشىلىق كەشى وتەدى دەپ جوسپارلانعان.