بۇگىندە الماتىداعى 89 كوشەنىڭ مۇلدەم اتاۋى جوق. 165 كوشە ەسىمدەرى ەكى رەت قايتالانعان. بۇل تۋرالى  الماتى قالاسى تىلدەردى دامىتۋ، مۇراعات جانە قۇجاتتاما ءبولىمىنىڭ باسشىسى قالاباي وتەپبەرگەن مالىمدەگەن.

 «الماتى قالاسىندا 1848 كوشە بار. وبلىستان الماتىعا قوسىلعان ەلدى مەكەندەردىڭ ەسەبىنەن قالامىزدا 165 كوشە اتاۋى قايتالانىپ كەتەدى. ال تاريحي ەسكىرگەن كوشەلەر بۇگىنگى تاڭدا 50-گە جەتىپ وتىر. جاقىندا پرەزيدەنتتىڭ جارلىعىمەن 16 ساۋىردە الماتى قالاسىنا تاعى دا 23 200 گا جەر قوسىلدى. ول جەردە 27 ەلدى مەكەن بولاتىن بولسا، قازىرگى تاڭدا قالاعا قوسىلعاننان كەيىن ولار شاعىن اۋدان بولىپ اۋىسادى. اتالمىش ەلدى مەكەندەردە 325 كوشە انىقتالدى. بۇل جەرلەردە ورنالاسقان كوشە اتاۋلارى دا قالامىزداعى اتاۋلاردى قايتالاپ وتىر»، - دەگەن قالاباي وتەپبەرگەن.

«الماتى» تەلەارناسىنىڭ حابارىنا ساي، 2013 جىلى 21 قاڭتاردا وسى ونوماستيكا ماسەلەسىنە بايلانىستى زاڭنامالىق اكتىلەرگە وزگەرتۋلەر مەن تولىقتىرۋلار ەنگىزىلدى. سول زاڭنامالىق اكتىلەردىڭ نەگىزىندە قالادا قايتالاناتىن ءبىرقاتار كوشەلەردىڭ اتاۋلارى قايتا قاراستىرىلماق. بۇل تۋرالى قالاباي وتەپبەرگەن: «ءبىز زاڭنامالىق اكتىلەردىڭ نەگىزىندە ءماسليحاتتىڭ تۇراقتى كوميسسياسىنا حات جولدادىق. حات قارالعاننان كەيىن الماتى قالاسى اكىمشىلىگىنىڭ جانىنداعى ونوماستيكالىق كوميسسياعا بەرىلەدى. ول جاقتان قولداۋ تاپقاننان كەيىن ق ر ۇكىمەت جانىنداعى ونوماستيكالىق كوميسسياعا كەلىسىم الۋ ءۇشىن جىبەرىلەدى. ءتيىستى مەكەمەلەردەن، قولداۋ العاننان كەيىن قالامىزداعى كوشەلەردىڭ اتتارى وزگەرتىلەدى»، - دەيدى.

قامشى-اقپارات