«KEGOC»  اكسيونەرلىك قوعامى وزىنەن الىپ، حالىققا ەلەكترقۋاتىن جەتكىزەتىن ۇيىمدارعا 2014 جىلدىڭ 1 قاراشاسىنان باستاپ ءتاريفتى 50 پايىزعا ارتتىراتىنىن مالىمدەپ وتىر. ايدىڭ-كۇننىڭ امانىندا، ەكونوميكا تۇراقتى، باعا ءوسىمسىز بولىپ تۇرعاندا باعانى وسىلاي جۇگەنسىز كوتەرۋگە بولا ما؟ الدە بۇل ەلدەگى ەكونوميكالىق تۇراقتىلىقتى شايقالتۋ ءۇشىن ىستەلىپ جاتقان جىمىسقى شارالار ما؟ ويتكەنى، ەلەكتر قۋاتىنىڭ باعاسى ءبىر جەردە ارتسا بولدى بارلىق ءونىمنىڭ دە، قىزمەتتىڭ دە  باعاسى بىردەن كوتەرىلەتىنى ءسوزسىز عوي. وسىنى بىلە تۇرا بىردەن 50 پايىزعا سەكىرىپ، باسقالار «بۇل بولماسا كۇل بولسىن»، ءوزىمىز بايي تۇسسەك بولدى دەگەن قورقاۋلىق ساياسات كىمنىڭ ويىنا كەلدى ەكەن؟

         شەكتەن شىققان وسى شارانى  «KEGOC» باسشىلارى تابيعي مونوپوليالاردى رەتتەۋ جونىندەگى اگەنتتىكتىڭ 2014 جىلدىڭ 16 مامىرىندا شىققان №105ء-شى بۇيرىعىنا سايكەس «توتەنشە رەتتەگىش شارالار» رەتىندە جاساپ وتىرمىز دەيتىن كورىنەدى. دەمەك، وسى كومپانياعا ەلدەن الا بوتەن توتەنشە جاعدايلار كەلىپ قالعان با؟

وسى ماسەلەلەردى پارلامەنت ءماجىلىسىنىڭ سوڭعى وتىرىسىندا جۇقالاپ جەتكىزە كەلىپ، دەپۋتات نۇرلان جازىلبەكوۆ ءوزىنىڭ پرەمەر-مينيستر ك.ماسىموۆكە ساۋال جولداپ، وسى ماسەلەنىڭ دۇرىستىعىنا باعا بەرۋدى وتىنەتىنىن ايتتى. «توتەنشە رەتتەگىش شارالار» دەگەن «تابيعي مونوپوليالار جانە رەتتەلەتىن رىنوكتار جونىندەگى» زاڭعا سايكەس حالىقتى، قورشاعان ورتانى، ازاماتتاردىڭ دەنساۋلىقتارى مەن مۇلكىن قورعاۋ ءۇشىن وكىلەتتى ورگاننىڭ شەشىمىمەن قابىلداناتىن ەدى عوي. مىنالاردىڭ سونى وزدىگىنەن قابىلداۋىنا قانداي قاجەتتىلىك تۋعان، دەيدى دەپۋتات ساۋالىندا. سونىمەن بىرگە ول بۇل شارا تۇرعىندار ءۇشىن دە ءتاريفتى كوتەرۋگە سوقتىراتىنىن ەسكەرتەدى. دەپۋتاتتىڭ بۇل ساۋالىنا «اق جول» پارتياسى پارلامەنتتىك فراكسياسى وكىلدەرى تەگىس قول قويدى.

ەندى ماسەلەنى پرەمەر-مينيستر ك.ءماسىموۆ تەكسەرتىپ، وڭ شەشىم قابىلدار. كورىنگەننىڭ ويىنا نە كەلسە سونى ىستەپ ويقاستاي بەرۋىنە ۇكىمەت جول بەرمەس دەگەن ۇمىتتەمىز.

ا.الپىسبايەۆ، جۋرناليست