ءومىر دەگەن ۇلى ساپار وسىناۋ،
قىيىندىقتار كەزىكسە دە جاسىماۋ...
ءومىر دەگەن قاراپ جۇرمەي دوسىماۋ،
جۇمىس جاساۋ جان ۇياڭدى اسىراۋ...
ءومىر دەگەن مىنە سولاي جان باعۋ،
ءار قىزىققا تامسانۋ دا تاڭ قالۋ...
ءومىر دەگەن وكىنىش پەن قۋانىش،
ءومىر دەگەن الداۋ جانە الدانۋ...
ءومىر دەگەن ءوز ءوزىڭدى باسقارۋ،
باسقارا الماي كەيدە شالقىپ ماستانۋ...
ءومىر دەگەن بايۋ تويۋ شىرەنۋ،
ءومىر دەگەن تيىن ساناپ اش قالۋ...
ءومىر دەگەن جالىندىرۋ جالىنۋ،
ءومىر دەگەن سىرقاتتان ساۋىعۋ...
ءومىر دەگەن كۇنا جاساپ ارتىنان،
ءتاۋباعا كەپ زاندىلىققا باعىنۋ...
ءومىر دەگەن جىل قارسالىپ جاس قوسۋ،
تانىمايتىن بىرەۋلەر مەن دوستاسۋ...
ءومىر دەگەن ءبىر ادامدى قارسى الىپ،
ءبىر اداممەن ماڭگىلىككە قوشتاسۋ...
ءومىر دەگەن ماقتاۋ دا داتتاۋ دا،
جان دوسىڭا بار سىرىڭدى اقتارۋ...
ءومىر دەگەن كۇن ارتىنان كۇن ءوتۋ،
بىردە جىلاپ ەندى بىردە شاتتانۋ...
ءومىر دەگەن ازۋ توزۋ سەمىرۋ،
جاستىق ءوتىپ قارتتىققا دا جەڭىلۋ...
ءومىر دەگەن ساعىنۋ حام ۇمىتۋ،
ءومىر دەگەن عاشىق بولۋ جەرىنۋ...
ءومىر دەگەن ارعى جاقتى ءسوز قىلۋ،
ءوز وزىڭە ريزا بولۋ جازعىرۋ...
تۋعان كۇندى تويلاپ ءجۇرىپ ءبىر كۇنى،
ءومىر دەگەن اڭداۋسىزدا كوز جۇمۋ...
اۆتورى: ساتاركۋل داۋرەن
