قىرعىزستاننىڭ مەملەكەتتىك ۇلتتىق قاۋىپسىزدىك كوميتەتى (ۇقك) ءبىرقاتار Facebook قولدانۋشىلاردىڭ ىس-ارەكەتتەرى ۇلتارازدىقتى قوزدىرۋعا ارنالعان دەپ تاپقان. بۇل جونىندە ۇقك حابارلادى، دەپ جازادى قامشى اقپاراتتىق اگەنتتىگى.

مەكەمەنىڭ حابارلاۋىنشا، اتالعان قولدانۋشىلار جالال-اباد وبلىسىنداعى ماسى اۋدانىندا بولعان وقيعاعا قاتىستى ۇلتارازدىقتى قوزدىرعان. بۇعان قاتىستى قىرعىزستاننىڭ قىلمىستىق كودەكسى بويىنشا ءىس قوزعالعان. ءقازىر تەرگەۋ جۇمىستارى ءجۇرىپ جاتىر.

مامىردىڭ 17-نەن 18-نە قاراعان ءتۇنى 22 جاستاعى جەرگىلىكتى تۇرعىن اۋىلداسىمەن سوزگە كەلىپ، وعان ءتورت رەت پىشاق سۇعىپ، قاشىپ كەتكەن. 20 مامىردا زارداپ شەگۋشىنىڭ تۋىستارى پوليسيا عيماراتىنىڭ جانىنا كەلىپ، قاشىپ كەتكەن جىگىتت ۇستاۋدى تالاپ ەتكەن. كەيىننەن كۇدىكتىنى قىرعىز -تاجىك شەكاراسىندا تۇتقىنداعان. وعان بۇزاقىلىق جاسادى دەگەن ايىپ تاعىپ، ەكى اي مەرزىمگە قاماۋعا العان.

الەۋمەتتىك جەلىلەردە بۇل وقيعا ۇلكەن پىكىر-تالاس تۋعىزدى. تىپتەن كەيبىر قولدانۋشىلارعا ارنايى قىزمەت قىلمىستىق ءىس قوزعادى.

دەرەككوز: centralasian.org

شولۋشى: گۇلىم جاقان