كەيدە ۇلكەن كىسىلەردەن گورى بۇلدىرشىندەردىڭ اقىلىنا، دانالىعىنا قايران قالاسىڭ. ومىرگە ەندى عانا قادام باسىپ كەلە جاتقان كىشكەنتاي بالاقايعا قاراپ، ءوزىڭدى تاربيەلەيسىڭ، بوي تۇزەيسىڭ. 6 جاستاعى ەلەنا دەسسەريچتىڭ نەبارى 6 جىلعى ءومىرى ادامزاتقا عاسىرلار بويى ۇلگى بولىپ قالارى ءسوزسىز.

ءوزىنىڭ ولەتىنىن بىلگەن 6 جاسار قىز ءۇيدىڭ ءار بۇرىشىنا وتباسىنا ارنالعان حاتتار قالدىرعان. حاتىندا ءبۇلدىرشىن جۇرەكتىڭ سۋرەتىن سالىپ، اكەسىنە، اناسىنا، سىڭلىسىنە دەگەن ماحابباتىن جەتكىزدى.

ەلەنا دەسسەريچ اتتى ءبۇلدىرشىننىڭ ميىندا قاتەرلى ىسىكتىڭ بارى انىقتالعاندا، جاسى نەبارى 6-دا ەدى. بىرنەشە ايى عانا قالعانىنان حاباردار قىز ءوزىنىڭ ولىمىنەن كەيىن وتباسى قۋانىپ قالسىن دەگەن نيەتپەن بىرنارسە قالدىرماق بولادى. ول ءۇشىن 100-گە جۋىق حات جازىپ، ءۇيدىڭ ءار بۇرىشىنا تىعىپ قويدى.

ەلەنانىڭ ماحابباتقا تولى حاتتارى سورەلەردە، كىتاپتاردىڭ بەتتەرىندە، قوراپتاردا جاتتى. ءار حاتىندا كۇلكى مەن جۇرەكتەردىڭ سۋرەتى سالىنىپ، «مەن سىزدەردى جاقسى كورەمىن، انا، اكە، گرەيس»، «اۋرۋعا شالدىققانىم وكىنىشتى» دەپ جازىلعان.

«ەلەنا اقىلدى قىز بولاتىن. وزىنەن كىشى قىزدارعا كومەكتەسىپ، ۇلكەندەردىڭ قينالعانىن كورسە، جۇباتىپ جۇرەتىن» دەيدى ەلەنانىڭ اكەسى.

ەلەنانىڭ اۋرۋى قاتەرلى ىسىكتىڭ سيرەك كەزدەسەتىن تۇرلەرىنە جاتاتىن، ول كەزدە اۋرۋعا شيپا بولاتىن دارى-دارمەكتەر دە بولماعان. اكەسىنىڭ ايتۋىنشا، قىز مۇنىڭ ءبارىن جاقسى بىلگەن، سەزگەن، الايدا ءوزى ءۇشىن ەمەس، ءسىڭلىسى ءۇشىن ۋايىمدايتىن.

دەرت قىزدى كۇننەن كۇنگە سولدىرا بەردى. العاشىندا داۋسىنان ايىرىلدى، ءسويتىپ ءجيى تالماسى ۇستاپ قالاتىن بولدى، ءبىراق بۇل قيىندىقتار قىزدىڭ حات جازۋىنا بوگەت كەلتىرگەن جوق. ەلەنانىڭ قۇرمەتىنە اتا-اناسى وزگە قاتەرلى ىسككە شالدىققان بالالار ءۇشىن قايىرىمدىلىق قورىن اشتى.

شولۋشى: گۇلىم جاقان