قازاقستان كەدەندىك كەدەرگىلەردى الىپ تاستاپ، قىتايدان كەلەتىن تۋريستەرگە ۆيزا بەرۋ ءراسىمىن جەڭىلدەتتى. بۇل جىلىنا بەس ميلليون ءاۆتوتۋريستىڭ ەلىمىزگە ەش تەجەۋسىز كەلۋىنە مۇمكىندىك تۋعىزادى.

كەشە، 8 ماۋسىم كۇنى، 18 ادامنان تۇراتىن اۆتوتۋريستەر توبى 5 اۆتوۇيمەن قازاقستان-قىتاي شەكاراسىنان ءوتىپ، EXPO-2017 كورمەسىنە بەت الدى. كورمەگە دەيىن ولار الماتى قالاسى مەن وبلىسىن ارالاپ، بالقاش كولىنىڭ بويىمەن قاراعاندى مەن استانا قالالارىنا بەت الادى. سونداي-اق ولار استانا قالاسىنداعى EXPO-2017 كورمەسىن تاماشالاپ، كوكشەتاۋ قالاسىن، ششۋچە-بۋراباي ايماعى مەن شىعىس قازاقستان اۋماعىن ارالاۋدى جوسپارلاپ وتىر.

تۋريستەردىڭ قازاقستان تەرريتورياسىنا اۆتوكەرۋەن ارقىلى كەلۋى ەلىمىزدەگى ۆيزا بەرۋ مەن كەدەندىك راسىمدەردى وڭتايلاندىرۋ جولىنداعى قادامدارىنىڭ ءبىرى بولا تۇرىپ، ەلدەگى يندۋستريا سالاسىنىڭ دامۋىنا ءوز سەپتىگىن تيگىزەدى.

«بۇعان دەيىن ءبىز ۇلكەن توپ تۋريستەردى كىرگىزە المايتىن ەدىك. سەبەبى ولاردىڭ ءارقايسىسى بولەك  ۆيزا الۋ راسىمدەرىنەن ءوتۋ كەرەك ەدى. بۇل 200 ادامنان تۇراتىن توپ ءۇشىن مۇمكىن ەمەس ەدى. ال ءقازىر ءبىز ءبىرىڭعاي توپتىق ۆيزا راسىمدەي الاتىن بولدىق. بۇل ايتارلىقتاي ۋاقىتتى ۇنەمدەتەدى جانە دە قازاقستاننىڭ تۋريستىك باعىت رەتىندە تارتىمدىلىعىن ارتتىرادى. وعان قوسا، كولىكتەردى كەدەن ارقىلى كىرگىزۋ ءراسىمى دە جەڭىلدەتىلدى. وسى توپپەن ءبىز بارلىق راسىمدەردى 2 ساعاتتاعا-اق وتتىك. مۇنىڭ ءبارى قازاقستانداعى تۋريزم سالاسىنىڭ دامۋىنا ۇلكەن ۇلەس قوساتىنى ءسوزسىز. ال كولىك كەرۋەنى ءتۋريزمى تۋرالى ايتاتىن بولساق، وسى جازدا ءبىز قازاقستاننىڭ بارلىق اۋماقتارىنا ساپار شەگەتىن 400-500-گە جۋىق اۆتوكولىكتى كۇتۋدەمىز»، - دەيدى وتاندىق تۋريزم سالاسىنداعى ساراپشى ايا قۇساينوۆا.

ساراپشىنىڭ ايتۋىنشا، قىتايدا تەك قانا اۆتوۇيمەن ساپار شەگەتىن تۋريستەر سانى جىلىنا 5 ميلليونعا جەتەدى. تۋريزم جانە سىرتقى بايلانىستار باسقارماسىنىڭ باعالاۋىنشا، وسىنداي تۋريستىك باعىتتاردى ودان ءارى دامىتۋ ءۇشىن كەمپينگ پەن اۆتوۇيلەرگە ارنالعان تۇراقتاردىڭ ينفراقۇرىلىمىنا ينۆەستيسيا تارتۋ قاجەت. الماتى قالاسىنىڭ اكىمدىگى مەملەكەتتىك جانە جەكە-مەنشىك سەكتورلاردىڭ ارىپتەستىگى اياسىندا اۆتوۇيلەرگە ارنالعان ارنايى تۇراقتاردى دامىتۋ مۇمكىندىگىن قاراستىرىپ وتىر.