ءۇندىستان مەن پاكىستان شىۇ-عا مۇشە بولۋ ءۇشىن بارلىق شارتتاردى ورىنداپ، قاجەتتى پروسەدۋرالاردى اياقتادى. بۇل تۋرالى بۇگىن ەلوردادا ءوتىپ جاتقان شىۇ-عا مۇشە مەملەكەتتەر باسشىلارى كەڭەسىنىڭ كەڭەيتىلگەن وتىرىسىندا رەسەي پرەزيدەنتى ۆلاديمير پۋتين ايتتى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.
«بۇگىن شىۇ جاڭا تولىق قۇقىلى مۇشەلەرمەن تولىعادى. بۇل مەملەكەتتەردى قابىلداۋ پروسەسىن ىسكە قوسۋ تۋرالى شەشىم رەسەيدىڭ ءتوراعالىعى كەزىندە 2015 جىلى ۋفادا وتكەن سامميتتە قابىلدانعان بولاتىن. 2 جىلعا جەتپەيتىن ۋاقىتتىڭ ىشىندە ءۇندىستان مەن پاكىستان بارلىق شارتتاردى ورىنداپ، قاجەتتى پروسەدۋرالاردى اياقتادى. ەندىگى ۋاقىتتاعى ءبىزدىڭ ماقساتىمىز جاڭا سەرىكتەستەردىڭ شىۇ اياسىنا بەيىمدەلۋىنە كومەك كورسەتۋ بولماق»، - دەدى ۆلاديمير پۋتين.
ول شىۇ-نىڭ كەڭەيۋى ونىڭ ساياسي، ەكونوميكالىق جانە گۋمانيتارلىق سالالارداعى قۋاتى مەن ىقپالىنىڭ ارتا تۇسۋىنە مۇمكىندىك بەرەتىنىن ايتتى.
«ءبىز بىرلەسە وتىرىسىپ تاياۋ شىعىستاعى، ونىڭ ىشىندە سيرياداعى وڭىرلىك جانجالداردى رەتتەۋدەگى كۇش-جىگەرىمىزدى بىرلەسە وتىرىپ جانداندىراتىندىعىمىزعا سەنىمدىمىن. سوڭعى ۋاقىتتا سيريالىق داعدارىستىڭ دامۋىندا كوڭىلگە سەنىم ۇيالاتىن مۇمكىندىكتىڭ پايدا بولعانىن اتاپ وتكىم كەلەدى. بۇل رەسەي، تۇركيا جانە يراننىڭ كومەگىمەن وسى جەردە، استانادا سيريا بويىنشا حالىقارالىق كەزدەسۋدىڭ باستالۋىمەن تىكەلەي بايلانىستى. ەندى سونىڭ نەگىزىندە اسكەري ءىس-قيمىلدى توقتاتۋعا جانە جەنيەۆاداعى كەلىسسوزدەر پروسەسىنە سەرپىن بەرۋگە شىنايى مۇمكىندىك پايدا بولىپ وتىر»، - دەدى پۋتين.
