اتىراۋ وبلىسى يساتاي اۋدانىندا قازاقستان رەسپۋبليكاسى اكىمشىلىك قۇقىق بۇزۋشىلىق كودەكسىنە بايلانىستى ءىس قارالعاندىعى تۋرالى بەلگىلى بولدى. بۇل تۋرالى قامشى اقپاراتتىق اگەنتتىگى اۋداندىق سوتتىڭ باسپا ءسوز قىزمەتىنە سىلتەمە جاساپ حابارلايدى.
مالىمەتتەرگە سۇيەنسەك، كەشكى نامازدان كەيىن يساتاي اۋدانىنداعى «زينەدەن اتا» اتىنداعى مەشىتتە كوپشىلىكتىڭ كوزىنشە نايب يمامى باس يمامعا ءوزىنىڭ نارازىلىعىن بىلدىرگەن. ۇرىسىپ كوڭىل تولماۋشىلىعىن بىلدىرگەن نايب يمامنىڭ بارلىق ايتقان سوزدەرىن باس يمام تەلەفون كامەراسىنا ءتۇسىرىپ العان.
وسىعان اشۋلانعان نايب يمام ودان ۇيالى تەلەفونىن تارتىپ الماقشى بولىپ، ونى كەۋدەسىنەن ۇرعان.
مەشىتتەگى ادامدار ەكى يمام اراسىنداعى داۋدى باسەڭدەتۋگە تىرىسىپ ەكەۋىن اجىراتقان. سوت وتىرىسىندا نايب يمام ءوزىنىڭ كىناسىن مويىنداپ باس يمامنان كەشىرىم سۇراعان. نايب يمام سوت شەشىمىمەن اكىمشىلىك جاۋاپقا تارتىلعان.
شولۋشى: نازەركە مۇسا
