قازاقستان رەسپۋبليكاسى ينۆەستيسيالار جانە دامۋ مينيسترىلىگى سايتىنداعى اقپارات بويىنشا، ق ر ۇكىمەتى جانىنداعى رەسپۋبليكالىق ونوماستيكالىق كوميسسيانىڭ 2016 جىلدىڭ 1 قاراشاسىندا وتكەن كەزەكتى وتىرىسىندا قازاقستانداعى تەمىرجول ستانسيالارىنىڭ اتاۋىن قاراۋ ماسەلەسى كوتەرىلىپ، وندا كوميسسيا مۇشەلەرىنىڭ شەشىمىمەن 90 ستانسيانىڭ اتاۋى جاڭارتىلعانى تۋرالى جازىلعان ەدى. ءبىراق سول اتاۋلار ءالى جاڭارتىلماعان سياقتى. الەۋمەتتىك جەلىدە پويىز بيلەتتەرىندە قالا اتتارى مەن بەكەت اتتارىنىڭ، ادام اتتارىنىڭ ورىسشا جازىلۋىنا نارازىلىق بار.

جاڭارتىلماعان بيلەتتەگى تاڭبالار عانا ەمەس. رۋحاني جاڭعىرىپ جاتىرمىز، EXPO-مىزدىڭ تاقىرىبى دا ەنەرگيالىق جاڭعىرۋ. الايدا تاۋەلسىزدىك العانىمىزعا شيرەك عاسىردان اسسا دا سانامىز جاڭعىرا الماي جاتىر. نەگە ولاي تاۋسىلامىز؟ سەبەبى قازاقستاندا كولىك قاتىناسىنا تيەسىلى اتاۋلار ءالى جاڭالانباعانىمەن قويماي، جاڭا قوسىلعان پويىز اتاۋلارىن دا سوۆەتتىك سارقىنشاق ەسىممەن اتايدى ەكەنبىز.

قازاقستان ارناسىنىڭ باستى اقپارات باعدارلاماسى جۇرگىزۋشىسى وسىعان بايلانىستى الەۋمەتتىك جەلىدە ماسەلە كوتەردى.

«ەكسپو-2017 كورمەسىنىڭ وتكىزىلۋىنە وراي قوسىمشا پويىزدار اشىلىپتى. سونىڭ ءبىرى تارازدان استاناعا قاتىنايتىن پويىزدى 239/240-شى "دجامبۋل-استانا" دەپ اتاپتى. تاۋەلسىزدىك العان العاشى جىلدار-اق تۇزەتىلگەن، 20 جىلدان بەرى ۇمىتىلا باستاعان بۇل اتاۋدى "جولاۋشىلار تاسىمالى" اق قانداي ماقساتپەن "جاڭعىرتىپ" وتىر؟ "كومپيۋتەر قازاق ارىپتەرىن تانىمايدى" دەگەن باياعى سىلتاۋلار ەندى ايتىلمايتىن شىعار. ەندەشە، قانداي سەبەپ بولۋى مۇمكىن؟؟؟»، - دەپ ساۋال تاستادى دانيار مەنيلبەكوۆ.

تەمىر جول، اۋە تاسىمالى سالاسىنداعى ولقىلىق ءبىر ول ەمەس. الەۋمەتتىك جەلىدە الماتى-استانا اراسىنداعى كولىك تاسىمالى باعاسىنىڭ وسۋىنە نارازىلىق كوپ. بيلەتتىڭ جەتىسپەۋشىلىگى ۇلكەن پروبلەماعا اينالعان.

بولاشاق رەسپۋبليكالىق قوزعالىسى جەتەكشىسى داۋرەن بابامۇراتوۆ وسىعان بايلانىستى الەۋمەتتىك جەلىدە پوست جازدى.

«ءبارى دە تۇسنىكتى. ەكسپو-نىڭ كەرەمەت اشىلۋىمەن ءبارىڭىزدى قۇتتىقتايمىن. ءبىراق سۇراۋىم بار، ەكسپو-عا 1،5 ميلليون شاماسىندا بيلەت ساتىلدى. كوپتەگەن بيلەتتى باسقا قالالاردىڭ تۇرعىندارى ساتىپ العانى بەلگىلى. الايدا پويىز بيلەتتەرى ءبىر اي بۇرىن جەتىسپەي جاتسا، ۇشاق ءۇش قونىپ جەتسە، تراسسانىڭ قورقىنىشتى جاعدايى بولسا بەلگىلى، ءبىز استاناعا قالاي جەتەمىز؟ ءالى دە كەش ەمەس، قوسىمشا پويىزدار مەن ۇشاقتار شىعارىڭىزدار»، - دەپ جازدى بابامۇراتوۆ ءتيىستى مەكەمەلەردى بەلگىلەپ.

EXPO دەپ ەنتىككەندەردىڭ ەكسپو وتكەندە «تۋريستەردىڭ اقشاسىنا قارىق بولاسىڭدار» دەپ كەلە جاتقانىنا ءبىراز جىل بولدى. قارا حالىق سول ەكسپو-عا بارىپ قالتاسىنداعى قاراجاتىن توگىپ بەرمەسە، ۋىستاپ الىپ كەتپەيتىنى بەلگىلى. كەرىسىنشە ۋىستاپ اقشا تاباتىن انە سول «قازاقستان تەمىر جولى»، «Air Astana» سياقتى الپاۋىت كومپانيالار. الايدا ولاردىڭ حالىقتىڭ ىڭعايىنا جىعىلاتىن، مەملەكەتتىڭ ءتىلىن، تۇرعىندارىن قۇرمەتتەيتىن ويى كورىنبەيدى.

اقان بەكتاس