«قازاقستان» رترك اق جانە «Hunan» تەلەراديوكورپوراسياسى 2017 جىلدىڭ 9 ماۋسىمىندا تەليەۆيزيا سالاسىندا ىنتىماقتاستىق پەن ءوزارا كەلىسىم ورناتۋ تۋرالى مەموراندۋمعا قول قويدى.
Hunan Television قىتايداعى كورسەتىلىمى ەڭ جوعارعى تەلەارنالاردىڭ اراسىندا ەكىنشى ورىندا تۇر. جۇڭگو حالىق رەسپۋبليكاسىنىڭ ۇلكەن بولىگىن عانا قامتىپ قويماي، گونكونگ، ماكاو سياقتى ارنايى اكىمشىلىك اۋداندار مەن تايۆان ارالىنا دا تاراتىلادى.
سونىمەن قاتار، «قازاقستان» رترك اق باعدارلامالارى مەن جوبالارى «Mango TV» ينتەرنەت ارناسىندا كورسەتىلەدى دەپ جوسپارلانۋدا. ايتا كەتسەك، «Mango TV» ءوز كورەرمەندەرىنە كونتەنتتىڭ بارلىق جانرىن ۇسىنادى. ولاردىڭ ىشىندە ءتۇرلى فيلمدەر، تەلەحيكايالار، مۋزىكا، مۋلتفيلمدەر جانە ويىن-ساۋىق باعدارلامالار مەن قاتار «Hunan» تەلەراديوكورپوراسياسى مەن Hunan Satellite TVء-دىڭ اۆتورلىق باعدارلامالارى دا كورسەتىلەدى. 2016 جىلدىڭ كورسەتكىشىنە قاراعاندا، «Mango TV» ينتەرنەت ارناسىنا 39 ميلليوننان استام بەلسەندى قولدانۋشىلار تىركەلگەن.
جوعارىدا ايتىلعانداي، ەكى كورپوراسيا اراسىنداعى ىنتىماقتاستىق شەڭبەرىندە جاڭا مۋزىكالىق جوبانى بىرلەسىپ شىعارۋ جوسپارلانىپ وتىر. ماۋسىم ايىنان باستاپ، تەحنيكالىق - ۇيىمداستىرۋشىلىق ماسەلەلەر بويىنشا قىزمەت توپتارى مەن شىعارماشىلىق ۇجىمنىڭ قۇرامىنداعى پروديۋسەرلەر، رەجيسسەرلەر، وپەراتورلار ءوز جۇمىسىنا كىرىسەتىن بولادى.
Hunan تەلە-راديو حابارلارىن تاراتۋ كورپوراسياسىنىڭ پرەزيدەنتى ليۋي حۋانبين: «مۋزىكا مەن تەلەارنا ەكى ەل اراسىنداعى دوستىقتى ودان ءارى نىعايتادى» دەپ ايتتى.
سونداي-اق، 2018 جىلدان باستاپ، جىل سايىنعى حالىقارالىق Taklimakan Rally» جول تالعامايتىن موتوسيكلدەر جارىسىنىڭ ءتۇسىرىلىمى قازاقستان رەسپۋبليكاسىنىڭ اۋماعىندا جۇزەگە اسپاق.
2005 جىلدان باستاپ «Taklimakan Rally» قىتايداعى ەڭ بەدەلدى موتوسيكلدەر جارىسى بولىپ سانالادى جانە 2012 جىلى حالىقارالىق اۆتوموتوسپورت فەدەراسياسىنىڭ ستاتۋسىن العان. بۇل جوبا قازاقستاندىق كونتەنتتى جۇڭگو ەلىنە كەڭىنەن شىعارۋدى جانە ءتۋريزمدى دامىتۋدى كوزدەيدى.
"اتالعان كەلىسىمدەر وتاندىق كونتەنتتى شەتەلدىك تەليەۆيزيالىق نارىققا شىعارۋ ءۇشىن باعىتتالعان. "Hunan TV" تەلەارناسىمەن ورناتىلعان ىنتىماقتاستىق «قازاقستان» رترك اق اۋديتورياسىن كەڭەيتۋگە مۇمكىندىك بەرەدى، - دەيدى كورپوراسيا باسقارماسىنىڭ ءتوراعاسى ەرلان قارين.
