12 ماۋسىم كۇنى Family Village كوتتەدج قالاشىعىندا قازان حاندىعىنىڭ حانشايىمى سۇيىنبيكە اتىنداعى جاڭا كوشە اشىلدى، دەپ جازادى قامشى اقپاراتتىق اگەنتتىگى. سالتاناتتى شاراعا قالا اكىمى اسەت يسەكەشيەۆ پەن تاتارستان رەسپۋبليكاسىنىڭ پرەزيدەنتى رۋستام ميننيحانوۆ قاتىستى. بۇل جايىندا قالا اكىمدىگىنىڭ رەسمي سايتى حابارلايدى.
– بىلتىرعى جىلدىڭ قازان ايىندا ءبىز استانادا تاتارستان ۋاكىلدىگىنىڭ مەكەمەسىن سالتاناتتى تۇردە اشقان بولاتىنبىز، ال بۇگىن حانشايىم سۇيىنبيكە اتىنداعى كوشە اشىلىپ جاتىر. بۇل – ورتاق تاريحي تامىردىڭ تەرەڭدىگى مەن حالىقتار اراسىنداعى بەرىك دوستىقتىڭ نىشانى دەپ سانايمىن. ەلوردا تۇرعىندارىن جانە تاتار سەرىكتەستەرىن بۇگىنگى ماڭىزدى وقيعامەن قۇتتىقتايمىن، - دەدى استانا قالاسىنىڭ اكىمى اسەت يسەكەشيەۆ.
حانشايىم سۇيىنبيكە كوشەسى – وسىمەن ەلوردادا تاتار حالقىنىڭ وكىلدەرىنە بەرىلگەن ەكىنشى كوشە. «سارىارقا» اۋدانىندا كەڭەس وداعىنىڭ باتىرى، تاتار اقىنى، مۇسا جالەل اتىنداعى كوشە بار.
- ءبىز بۇگىن بۇرىنعىدان دا جاقىنداي تۇستىك. ءبىز اعايىندى حالىقپىز، بۇل كوشەنىڭ اشىلۋى – اسا ماڭىزدى ءارى تاريحي وقيعا. ءبىزدىڭ استانامىزدا نۇرسۇلتان نازاربايەۆ اتىنداعى تاماشا كوشە بار. وسىنداي قادامدار ءبىزدى جاقىنداستىرا تۇسەرى ءسوزسىز. قازاقستان پرەزيدەنتىنە، استانا قالاسىنىڭ اكىمى اسەت يسەكەشيەۆكە جانە حانشايىم سۇيىنبيكە اتىنداعى كوشەنىڭ اشىلۋىنا شەشىم قابىلداعان بارلىق تۇلعالارعا العىسىمىز شەكسىز. دوستىعىمىزدى نىعايتاتىن وسىنداي مۇمكىندىكتەردىڭ بولعانىنا قۋانىشتىمىن. بارلىق قازاقستاندىقتاردى ەكسپو كورمەسىنىڭ اشىلۋىمەن قۇتتىقتايمىن جانە الەمدىك دەڭگەيدەگى شارانىڭ لايىقتى وتۋىنە تىلەكتەسپىن، - دەدى تاتارستان رەسپۋبليكاسىنىڭ پرەزيدەنتى رۋستام ميننيحانوۆ.
حانشايىم سۇيىنبيكە اتىنداعى كوشەنىڭ اشىلۋىنا حالىقارالىق «الاش» ادەبي سىيلىعىنىڭ يەگەرى، ەڭبەك سىڭىرگەن مادەنيەت قايراتكەرى، قازاقستان جازۋشىلار وداعىنىڭ مۇشەسى شاربان بەيسەنوۆا، اقىن، فيلولوگيا عىلىمدارىنىڭ دوكتورى جانات اسكەربەككىزى مۇرىندىق بولدى. حانشايىمنىڭ ءمۇسىنىن قازاقستان رەسپۋبليكاسىنىڭ ەڭبەك سىڭىرگەن قايراتكەرى، تاتارستان رەسپۋبليكاسىنىڭ حالىق سۋرەتشىسى، قازاقستان مەن تاتارستاننىڭ مەملەكەتتىك سىيلىقتارىنىڭ لاۋرەاتى، رەسەي جانە جۇڭگو حالىق رەسپۋبليكاسىنىڭ سۋرەتشىلەر اكادەمياسىنىڭ قۇرمەتتى مۇشەسى كامىل مۋللاشيەۆ دايىندادى.
