قازاقستان-دانيا قۇراما كوماندالارى اراسىندا الماتىدا وتكەن ويىن وسىنداي ويعا جەتەلەيدى. وڭباي جەڭىلدىك.
نەگە؟ جاسىل الاڭدا دوپ تەبەتىن قازاق بالاسىنىڭ قاراسى كوبەيىپ، قۇراما كوماندانىڭ جەيدەسىن كيگەن جىگىتتەردىڭ توبە كورسەتۋى بارشا جانكۇيەردى قۋانىشقا بولەپ ءجۇر. ريزا بولاسىڭ. كەزىندە بەلگىلى سپورت ءجۋرناليسى نەسىپ جۇنىسبايەۆ تالاي مارتە ماسەلە كوتەرىپ، شىرىلداپ ءجۇرىپ «نامىس» دەگەن كوماندا قۇرۋعا اتسالىستى. وزگەلەر ۇرشىقشا ۇيىرەتىن الا دوپتى ءبىزدىڭ قاراكوز ۇلدار دا مەڭگەرە الادى دەگەن ماقتانىش سەزىمى ورنادى كەۋدەمىزدە. ەندى بۇگىن قۇدايعا شۇكىر، ول ارمانىمىز ورىندالدى.
ءبىراق «قوبىلاندى باتىر» جىرىنداعى تايبۋىرىلدىڭ باپتاۋىنىڭ ءبىر كۇنى كەم بولعانى سياقتى ءبىزدىڭ فۋتبولشىلاردىڭ، اسىرەسە، قازاق جىگىتتەرىنىڭ ۇستامسىزدىعى ۇدايى كوزگە ۇرىپ تۇرادى.
قازاقستان چەمپيوناتىندا تالاي مارتە كۋا بولىپ ءجۇرمىز، جوق جەردەن قورازدانىپ، قارسى كوماندانىڭ ويىنشىسىن كەۋدەمەن قاعىپ، ەدىرەڭدەپ شىعا كەلەتىن ويىنشىلار از ەمەس. وتە جاعىمسىز كورىنىس. سول ادەت قازاقستاننىڭ ۇلتتىق قۇراما كومانداسىنا شاقىرىلعان جىگىتتەردىڭ بويىنان ءجيى كورىنەدى.
دانيامەن بولعان كەزدەسۋدە دە سولاي بولدى. ءبىزدىڭ كوماندا ءتاپ-تاۋىر وينادى. ءبىراق ءبىز ءسوز ەتىپ وتىرعان پسيحولوگيالىق السىزدىك تىعىرىققا تىرەدى. بىردە تاڭات نوسەربايەۆ، ەندى بىردە سۇيىنبايەۆ دات جىگىتتەرىمەن جاعا جىرتىسۋعا شاق قالدى. باۋىرجان يسلامحان شىنتاقپەن دات ويىنشىسى ۆيلليام كۆيستتىڭ جاعىنان قاعىپ جىبەرىپ الاڭنان قۋىلدى. ارينە، دانيا ويىنشىلارى دا قيت ەتسە تورەشىگە شاعىمدانىپ، قۋلىق جاساپ جاتتى. ولاردا شارۋامىز جوق.
ايتپاعىم، ەل نامىسى ساراپقا سالىنىپ جاتقان كەزدە ءبىزدىڭ ويىنشىلار جاۋاپكەرشىلىكتى سەزىنۋى كەرەك ەدى. ولاردىڭ جەكە باسىنىڭ نامىسى ەل نامىسىنان بيىك ەمەس. قىزبالىق كىمدە جوق. وسىنى ءتۇسىنۋى كەرەك قوي. يسلامحان قانشا جەردەن شەبەر ويىنشى بولسا دا ارتىندا ەل تۇرعانىن، قازاقستاننىڭ ابىرويى ءۇشىن وينايتىنىن ەسكەرمەدى. جىگىتتەر نامىستى ەكەنىن دورەكىلىكپەن ەمەس، ويىنىمەن كورسەۋى كەرەك.
ءتۇبى مۇنداي «سىرقاتتى»، قازاق فۋتبولىنان تۇپ-تامىرىمەن جويۋ كەرەك سياقتى. ايتپەسە، ارام ءشوپ سياقتى قاۋلاپ وسە بەرەدى.
عابدۋل مەرقۇرمان
