باسكەتبولشى يگور نانايەۆتىڭ ءولىمى تۋرالى ءىس بويىنشا سوتتالعان بەس ازاماتتىڭ تورتەۋى پەتروپاۆل قالالىق سوتىنا ۇكىمگە قاتىستى اپەللياسيالىق شاعىم ءتۇسىردى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.
سوتتالۋشى ديماش قويباروۆ ۇكىمگە شاعىم بىلدىرمەدى. وبلىستىق سوتتىڭ باسپا ءسوز قىزمەتىنىڭ اقپاراتى بويىنشا، سولتۇستىك قازاقستان وبلىستىق سوتى قىلمىستىق ىستەر بويىنشا سوت القاسىنىڭ ۇكىمىمەن پەتروپاۆل قالالىق سوتىنىڭ 2017 جىلدىڭ 17 ساۋىردەگى ۇكىمى وزگەرىسسىز قالدى. ۇكىم زاڭدى كۇشىنە ەندى.
ەسكە سالايىق، 2016 جىلعى 3 قازاندا تۇنگى ۇشتەردە ءبىر توپ ازامات ەش سەبەپسىز نانايەۆ، ماكەدونوۆ، انتروپوۆتى سوققىعا جىققان. ب.قايباروۆ، ب. ماقاتوۆ، ج.اسكەروۆ، ا. مەڭدىبايەۆ، و. ەلاماننىڭ بىرلەسكەن زاڭعا قايشى ارەكەتتەرىنىڭ سالدارىنان جابىرلەنۋشى نانايەۆ ەسىنەن تانىپ قالعان، ول جابىق مي جاراقاتى، اۋىر دارەجەلى مي جاراقاتى، تورلى قابىق استىنا قان قۇيىلىپ، ميدىڭ ءىسۋى، تومەنگى ەرنى جىرتىلىپ، شىقشىق سۇيەگى زاقىمدانۋى، تاڭداي تىستەرىنىڭ سىنۋى سىندى دياگنوزدارمەن سقو اكىمدىگىنىڭ وبلىستىق اۋرۋحاناسىنا جاتقىزىلدى. 10 قازاندا يگور نانايەۆ ەسىن جيماستان جانساقتاۋ بولىمىندە كوز جۇمدى. جەرگىلىكتى «بارىس» كلۋبىنىڭ مۇشەسىنىڭ ولىمىنە بايلانىستى جۇزدەگەن ادامنان جاۋاپ الىندى.
پەتروپاۆل قالالىق سوتىنىڭ ۇكىمىمەن ديماش قويباروۆ ق ر قك 293-بابى 2-تارماعى 1-تارماقشاسى، 106-بابى 3-تارماعى بويىنشا كىنالى دەپ تانىلىپ، 9 جىلعا جالپى رەجىمدەگى تۇزەۋ كولونياسىنا باس بوستاندىعىنان ايىرىلدى. باۋىرجان ماقاتوۆ ق ر قك 106-بابى 3-تارماعى بويىنشا كىنالى دەپ تانىلدى. وعان جالپى رەجىمدەگى تۇزەۋ كولونياسىندا جازاسىن وتەۋ ءۇشىن 8 جىلعا باس بوستاندىعىنان ايىرۋ جازاسى بەلگىلەندى. ايىپتالۋشى ماقاتوۆ زارداپ شەگۋشى اناتوليي ماكەدونوۆپەن تاتۋلاستى. جانباتىر اسكەروۆ، ءادىل مەڭدىبايەۆ جانە ولجاس ەلامانوۆتار دا 8 جىل جالپى رەجىمدەگى كولونيادا جازالارىن وتەيتىن بولادى.
