اسا تاياعى قولىنان تۇسپەي، “اتتان، قازاققا” باسىپ جۇرەتىن امانتاي قاجى ەكسپو كورمەسىنە كەلگەن. قاتتى سويلەپ، جۇرتتى اۋزىنا قاراتقان قاجىمەن قازاقستاندىقتار عانا ەمەس، شەتەلدىكتەر دە سۋرەتكە تۇسۋگە اسىعىپ ءجۇر دەپ جازادى قامشى اقپاراتتىق اگەنتتىگى  Sputnik قازاقستان سىلتەمە جاساي وتىرىپ.

امانتاي قاجى كورمە اشىلعاننان بەرى وسىندا ءجۇر ەكەن.

“ەكسپو كورمەسىندە ءۇشىنشى كۇن ءجۇرمىن. كورمە كەرەمەت. قازاقستاننىڭ پاۆيلونىندا بولدىم. وزبەكستان، تۇرىكمەنستان، ءازىربايجان، جاپونيا پاۆيلوندارىندا مەنى جاقسى قارسى الىپ، سىي-قۇرمەت كورسەتتى. استانادا مىناداي تاماشا دۇنيەجۇزىلىك توي ءوتىپ جاتىر. مەرەكە قۇتتى بولسىن. پرەزيدەنتىمىزگە ارنايى جۇما كۇنى “حازىرەت سۇلتان” مەشىتىندە باتا وقىدىم. قازاق حالقىنان شىققان ءبىرىنشى ەلباسى، تاۋەلسىزدىكتىڭ تۋىن كوتەرگەن پرەزيدەنتىمىز امان بولسىن!”، — دەدى “اتتان، قازاقستان!” قوزعالىسىنىڭ جەتەكشىسى امانتاي قاجى.

وسىدان كەيىن امانتاي قاجى ادەتىنشە اسا تاياعىن كوككە كوتەرىپ، كىجىنە سويلەپ كەتتى:

“مافيا، كوررۋپسيا جويىلسىن! مەن جاعىمپاز ەمەسپىن! قازاقتىڭ قازىرگى جاعدايىن بىلەسىڭدەر، كوپ باستىقتار ەلىمىزدى توناپ، قاشىپ ءجۇر! نازاربايەۆ سولاردى ۇستاسىن! مىناداي ۇلى بايلىق تەك قانا قازاقستاندا بار! قازاقستان ماڭگى-باقي ۇلى مەملەكەت بولسىن!”.

مۇنىمەن قويماي، امانتاي قاجى ءسوز سوڭىندا قازاق ەلىنىڭ ءانۇرانىن ورىنداپ بەردى. وسىلايشا، “اتتان، قازاققا” باسقان قاجىمەن كورمەگە كەلگەن ۇلكەن-كىشى سۋرەتكە تۇسۋگە اسىقتى. ولاردىڭ اراسىندا شەتەلدىكتەر دە كوپ.

شولۋشى: اسەل وتەشوۆا