الماتىداعى №7 قالالىق كلينيكالىق اۋرۋحاناسىندا حالىق دەنساۋلىعىن جاقسارتىپ، مەديسينالىق كومەكتىڭ قولجەتىمدىلىگىن ارتتىرۋ ماقساتىندا قانداي جۇمىس جۇرگىزىلىپ جاتىر؟ سوڭعى ۋاقىتتا قانداي جاڭا مەديسينالىق ادىس-تاسىلدەر ەنگىزىلدى؟ مىندەتتى الەۋمەتتىك مەديسينالىق ساقتاندىرۋ بويىنشا اۋرۋحانا قىزمەتىندە قانداي وزگەرىس بار؟ وسىنداي وتاندىق مەديسينانىڭ وزەكتى دە ماڭىزدى ساۋالدارىنا جاۋاپ بەرۋ ءۇشىن №7 قالالىق كلينيكالىق اۋرۋحاناسىندا مەديسينا قىزمەتكەرلەرى كۇنىنە وراي جۋرناليستەرگە ارنالعان پرەسس-تۋر ءوتتى. بۇل شارا رەسپۋبليكالىق «كاسىبىڭە باسىمدى يەم» اكسياسى اياسىندا ۇيىمداستىرىلدى.
قازاقستاندىق مەديسينا سالاسىندا جاڭالىق كوپ. 2018 جىلدىڭ 1 قاڭتارىنان باستاپ مىندەتتى الەۋمەتتىك مەديسينالىق ساقتاندىرۋ جۇيەسى قولدانىسقا ەنگىزىلەتىنى بەلگىلى. بۇل رەفورماعا سايكەس، ەمحانالار مەن اۋرۋحانالار اراسىنداعى باسەكەلەستىك ارتىپ، دارىگەرلەردىڭ جاۋاپكەرشىلىگى جوعارىلاي تۇسپەك. وسىعان بايلانىستى اۋرۋحانا ۇجىمى ب ا ق قىزمەتكەرلەرىن وتاندىق مەديسينا سالاسىنداعى سوڭعى يننوۆاسيالىق جاڭالىقتاردان حاباردار ەتىپ، اۋرۋحاناداعى زاماناۋي قۇرال-جابدىقتاردى كورسەتتى.
«ءبىزدىڭ اۋرۋحانا قىزمەتكەرلەرى كۇن-تۇن دەمەي حالىققا جوعارى ساپالى قىزمەت كورسەتۋدى ماقسات ەتەدى. اۋرۋحانا سوڭعى ۇلگىدەگى زاماناۋي قۇرال-جابدىقتارمەن تولىق جابدىقتالعان. سونىمەن قاتار، دارىگەرلەر بىلىكتىلىگىن ارتتىرۋ مىندەتىن دە ەستەن شىعارمايمىز. ساپالى مەديسينالىق كومەك ارقىلى عانا حالىقتىڭ العىسىنا بولەنىپ، كوڭىلىنەن شىعۋعا بولادى»، - دەدى №7 قالالىق كلينيكالىق اۋرۋحانا باس دارىگەرى مارات شادىباي ۇلى.
جۋرناليستەر ءۇشىن ۇيىمداستىرىلعان پرەسس-تۋر بارىسىندا كارديولوگيا مەن گەماتولوگيا بولىمدەرىنىڭ ينتەنسيۆتى ەمدەۋ پالاتالارى اشىلدى.
«بۇل قارقىندى ەمدەۋ پالاتالارىندا وپەراسيادان شىققان ناۋقاستار ەمدەلەدى. پالاتالاردا ارنايى كوپ فۋنكسيونالدى كەرەۋەتتەر بار. كارديومونيتور، وتتەگى، دەفيبريللياتورمەن جابدىقتالعان. ناۋقاستار جەكە مەدبيكەنىڭ قاراۋىندا بولادى. جالپى №7 قالالىق كلينيكالىق اۋرۋحانانىڭ گەماتولوگيا ءبولىمى قان اۋرۋلارىنا شالدىققان ناۋقاستارعا جان-جاقتى كومەك كورسەتىپ كەلەدى»، - دەدى №7 قالالىق كلينيكالىق اۋرۋحانا باس دارىگەرىنىڭ ەمدەۋ ءىسى بويىنشا ورىنباسارى جادىرا ءسىلام قىزى.
بۇدان بولەك، ورتالىقتاندىرىلعان جانە ارنايى وقۋ زالى بار ارحيۆ جۇيەسى مەن Call-ورتالىقتىڭ تۇساۋكەسەرى ءوتتى. Call-ورتالىق حالىق تاراپىنان تۇسكەن كەز-كەلگەن سۇراققا جاۋاپ بەرىپ، ازاماتتارعا دەر كەزىندە كەڭەس بەرىپ وتىرماق.
«Call-ورتالىقتىڭ نەگىزگى مىندەتى – حالىققا ءبىزدىڭ اۋرۋحاناداعى مەديسينالىق قىزمەت جايلى تولىققاندى اقپارات بەرۋ. وعان قوسا، ورتالىققا حابارلاسقان ادامدار وزدەرىنە قاجەت كەڭەس تە الا الادى»، - دەدى №7 قالالىق كلينيكالىق اۋرۋحانا باس دارىگەرىنىڭ ادىستەمەلىك-ۇيىمداستىرۋ ءىسى بويىنشا ورىنباسارى نۇرلان تاڭجارىق ۇلى.
ايتا كەتۋ كەرەك، ورتالىق ستەريليزاسيالاۋ بولىمىندە دە ەۋروستاندارتقا سايكەس جاڭا قۇرىلعىلار ورناتىلعان. جۋرناليستەر وسى اۆتوماتتى تۇردە جۇمىس ىستەيتىن اپپاراتتار جۇمىسىن كورىپ، سيرەك جاسالاتىن وپەراسيالار بارىسىن باقىلاپ، ناۋقاستاردان سۇحبات الدى. ودان بولەك، بۇل كۇنى ب ا ق قىزمەتكەرلەرى دانيادان كەلگەن بىلىكتى نەيروحيرۋرگ ماماننىڭ قازاقستاندا تۇڭعىش رەت ورتالىق جۇيكە جۇيەسى اۋرۋلارىنا مۇلدەم جاڭا ءادىس – كريوانالگەزيانىڭ يننوۆاسيالىق ادىستەرى ارقىلى وپەراسيا جاساۋ بويىنشا شەبەرلىك سىنىبىنا قاتىستى.
زاماناۋي اپپاراتتارمەن قامتاماسىز ەتۋدەن بولەك، تەحنولوگيالىق جاڭالىقتاردى بەس ساۋساعىنداي يگەرگەن ماماندار سانىن كوبەيتۋ دە قولعا الىندى. وسىلايشا حالىق دەنساۋلىعىن جاقسارتىپ، نىعايتۋعا ۇلەس قوسۋعا بولادى. سوندىقتان №7 قالالىق كلينيكالىق اۋرۋحاناسىندا حالىققا الدىن الا دياگنوستيكا جاساۋ جانە ەمدەۋ تۇرلەرى ۇسىنىلادى.
