بەسىنشى سىنىپ وقۋشىسى وستين كينگ حارت وتباسىن اسىراۋ ءۇشىن باقشادا جۇمىس ىستەي باستادى. ەندى ول بۇكىل وتباسىن ازىق-تۇلىك، كوكونىسپەن قامتاماسىز ەتكىسى كەلەدى.

بۇل جاس بالا YouTube پەن Facebook-تە ءوزىنىڭ العىرلىعىمەن تانىلعان.

«مەن انامنىڭ جۇمىس بولمەسىنەن بىرنەشە بۇرشاقتىڭ ءدانىن الدىم. ءبىزدىڭ ۇيدە ول كوپ ەدى. بارلىق وتباسىن تاماقتاندىرۋ ءۇشىن ازىق-تۇلىك ۇيدە جەتىسپەيتىن» دەيدى وستين كينگ حارت.

ءدال وسى كۇن وستين ءۇشىن شەشۋشى ۋاقىت بولدى. ول ءبىر ساتتە ەرەسەكتەردىڭ ومىرىنە قادام باستى. بەسىنشى سىنىپ وقۋشىسى وتباسى اشىقپاۋى ءۇشىن نە ىستەۋ كەرەكتىگىن ءتۇسىندى. ول ءۇيىنىڭ اۋلاسىنا داندەردى وتىرعىزا باستادى.

«مەنىڭ ەگىن شارۋاشىلىعى جونىندە بار بىلگەنىم وسىمدىكتىڭ ءوسۋى ءۇشىن سۋ، كۇن جانە توپىراق قاجەت ەكەنى» دەدى مەكتەپ وقۋشىسى.

ءبىر اپتادان كەيىن تۇيە بۇرشاقتىڭ جاپىراقتارى پايدا بولا باستادى. ودان كەيىن بۇرشاقتىڭ ءوزى دە شىقتى. ەگىن مولىنان شىقتى. وستين بۇرشاقتى ساتىپ، وتباسىن اسىرادى. قىستا ءوستيننىڭ وتباسى سول ناپاقامەن كۇنەلتىپ شىقتى.

ءۇش جىلدان كەيىن ءوستيننىڭ ءوز ۇلكەن باقشاسى بولدى. وندا تەك بۇرشاق قانا ەمەس ءتۇرلى كوكونىستەر بار. ول جەردىڭ قۇنارلى بولۋىن جانە ەگىن ەگۋدىڭ ءتۇرلى قىر-سىرىن مەڭگەرىپ، وزبەتىنشە كوپ ىزدەندى.

جەتكىنشەك بولاشاقتا كىم بولاتىنىن ءقازىردىڭ وزىندە ايقىنداپ الدى. ول ەگىن شارۋاشىلىعىمەن اينالىسىپ، كاسىپكەر اتانعىسى كەلەدى. بولاشاقتا ءوزىنىڭ تابيعي تازا، قۇنارلى كوكونىستەرىمەن بارلىق اۋىل-ايماقتى تاماقتاندىرعىسى كەلەتىنىن ايتادى. سونىمەن قاتار، وستين ەگىننىڭ ۇنەمى مول شىعۋى ءۇشىن نە ىستەۋ كەرەكتىگىن زەرتتەپ ءجۇر. سونى تاجىريبە جۇزىندە كورمەكشى. ەگەر بولجامى راستالسا، يدەياسىن مەملەكەتكە ۇسىنباقشى ەكەن.

ءقازىر 13 جاستاعى بالا ءوزىنىڭ وسىرگەن كوكونىستەرىن ساتىپ قانا قويماي، جاعدايى تومەن وتباسىلارعا ازىق-تۇلىكتى تەگىن تاراتادى ەكەن.

شولۋشى: اسەم المۇحانبەت