20 ماۋسىم مەن 1 شىلدە ارالىعىندا ەلىمىزدە ۇبت وتكىزىلەدى، - دەپ حابارلايدى tengrinews.kz. بيىلعى تەستىلەۋ العاش رەت جاڭا فورماتتا وتەدى. مەكتەپ تۇلەكتەرى تەستتەردى 165 ۇبت وتكىزۋ پۋنكتىندە تاپسىرادى. ۇبت 5 ءپان بويىنشا تاپسىرىلادى: قازاقستان تاريحى، ماتەماتيكالىق ساۋاتتىلىق، وقۋ ساۋاتتىلىعى (20 تاپسىرمادان، شەكتى دەڭگەيى - ءار پاننەن كەمىندە 5 باللدان) جانە تاڭدالعان ماماندىققا سايكەس 2 بەيىندى پاننەن (30 تاپسىرمادان، شەكتى دەڭگەيى 15 باللدان كەم بولماۋى ءتيىس). 120 تەستتىك تاپسىرما بويىنشا تۇلەك ماكسيمالدى 140 بالل الۋى مۇمكىن.

تاپسىرمالاردى ورىنداۋعا 3 ساعات 50 مينۋت ۋاقىت بولىنەدى.  ۇلتتىق تەستىلەۋ ورتالىعىنىڭ مالىمەتىنشە، بيىل ۇبت-عا قاتىسۋعا 92 827 تۇلەك نيەت ءبىلدىرىپ، ارىز جازعان. ولار بيىلعى مەكتەپ بىتىرۋشىلەردىڭ جالپى سانىنىڭ (131 377) 71 پايىزىن قۇراپ وتىر. ۇبت تاپسىرۋعا نيەتتى 69 209 تۇلەك قازاق تىلىندە، ال 23 618 - ورىس تىلىندە تاپسىرادى. ۇبت 165 تاپسىرۋ پۋنكتىنىڭ 1431 اۋديتورياسىندا وتكىزىلەدى. بۇل اۋديتوريالار بايلانىس سيگنالدارىن بوگەيتىن قۇرىلعىلارمەن، مەتالل دەتەكتورلارىمەن، ۇبت بارىسىن باقىلاۋ جانە جازۋ بەينەكامەرالارىمەن، سونداي-اق ينتەرنەت ارقىلى ونلاين تاراتۋ كامەرالارىمەن جابدىقتالعان. اتا-انالارعا ىڭعايلى جاعداي قامتاماسىز ەتۋ ماقساتىندا 108 پۋنكتتەگى ۇبت بارىسى مونيتورعا شىعارىلىپ، كورسەتىلەدى.

ادەتتەگىدەي، ۇبت وتكىزۋ ورىندارىندا مەديسينالىق قىزمەت پەن قۇقىق قورعاۋ ورگاندارىنىڭ وكىلدەرى جۇمىس ىستەپ، اۋىز سۋ جانە تاعام ونىمدەرىن ساتۋ ورىندارى قىزمەت كورسەتەدى. ۇبت بەلگىلەنگەن ءتارتىپ بويىنشا وتكىزىلۋى مەن ەرەجەلەردىڭ ورىندالۋىن قاداعالاۋ ءۇشىن تەستىلەۋ وتكىزىلەتىن پۋنكتتەرگە ق ر بعم تاراپىنان جوو (75 پايىز) جانە كوللەدجدەردىڭ (25 پايىز) وقىتۋشىلارى جىبەرىلدى. ۇيىمداستىرۋ ماسەلەلەرىن شەشۋ ءۇشىن ەل وڭىرلەرىندە جەرگىلىكتى جوو-نىڭ، ءبىلىم بولىمدەرىنىڭ، اكىمشىلىكتەردىڭ، قۇقىق قورعاۋ ورگاندارىنىڭ، قوعامدىق ۇيىمدار مەن ب ا ق وكىلدەرىنەن قۇرالعان مەملەكەتتىك كوميسسيالاردى قۇرۋ قولعا الىندى. 

ق ر بعم بۇيرىعىمەن تەستتىك تاپسىرمالار مەن تەحنيكالىق اقاۋلىقتار جونىندەگى اپەللياسيالىق ارىزداردى قاراستىراتىن رەسپۋبليكالىق اپەللياسيالىق كوميسسيامەن قاتار، جەر-جەردە اپەللياسيالىق كوميسسيالار كۇرىلدى. ءتارتىپ بۇرىڭعىداي: اپەللياسيالىق ارىزدار ۇبت ناتيجەلەرى جاريالاننان كەيىنگى كۇننىڭ ساع 13.00-نە دەيىن قابىلدانىپ، ءبىر كۇنتىزبەلىك كۇن ىشىندە قاراستىرىلادى.  ق ر بعم تەستىلەۋگە ساپالى دايىندىق جۇرگىزۋ ءۇشىن قاجەتتى جاعدايلار جاساپ وتىر. ۇيرەنشىكتى تۇردە، ياعني قاعاز بەتتەرىندە قابىلدانىپ كەلگەن سىناقتىق تەستىلەۋمەن قاتار، بيىلعى جىلدىڭ باسىنان ونلاين-تەستىلەۋدەن ءوتۋ مۇمكىندىگى اشىلدى. ال ماۋسىم ايىنان باستاپ بۇل قىزمەت ءۇشىن اقى تولەۋ ينتەرنەت-بانكينگ ارقىلى جۇرگىزۋ مۇمكىندىگى (كەز كەلگەن بانك كارتاسى ارقىلى، كوميسسياسىز). ايتا كەتەيىك، ەمتيحان ماتەريالدارى قۇپيالىقتى قامتاماسىز ەتۋ نۇسقاۋلىعىنىڭ قاتاڭ تالاپتارىمەن، 99 مىڭ دانا تارالىممەن باسىلىپ، بۋىلعان.

شولۋشى: نازەركە مۇسا