بايلار مەن حالىققا بەلگىلى ادامدار جەكە ءومىرىن قۇپيا ۇستاۋعا تىرىسادى. جابىق ارالداردا دەمالىپ، جەكە ۇشاقپەن ۇشادى. الايدا ولار وزدەرى تۋرالى اقپاراتتىڭ سىرتقا شىقپاۋىن ۇنەمى قاداعالاي المايدى. چارتەرلىك ساپاردا قىزمەت كورسەتەتىن ستيۋاردەسسالار اتالمىش ادامداردىڭ تالاپتارى مەن وعاش قىلىقتارى تۋرالى ايتىپ بەردى.

جەكە اۆياسيادا ۇشۋعا ەكى كۇن قالعاندا بارلىق دايىندىق جۇمىستارى باستالادى. تاپسىرىس بەرۋشىنىڭ تالعامى مەن تالاپتارىنا ساي قاجەتتى زاتتار ساتىپ الىنادى. تاعامدار مەيرامحانادان اكەلىنەدى. كەيدە جولاۋشى تۋرا ۇشاتىن ۋاقىتتا ءوزى الدىن-الا تاپسىرىس بەرمەگەن تاعامدى نەمەسە سۋسىندى ىشكىسى كەلەتىنىن ايتادى ەكەن. مۇنداي ساتتە جولاۋشىنىڭ قالاۋى مىندەتتى تۇردە ورىندالۋى ءتيىس.

ۇشاقتىڭ ۇشۋ ۋاقىتىن كەشەۋىلدەتۋ

كەيدە الدىن-الا كەلىسىلگەن ادام سانى وزگەرىپ كەتەتىن ساتتەر بولادى ەكەن.  ماسەلەن، ۇشاق قىزمەتكەرلەرى ءۇش ادامعا قىزمەت كورسەتۋگە دايىندالسا، ولاردىڭ سانى التى ادامعا كوبەيەدى. ول ۋاقىتتا رەزەرۆتەگى تاعامداردى پايدالانادى. ۇشۋ ۋاقىتىندا تاماق ءبىتىپ قالاتىن كەزدەر دە بولادى.

ستيۋاردەسسالاردىڭ ءبىرى باسىنان وتكەن جاعدايدى ەسكە الدى. بەلگىلى كاسىپكەر ايەل جەكە ۇشاعىمەن ءبىر جەرگە ۇشپاقشى بولعان. ايەل تەك Coca Cola lightء-تى ىشەتىنىن جانە باسقا سۋسىنداردى تۇتىنبايتىنىن ەسكەرتكەن. اتالمىش سۋسىن بىرنەشە ۋاقىتتان كەيىن ءبىتىپ قالعان. ال دىتتەگەن جەرگە جەتۋ ءۇشىن ءالى ءبىراز ۋاقىت كەرەك بولعان. ستيۋاردەسسا قالعان سۋسىنداردى بىر-بىرىنە قوسىپ، سۋمەن ارالاستىرعانىن ايتادى. جولاۋشى ايەل ونى سەزبەگەن. ستيۋاردەسسا ءالى كۇنگە دەيىن سول ارەكەتى ءۇشىن ۇيالاتىنىن ايتادى.

كىممەن جۇمىس ىستەۋ جەڭىل؟

ستيۋاردەسسالار باي مەن حالىققا تانىلعان ادامدارمەن جۇمىس ىستەۋ وڭاي ەكەنىن ايتادى. بۇل اقشا نەمەسە تانىمالدىلىعىنا بايلانىستى ەمەس ەكەنىن ايتادى. سەبەبى، ولار كوپ جاعدايدا ۋاقىتتى ۇيىقتاۋمەن وتكىزەدى. ال ەكونوم-كلاسستا وتىرىپ باراتىن ادامدار وزىنە ەرەكشە قارىم-قاتىناستى قالايدى.

داۋلەتتى جولاۋشىلار وزدەرىنىڭ شەكتەن شىققان تالاپتارىنا جاۋاپ بەرگەن ستيۋاردەسساعا قوماقتى كولەمدە سىياقى تاستاپ كەتەتىن جاعدايلار بولعان.

تانىمال جولاۋشى ۇشۋدان قاتتى قورقادى. ستيۋاردەسسا ۇشۋ ۋاقىتىندا ونى تىنىشتاندىرىپ، قولىنان ۇستاپ، ماڭدايىنداعى تەرىن ءسۇرتىپ وتىرعانى ءۇشىن، وسىنىڭ بارلىعىن سابىرلىقپەن، سىپايى قالىپپەن اتقارعانى ءۇشىن داۋلەتتى ادام وعان پاتەر سىيلاعان ەكەن.

دايىنداعان: اسەم المۇحانبەت