الماتى قالالىق مامانداندىرىلعان اۋدانارالىق اكىمشىلىك سوتىندا ماقسات ۇسەنوۆتىڭ ءىسى قارالدى، - دەپ حابارلايدى قامشى اقپاراتتىق اگەنتتىگى Tengrinews.kz سايتىنا سىلتەمە جاساپ. 

اتىشۋلى ۇسەنوۆ سوت عيماراتىنا 16.00-دە ءبىر پوليسەيدىڭ جانە فورماسىز ەر ادامنىڭ جەتەگىندە كەلدى.

ۇسەنوۆ سوتقا كۇننەن قورعايتىن كوزىلدىرىك كيىپ كەلدى.

جاۋاپ الۋ كەزىندە ماقسات ۇسەنوۆ ءوز ارەكەتىن ءتۇسىندىردى. ىشىمدىك ىشكەن-ىشپەگەنى جايلى سۇراققا ول بىلاي دەپ جاۋاپ قاتتى: "بورتتا ماعان ءبىر ستاقان ۆيسكي قۇيىلدى. "ديۋتي فريدەن" ءبىر شولمەك ۆيسكي ساتىپ الدىم. ءبىراق مەن ونى ىشكەن جوقپىن.

"مەن بىلاپىت ءسوز ايتقان جوقپىن. بورتسەرىككە دە، كوكتىشيەۆكە دە جامان ءسوز ايتپادىم. داۋسىمدى كوتەرگەنىم راس، ءبىراق ول كەزدە ستيۋاردەسسا مەنىڭ سومكەمە قول جۇگىرتتى. بۇل دۇرىس ەمەس، اقشام بار ەدى. سوندىقتان داۋسىمدى كوتەردىم، ءبىراق دورەكى ءسوز سويلەمەدىم. وكىنەتىنىمدى عانا ايتا الامىن"، - دەدى ۇسەنوۆ سوتتا. وسىدان كەيىن ول 9 تاۋلىككە قاماۋعا الۋىن سۇرادى.

ايتا كەتەيىك، جاۋاپ الۋ كەزىندە ماقسات ۇسەنوۆتىڭ قۇرىلىس كومپانياسىندا زاڭگەر بولىپ جۇمىس ىستەپ جاتقانى انىقتالدى. سوتتىڭ شەشىمى بويىنشا، ماقسات ۇسەنوۆ 10 كۇنگە قاماۋعا الىندى.

ەسكە سالايىق، ماقسات ۇسەنوۆ الماتى-بانگكوك رەيسىن ورىنداعان اۋە كەمەسىنىڭ بورتىندا تاباك ءونىمىن قولدانعان، بۇعان ۇلتتىق جانە حالىقارالىق تالاپتار بويىنشا تىيىم سالىنعان.