استاناداعى ەكسپو-دا بولعان امەريكالىق ءتىلشى رەپورتاج جازىپ، وندا استانانى "ايدالاداعى ەلوردا" دەپ اتاپ، كورمەنىڭ ءوزىن قىزىقسىز، ءارى قاڭىراعان بوس دەپتى، دەپ حابارلايدى قامشى اقپاراتتىق اگەنتتىگى Sputnik.kz سايتىنا سىلتەمە جاساپ.

بەدەلدى امەريكالىق Foreign Policy جۋرنالى استاناداعى حالىقارالىق كورمەدەن كولەمدى ماقالا جازعان، الايدا ءجۋرناليستىڭ كورمە تۋرالى مالىمەتتەرى جۇقالاپ ايتقاندا، ادىلەتسىزدەۋ.  

"پاۆيلونعا جالعىز كەلۋشى"

"قازاقستان حالىقارالىق كورمە وتكىزىپ، ەلدىڭ ابىرويىن كوتەرۋ ءۇشىن فۋتۋريستىك قالا سوقتى، ءبىراق ءبىر كىشىگىرىم پروبلەما بار: استانا قوناق شاقىرۋدى ۇمىتىپ كەتكەن"، — دەپ باستايدى ءوز رەپورتاجىن جۋرناليست دجەيمس پالمەر. 

"گرەسيا پاۆيلونىندا مەن جالعىز كەلۋشى بولدىم. كوپشىلىك پاۆيلونداردا پەرسونالدان بوتەن ەشكىم بولمادى. تەك جۇڭگو، گەرمانيا، اقش سەكىلدى ءىرى ەلدەردىڭ پاۆيلوندارىندا ونداعان ادامدار بولدى. الايدا كوپشىلىك ەلدەردىڭ پاۆيلوندارىنىڭ سىرتىنان مەن بوس قورشاۋلار ارقىلى ءوتتىم. كورمەدەگى ءۇش ادامنىڭ ەكەۋى بەيدجيك تاققان"، — دەيدى جۋرناليست. 

ءوز رەپورتاجىندا ول، استانانىڭ پوستكەڭەستىك  كەڭىستىكتە ەكسپو-نى قابىلداپ جاتقان تۇڭعىش مەملەكەت ەكەنىن اتاپ وتكەن. بۇل رەتتە، استاناداعى ەكسپو-نىڭ كىشى كورمە مارتەبەسىنە يە ەكەنىن بارشاعا بەلگىلى ەكەنىنە قاراماستان، جۋرناليست نەگە ەكەنى بەلگىسىز شانحايدا وتكەن ەكسپو-2010-مەن سالىستىرادى. 

"مەن 2010 جىلى شانحايداعى ەكسپو-دا بولعان كەزىمدە، كوشەدەن ءوتىپ بولمايتىن، كورمەگە 73 ميلليون ادام كەلدى. رەسمي مالىمەتتەر بويىنشا استانا 670 مىڭ بيلەت ساتقان، الايدا بۇل سيفردىڭ شىنايىلىعىنا قاتىستى سالماقتى كۇمان بار"، — دەپ جازادى جۋرناليست. 

قازاقستاندىقتىڭ ىزاسىن قالاي كەلتىرۋگە بولادى؟

"قازاقستاندىقتاردىڭ ىزاسىن كەلتىرۋدىڭ ەكى ءتاسىلى بار. بوراتتى ەسكە سالۋ، نەمەسە "نۇر الەم" پاۆيلونىن ءولىم جۇلدىزى دەپ اتاۋ"، — دەيدى پالمەر. 

ول ەكسپو-عا كەلەتىن تۋريستەردىڭ سانى بويىنشا تۋرا جاسالماعان بولجامدار ءۇشىن قازاقستاندىق بيلىكتى سىنايدى. 

"جىل سايىن قازاقستاندىق ۇيىمداستىرۋشىلار ءۇش ايلىق ءىس-شارانىڭ بولجامدى كەلۋشىلەر سانىن تومەندەتىپ وتىردى — 5 ميلليون، 3 ميلليون، ەندى 2 ميلليون. اشىلۋ سالتاناتىندا، رەسمي دەرەكتەرگە سايكەس، 10 مىڭ كەلۋشى بولعان، ءبىراق ول تىم اسىرا باعالاۋ. كەلەسى كۇنى ادامدار ودان دا از بولدى"، — دەپ جازادى پالمەر.

ول قازاقستاننىڭ  شەتەلدەن كەلۋشىلەردى تارتۋعا تىرىسپاعانىن العا تارتادى. 

"رەسەيدەن ازعانا ادام" كەلگەن، ال وزگە كورشى ەلدەردەن ەشكىم دەرلىك كەلمەدى، دەپ مالىمدەيدى ءتىلشى. 

"ايدالاداعى استانا"

پالمەردىڭ پىكىرىنشە، الەمدە قازاقستاننىڭ قايدا ورنالاسقانىن جانە قازاقستاندىقتاردىڭ قانداي ادام ەكەنىن جاقسى بىلمەيدى ەكەن. ال كورمەنىڭ ءوزىن ول قىزىقسىز دەپ اتادى. 

"ەكسپو ۇيىمداستىرۋشىلارى استاناعا وتكىزۋ قۇقىعىن بەرگەندە نە ويلاعان؟ نەلىكتەن بۇل تۇكپىردەگى استانا وعان ۇمتىلۋدى ۇيعارعان؟ "، — دەگەن ىزالىعىن بىلدىرەدى باتىستىق جۋرناليست. 

قازاقستاندىقتاردىڭ ۇلتتىق ابىرويى ءۇشىن الەمگە ءوزىن تانتۋ اسا ماڭىزدى، دەگەن سىڭاي تانىتتى پالمەر.

"استانانىڭ باسىم بولىگى وتە كورىكتى. ءبىراق ول دا جارتىلاي بوس جانە قوناق ۇيلەرى دە اسا قىمبات"، — دەيدى ول.