الماتىدا جول-كولىك وقيعاسىنان ەكى اياعىنان ايىرىلعان ەكاتەرينا پارافييەۆاعا قاجەتتى كومەك كورسەتىلىپ جاتىر، - دەپ حابارلايدى قامشى اقپاراتتىق اگەنتتىگى kaz.tengrinews.kz-كە سىلتەمە جاساي وتىرىپ. 

قىز بەن ونىڭ قۇربىسى 16 ماۋسىمدا ءال-فارابي داڭعىلىندا بولعان جول اپاتىنان زارداپ شەككەن بولاتىن. قالالىق دەنساۋلىق ساقتاۋ باسقارماسىنداعىلاردىڭ ايتۋىنشا، قىزدار ەكى بولەك اۋرۋحاناعا جەتكىزىلگەن. قازىرگى ۋاقىتتا پارافييەۆا ورتالىق قالالىق كلينيكالىق اۋرۋحاناسىندا جاتىر. شۇعىل وتا جاسالعاننان كەيىن ونىڭ جاعدايى اسا اۋىر دەپ باعالانىپ وتىر.

دارىگەرلەر قازىرگى ۋاقىتتا ينتەنسيۆ تەراپيا جاسالىپ جاتقانىن ايتادى. بارلىق سالا بويىنشا مامان كونسيليۋمعا قاتىسىپ جاتىر. دارىگەرلەردىڭ ايتۋىنشا، ەكاتەرينانىڭ جاعدايى بىرتە-بىرتە جاقسارادى. 

ناۋقاستارعا كەپىلدەندىرىلگەن تەگىن مەديسينالىق كومەك اياسىندا قاجەتتى مەديسينالىق كومەك كورسەتىلىپ جاتقانىن نازارلارىڭىزعا الۋىڭىزدى سۇرايمىز. دەنساۋلىق ساقتاۋ جۇيەسىندەگى جەتەكشى ماماندار جۇمىلعان. ولار بارلىق قاجەت بولعان پرەپاراتتارمەن قامتاماسىز ەتىلگەن. ناۋقاستاردىڭ جاعدايى تۇزەلەدى دەگەن ءۇمىتىمىز بار، ودان كەيىن رەابيليتاسيا جۇرگىزىلەدى"، - دەدى باسقارماداعىلار.

ەسكە سالا كەتەيىك، كەشە الماتىدا بولعان جول اپاتىنان قىزدىڭ ەكى اياعى جۇلىنىپ كەتكەنى حابارلانعان بولاتىن. جول-كولىك وقيعاسى ءال-فارابي داڭعىلىندا تۇڭعىش پرەزيدەنت ساياباعىنىڭ ماڭىندا بولعان. جول اپاتىنا تۇسكەن كولىكتىڭ بارلىعى باتىس باعىتتا كەتىپ بارا جاتقان. 

كەيىنىرەك اياعى جۇلىنىپ كەتكەن قىزعا شۇعىل وتا جاسالىپ جاتقانى حابارلانعان ەدى.

شولۋشى: اسەل وتەشوۆا