بۇگىن قازاقستان بويىنشا ۇلتتىق ءبىرىڭعاي تەستىلەۋ باستالدى. 20 ماۋسىم مەن 1 شىلدە ارالىعىندا وتەتىن ۇبت-دا 92 827 تۇلەك سىنعا تۇسەدى، دەپ جازادى قامشى اقپاراتتىق اگەنتتىگى.

ۇبت 5 ءپان بويىنشا تاپسىرىلادى: قازاقستان تاريحى، ماتەماتيكالىق ساۋاتتىلىق، وقۋ ساۋاتتىلىعى (20 تاپسىرمادان، شەكتى دەڭگەيى – ءار پاننەن كەمىندە 5 باللدان) جانە تاڭدالعان ماماندىققا سايكەس 2 بەيىندى پاننەن (30 تاپسىرمادان، شەكتى دەڭگەيى 15 باللدان كەم بولماۋى ءتيىس). 120 تەستتىك تاپسىرما بويىنشا تۇلەك ماكسيمالدى 140 بالل الۋى مۇمكىن. تاپسىرمالاردى ورىنداۋعا 3 ساعات 50 مينۋت ۋاقىت بولىنەدى. 

ۇلتتىق تەستىلەۋ ورتالىعىنىڭ مالىمەتىنشە، بيىل ۇبت-عا قاتىسۋعا 92 827 تۇلەك نيەت ءبىلدىرىپ، ارىز جازعان. ولار بيىلعى مەكتەپ بىتىرۋشىلەردىڭ جالپى سانىنىڭ (131 377) 71% قۇراپ وتىر. ۇبت تاپسىرۋعا نيەتتى 69 209 تۇلەك قازاق تىلىندە، ال 23 618 – ورىس تىلىندە تاپسىرادى. ۇبت 165 تاپسىرۋ پۋنكتىنىڭ 1431 اۋديتورياسىندا وتكىزىلەدى.  بۇل اۋديتوريالار بايلانىس سيگنالدارىن بوگەيتىن قۇرىلعىلارمەن، مەتالل دەتەكتورلارىمەن، ۇبت بارىسىن باقىلاۋ جانە جازۋ بەينەكامەرالارىمەن، سونداي-اق ينتەرنەت ارقىلى ونلاين تاراتۋ كامەرالارىمەن جابدىقتالعان.

اتا-انالارعا ىڭعايلى جاعداي قامتاماسىز ەتۋ ماقساتىندا 108 پۋنكتتەگى ۇبت بارىسى مونيتورعا شىعارىلىپ، كورسەتىلەدى. ادەتتەگىدەي، ۇبت وتكىزۋ ورىندارىندا مەديسينالىق قىزمەت پەن قۇقىق قورعاۋ ورگاندارىنىڭ وكىلدەرى  جۇمىس ىستەپ، اۋىز سۋ جانە تاعام ونىمدەرىن ساتۋ ورىندارى قىزمەت كورسەتەدى.