استانا پروسەسى قاتىسۋشىلارىنا ەلباسى نۇرسۇلتان نازاربايەۆ ۇندەۋ جولدادى. جالپى كەلىسسوزدەر جابىق ءوتتى. كەزدەسۋ بارىسىنان ەلورداعا ارنايى كەلگەن 25 ەلدىڭ 400-گە جۋىق ءتىلشىسى تىكەلەي حابار تاراتتى. بۇل تۋرالى  قامشى  اقپاراتتىق اگەنتتىگى  حابار ارناسىنىڭ مالىمەتىنە سۇيەنىپ حابارلايدى.
رەسمي داماسك پەن قارۋلى وپپوزيسيا سەركەلەرى بۇگىن ءبىرىنشى رەت كەلىسسوز الاڭىندا باس قوستى.  رەسەي، يران، تۇركيا، اقش، بۇۇ-نىڭ وكىلدەرى دە سولارمەن دوڭگەلەك ۇستەلدىڭ باسىندا جينالىپ، سيريانىڭ تاعدىرىنا قاتىستى كۇرمەۋى شەشىلمەگەن ماسەلەلەردى قاۋزادى. 
رومان ۆاسيلەنكو، ق ر سىرتقى ىستەر ءمينيسترىنىڭ ورىنباسارى: -بۇل كەزدەسۋ 8 اقپاندا جەنيەۆادا وتەتىن جيىننىڭ الدىنداعى دايىندىق ىسپەپتى شارا. ءبىراق استانا پروسەسى جەنيەۆا كەلىسسوزدەرىنىڭ بالاماسى ەمەس. كەرىسىنشە، ونى تولىقتىرىپ، لايىقتى ۇلەس قوسادى دەۋگە بولادى.   
ەكى كۇن وتەتىن باسقوسۋعا قازاقستان بيلىگى قاتىسپايدى. ءبىزدىڭ ەل تەك اشىق پىكىر الاڭىن ۇسىنىپ وتىر.  بۇل رەتتە قازاقستان تاراپتارعا تەڭ جاعداي جاساعانىن اتاپ ءوتۋ كەرەك. ونى مىنادان-اق اڭعارۋعا بولادى.  تانىستىرۋ پاراقشالارىنا ەكى جاقتىڭ اتىن اتاپ، ءتۇسىن تۇستەمەي، تەك سيريا اراب رەسپۋبليكاسى دەپ جازعان. 
ەلباسى تاراپتارعا ۇندەۋ جولدادى. ونى قىزمەتىنە جۋىردا عانا كىرىسكەن ەلىمىزدىڭ سىرتقى ىستەر ءمينيسترى قايرات ءابدىراحمانوۆ وقىدى.
 قايرات ءابدىراحمانوۆ، ق ر سىرتقى ىستەر ءمينيسترى: -شامامەن 6 جىل بويى جالعاسىپ جاتقان قانتوگىس ءتۇرلى وركەنيەت پەن مادەنيەت توعىسقان ولكەگە قايعى-قاسىرەتتەن باسقا ەشتەڭە اكەلمەدى. بەيبىتشىلىكتى ناسيحاتتايتىن قازاق ەلى بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە تاياۋ شىعىس وڭىرىندەگى قاۋىپسىزدىك پەن تۇراقتىلىقتىڭ ورناپ، بەكي تۇسۋىنە مۇددەلىلىك تانىتادى، - قازاقستان رەسپۋبليكاسىنىڭ پرەزيدەنتى ن.نازاربايەۆ.
الايدا 6 جىلعا سوزىلعان سيريا قاقتىعىسىنىڭ جايى استانادا ءبىر كۇندە شەشىلە قويماسى انىق. كەلىسسوزدىڭ قيىن بولاتىنىن شەتەلدىك جۋرناليستەر دە ايتىپ وتىر.
اندرەي افاناسيەۆ، شەتەلدىك جۋرناليست : -بۇل جيىنعا وپپوزيسيالىق توپ وكىلدەرىنىڭ قاتىسقانى قىزىعۋشىلىقتى ارتتىرىپ وتىر. سەبەبى سيريا وپپوزيسياسى دەگەن تۇسىنىك بىركەلكى ەمەس. ونداعان ساياسي كۇشتىڭ ءارقايسىسى ءوزىن «سيريالىق وپپوزيسيا» دەپ اتايدى. مەن گەوساياسي باعدارلامانىڭ اۆتورى رەتىندە دەلەگاتتاردىڭ پىكىرىن بىلگىم كەلەدى.  
 استانا پروسەسىن بۇكىل الەم باقىلادى. تىلشىلەر ناتيجەسىن كۇتىپ، سوڭعى مالىمدەمەلەر «قازمەديا ورتالىعىنان» تىكەلەي ەفيردە تاراتىلدى. 
ۇستەل باسىندا كىم، قالاي جانە كىمگە قارسى وتىرعاندىعىن دا قالت جىبەرمەدى. كوپتەن كۇتكەن ديالوگقا باقىلاۋشى رەتىندە قاتىسقان اقش ەلشىسى بۇۇ-نىڭ وكىلى مەن سيريالىق وپپوزيسيانىڭ ءدال ورتاسىندا وتىرعانىن دا جارىسا جازدى. استانا پروسەسىنەن حابار تاراتۋعا كەلگەن سيريالىق ءتىلشى اللا يبراگيم سونداعى قايعى جايلى وي ءبولىستى. 
اللا يبراگيم،  ءتىلشى /سيريا/: -6 جىلعا سوزىلعان سوعىس حالىقتى ابدەن شارشاتتى. مىسالى داماسكىدە 22 كۇن اۋىزسۋ بولعان جوق. وقتىن-وقتىن جارىق ءوشىپ تۇرادى. حالىق بەيبىت كۇندى اڭسايدى. اتىلعان وقتىڭ داۋىسىنان ابدەن جالىقتى. سوندىقتان ءبىز وسى  كەلىسسوزدەرگە ۇلكەن ءۇمىت ارتىپ وتىرمىز.
زاينۇر بايجىگىت، ءتىلشى : -سيرياداعى جاعداي بۇگىندە الەمدىك قاۋىمداستىقتىڭ باس قاتىرعان باستى ماسەلەسىنە اينالعان. سەبەبى ونىڭ كەرى اسەرىن سيريالىقتار عانا ەمەس، جاھان جۇرتى دا سەزىپ وتىر. تەرروريزم تارالىپ، زاڭسىز ميگراسيا بەلەڭ الدى. سوندىقتان قازاقستان عانا ەمەس، بۇكىل الەم سيريا ماسەلەسىن بەيبىت شەشۋگە مۇددەلى. سول سەبەپتى استانا پروسەسىنىڭ ماڭىزى      وتە     جوعارى. 
شولۋشى: اقەركە مارات قىزى