ءدىن جانە ازاماتتىق قوعام مينيسترلىگى ءدىني ماتەريالداردى تاراتۋ ارنالارىنا مونيتورينگ جۇرگىزىپ، بيىلعى جىلى 6000-نان اسا سايت تەكسەرىلگەن، دەپ جازادى قامشى اقپاراتتىق اگەنتتىگى.

ءدىن ىستەرى جانە ازاماتتىق قوعام مينيسترلىگىنىڭ ۇيلەستىرۋىمەن ەكسترەميزم مەن تەرروريزمنىڭ الدىن الۋ ماقساتىندا ۆەدومستۆوارالىق كوميسسيا جۇيەلى جۇمىستار جۇرگىزۋدە. وسىنىڭ ارقاسىندا عيبادات ورىندارىنىڭ ماڭايىندا قاۋىپسىزدىك كۇشەيتىلگەن. ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ حالىققا ەسەپ بەرۋ كەزدەسۋىندە ۆەدومستۆوارالىق ءىس-قيمىلدىڭ ماڭىزدى ناتيجەلەرى تۋرالى باياندادى. بۇل جونىندە abctv.kz حابارلايدى.

«ۆەدومستۆوارالىق ءىس-قيمىل ناتيجەسىندە مەشىتتەردە ءتارتىپ بۇزۋ ۇلەسى تومەندەدى. سونداي-اق، ءدىني ماتەريالداردى تاراتۋ ارنالارىنا تۇراقتى مونيتورينگ جۇرگىزىلۋ جولعا قويىلدى. ءبىزدىڭ مينيسترلىك 2016 جىلدىڭ وزىندە 10 750 سايتتى زەردەلەدى. ونىڭ ىشىندە 1500-گە جۋىق سايتتان زاڭسىز كونتەنت انىقتالىپ، زاڭ تارتىبىمەن جابىلدى. بيىلعى مونيتورينگتە 6 مىڭنان اسا سايت تەكسەرىلىپ، 900- زاڭسىز كونتەنت تاراتىپ كەلگەنى بەلگىلى بولدى»، – دەدى مينيستر.

مينيستر، سونداي-اق، الەۋمەتتىك جەلىلەرگە، كىتاپ، باسپا ونىمدەرىنە تۇراقتى ساراپتاما جۇرگىزىلەتىنىن جەتكىزدى. 2017 جىلى 1،5 مىڭنان اسا وبەكت ساراپتامادان ءوتىپ، ونىڭ ىشىندە 54 ماتەريالدا قۇقىققا قايشى كونتەنت كەزىككەن. سونىمەن قاتار، قىلمىستىق اتقارۋ جۇيەسى كوميتەتىنىڭ بارلىق كىتاپحانا قورىنا ساراپتاما جۇرگىزىلگەن. ناتيجەسىندە 13 كىتاپ دەسترۋكتيۆتى مازمۇندا دەپ تانىلعان.