ەندى قازاقستان اۋماعىندا تاۋاردىڭ قۇنىن ۇلتتىق ۆاليۋتامەن كورسەتپەگەن جارناماعا اكىمشىلىك ايىپ تاعىلاتىن بولادى. بۇل تۋرالى قامشى اقپاراتتىق اگەنتتىگى حابار ارناسىنىڭ مالىمەتىنە سۇيەنىپ حابارلايدى.

بۇگىن بۇل جايلى ۇلتتىق ەكونوميكا ءمينيسترى تيمۋر سۇلەيمەنوۆ مالىمدەدى. جارناما ماسەلەلەرى بويىنشا كەي زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى زاڭ جوباسىن دەپۋتاتتار بۇگىن ءبىرىنشى وقىلىمدا تالقىلادى. ول بويىنشا ەندى ءجونسىز، ادەپسىز جارنامالارعا جول بەرگەندەر جازالانادى. سونداي-اق ۇلتتىق ازا تۇتۋ كۇنى جارناما بەرگەن تەلە- جانە راديو ارنالار دا اكىمشىلىك جاۋاپكەرشىلىككە تارتىلادى. «بىزدە قوعامعا وي سالاتىن الەۋمەتتىك جارنامالار از»، – دەيدى مينيستر. ولاردىڭ سانىن ارتتىرۋ مىندەتى تۇر، ەندى مۇنداي الەۋمەتتىك جارنامالار 15 تەلە- جانە راديو ارناعا اقىسىز ورنالاستىرىلاتىن بولادى.

ساكەن قانىبەكوۆ، ق ر پارلامەنتى ءماجىلىسىنىڭ دەپۋتاتى: – بىرىنشىدەن، جارنامالىق كونسترۋكسيالاردى ورنالاستىرۋدىڭ قولدانىستاعى پراكتيكاسى قالاي وزگەرەدى؟ ەكىنشى سۇراعىم – ولاردى ورناتۋ قالاي رەگلامەنتتەلەتىن بولادى؟ تيمۋر سۇلەيمەنوۆ، ق ر ۇلتتىق ەكونوميكا ءمينيسترى: – قازىرگى قولدانىستاعى زاڭدا بۇل ەكى ۇعىمنىڭ ارا-جىگى اشىلماعان. بار پروبلەما سودان تۋىنداپ وتىر. جارناما كونسترۋكسيالارىن ورنالاستىرۋ جەر، ساۋلەت، قۇرىلىس جونىندەگى زاڭنامادا انىقتالسا، جارنامانىڭ مازمۇندىق جاعى جارناما تۋرالى زاڭمەن رەتتەلەدى. ەندى سىرتقى جارنامانىڭ مازمۇنى، ولشەمى ارنايى تيپتىك ەرەجەگە باعىناتىن بولادى. ونى ءبىز وسى قۇجاتتا انىقتاپ كورسەتەمىز.

شولۋشى: ايگەرىم تاۋباي