قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا قازاقستان مەن اقش-تىڭ ءوزارا ءىس-قيمىلىنىڭ 25 جىلدىعىنا ارنالعان «قازاقستان – اقش» اتتى كونفەرەنسياعا قاتىستى. بۇل تۋرالى قامشى اقپاراتتىق اگەنتتىگى اقوردانىڭ باسپا ءسوز قىزمەتىنە سىلتەمە جاساپ حابارلايدى.

كونفەرەنسياعا اقش-تىڭ قازاقستان رەسپۋبليكاسىنداعى ەلشىسى د.كرول، پرەزيدەنت اكىمشىلىگى قۇرىلىمدىق بولىمدەرىنىڭ، مەملەكەتتىك ورگانداردىڭ باسشىلارى، ديپلوماتيالىق قىزمەت ارداگەرلەرى، حالىقارالىق ۇيىمدار مەن شەتەلدىك ديپلوماتيالىق كورپۋستىڭ، قوعامدىق ۇيىمداردىڭ، عىلىمي-زەرتتەۋ مەكەمەلەرى مەن وقۋ ورىندارىنىڭ وكىلدەرى قاتىستى.

مەملەكەتتىك حاتشى باسقوسۋعا قاتىسۋشىلارعا ارناعان سوزىندە قازاقستان پرەزيدەنتىنىڭ سىندارلى سىرتقى ساياساتى مەملەكەتتىگىمىزدىڭ نىعايۋىنا، ەكونوميكالىق الەۋەتىمىزدى ارتتىرۋعا، ەلىمىز ءۇشىن الداعى ونداعان جىلدارعا مەجەلەنگەن قاۋىپسىزدىكتىڭ جۇيەلى قۇرىلىمى مەن كەپىلدىگىن قالىپتاستىرۋعا قولايلى جاعداي جاساعانىن ايتتى.

گۇلشارا ءابدىقالىقوۆا وتكەن شيرەك عاسىر ىشىندە ءبىزدىڭ ىنتىماقتاستىعىمىز ءوزارا سەنىمگە، قولداۋعا جانە ۇلتتىق مۇددەلەرگە قۇرمەتپەن قاراۋعا نەگىزدەلگەن كەمەل ستراتەگيالىق سەرىكتەستىك سيپاتىنداعى قارىم-قاتىناس دەڭگەيىنە جەتكەنىن اتاپ ءوتتى.

مەملەكەتتىك حاتشى قازاقستان مەن اقش-تىڭ بىرلەسە وتىرىپ، حالىقارالىق بەيبىتشىلىك پەن جاھاندىق قاۋىپسىزدىكتى نىعايتۋ ىسىنە زور ۇلەس قوسقانىنا توقتالدى. «بولاشاقتىڭ ەنەرگياسى» اتتى ەكسپو-2017 كورمەسى – جاھاندىق تۇيتكىلدەردى شەشۋ جولىنداعى جاراسىمدى ىنتىماقتاستىق رۋحىنىڭ جارقىن كورىنىسى. وعان جاھاندىق ورنىقتى دامۋ ءۇشىن جاڭا تەحنولوگيالاردى دامىتۋعا بىرلەسە ۇمتىلعان الەمنىڭ 115 ەلى قاتىسۋدا.

كونفەرەنسيا اياسىندا حالىقارالىق قاۋىپسىزدىك، بەيبىتشىلىكتى ساقتاۋ، ساۋدا-ەكونوميكالىق جانە مادەني-گۋمانيتارلىق ىنتىماقتاستىق سالالارىنداعى قازاقستان مەن اقش-تىڭ ءوزارا ءىس-قيمىلىنا ارنالعان ءۇش پانەلدى وتىرىس بولىپ ءوتتى.

شولۋشى: ايگەرىم تاۋباي