م.شاحانوۆ ءوز اتىنان جالعان پاراقشا اشقان ازاماتتاردى سوتقا بەرمەك. بۇل تۋرالى قامشى اقپاراتتىق اگەنتتىگى  ماتريسا اقپاراتتىق سايتىنىڭ مالىمەتىنە سۇيەنە وتىرىپ حابارلايدى.

بەلگىلى قوعام قايراتكەرى ەشقانداي الەۋمەتتىك جەلىلەرگە تىركەلمەگەنىن ءجيى ايتاتىن. الايدا، اقىننىڭ ايتۋىنا قاراعاندا ونىڭ اتىن جامىلىپ العان جالعان پاراقشالاردىڭ سانى بۇگىندە 56-عا جەتىپتى.

"كەيىنگى كەزدەرى عالامتورداعى الەۋمەتتىك جەلىلەردە مەنىڭ اتىمنان پاراقشا اشىپ الۋشىلار تىم كوبەيىپ كەتىپتى. ماعان تىلەكتەس، نيەتتەس ادامدار ساناعان ەكەن، ولاردىڭ جالپى سانى 56-عا جەتىپتى. ءتىپتى بيلىك باسىندا جۇرگەن كەيبىرەۋلەردىڭ شەتەلدەردە قانشا ءۇيى بار ەكەنىن دە مەنىڭ اتىمنان جىبەرىپتى. ءسوزدىڭ اشىعىنا كەلسەك، مەنىڭ ءبىر دە ءبىر پاراقشام جوق. عالامتور ارقىلى بىرەۋگە ءبىر اۋىز ءسوز جازىپ كورگەن ادام ەمەسپىن. عالامتوردى مەڭگەرۋگە ەندى عانا كىرىسكەلى وتىرمىن" دەدى اقىن مۇحتار شاحانوۆ. 

سونداي-اق اقىن ەسىمى مەن بەدەلىن پايدالانىپ، جالعان پاراقشا اشقان الاياقتاردىڭ وسىنداي ءجونسىز  ارەكەتىن توقتاتپاسا سوتقا شاعىمداناتىنىن مالىمدەدى. 

شولۋشى: اقەركە مارات قىزى