بۇگىن، 23 ماۋسىمدا ەلورداداعى تاۋەلسىزدىك سارايىندا قازاقستان پرەزيدەنتى نۇرسۇلتان نازاربايەۆتىڭ توراعالىعىمەن دۇنيەجۇزى قازاقتارىنىڭ V قۇرىلتايى ءوز جۇمىسىن باستادى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

قۇرىلتايعا بارلىعى 750 دەلەگات پەن قوناق قاتىستى. ونىڭ 350ء-ى الەمنىڭ 39 ەلىنەن كەلگەن. ولار - عىلىمي-شىعارماشىلىق جانە پەداگوگيكالىق زيالىلار وكىلدەرى، بيزنەس، سپورت، بۇقارالىق اقپارات قۇرالدارى سالالارىنىڭ ماماندارى، مەملەكەتتىك جانە قوعامدىق ۇيىمداردىڭ قىزمەتكەرلەرى.

 قۇرىلتاي دەلەگاتتارى مەن قوناقتارىنىڭ 80 پايىزى مۇنداي ءىس-شاراعا العاش رەت قاتىسىپ وتىر. قۇرىلتاي اياسىندا ۇلتتىق اكادەميالىق كىتاپحانادا بەلگىلى ءدىنتانۋشى-عالىمنىڭ 100 جىلدىعىنا ارنالعان «حاليفا التاي جانە تاريحتىڭ ورالۋى» اتتى حالىقارالىق عىلىمي-تاجىريبەلىك كونفەرەنسيا وتەدى. ءدىن ىستەرى جانە ازاماتتىق  قوعام، ءبىلىم جانە عىلىم، اقپارات جانە كوممۋنيكاسيالار، مادەنيەت جانە سپورت، دەنساۋلىق ساقتاۋ مينيسترلىكتەرى  قۇرىلتايدىڭ شەتەلدىك قوناقتارىمەن «دوڭگەلەك ۇستەل» وتىرىسىن ۇيىمداستىرۋدى جوسپارلاۋدا. مۇنان بولەك، قۇرىلتاي دەلەگاتتارى مەن قوناقتارى «ەكسپو-2017» حالىقارالىق كورمەسىمەن تانىسىپ، ەتنواۋىلدى ارالايدى جانە «استانا وپەرا» تەاترىندا ۇلتتىق مۋزىكامىزدىڭ التىن قورىنا ەنگەن ەۆگەنيي برۋسيلوۆسكييدىڭ «قىز جىبەك» وپەراسىن تاماشالايتىن بولادى. دۇنيەجۇزى قازاقتارى قۇرىلتايىنىڭ باسپا ءسوز ورتالىعىندا 150 وتاندىق جانە شەتەلدىك ب ا ق وكىلدەرى اقپارات تاراتۋدا.

ايتا كەتەيىك، 1992 جىلدان بەرى وتكىزىلىپ كەلە جاتقان قۇرىلتاي دۇنيەجۇزىنىڭ تۇكپىر-تۇكپىرىندە تۇراتىن ەتنيكالىق قازاقتاردىڭ كەزدەسۋ ورنى ءارى بىرەگەي سۇحبات الاڭى بولىپ تابىلادى.