شەتتەگى جانە ەلگە كوشىپ كەلگەن اعايىنداردى قولداۋ ءۇشىن «وتانداستار» قورى قۇرىلادى. بۇل تۋرالى بۇگىن ەلورداداعى تاۋەلسىزدىك سارايىندا ءوتىپ جاتقان دۇنيەجۇزى قازاقتارىنىڭ V قۇرىلتايىندا قازاقستان پرەزيدەنتى نۇرسۇلتان نازاربايەۆ ايتتى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

«قانداستارعا مەملەكەت پەن قوعام تاراپىنان جان-جاقتى قولداۋ، كومەك جاساۋ ءۇشىن مىناداي جۇمىستاردى قولعا الايىق.  بىرىنشىدەن، شەتتەگى جانە ەلگە كوشىپ كەلگەن اعايىنداردى قولداۋ ءۇشىن «وتانداستار» دەگەن قور قۇرامىز. ارينە، مەن ونى ۇكىمەتكە تاپسىراتىن بولامىن. وزدەرىڭىز بىلەسىزدەر، 25 جىلدىڭ ىشىندە ەكونوميكانىڭ وركەندەپ وسۋىنە بايلانىستى، جۇرگىزىلىپ وتىرعان ساياساتقا بايلانىستى ءبىزدىڭ كوپ ازاماتتارىمىز بەلگىلى، باي ادامدار بولدى، جۇمىس ىستەپ جاتىر. ەندى ءبىز باي ەل جاسايمىز دەپ ۇمتىلىپ جاتىرمىز»، - دەدى ەلباسى.

قازاقستان پرەزيدەنتى ەلىمىزدە قالتالى ازاماتتار كوپ بولسا، وندا ولار ەلدى جۇمىسپەن قامتاماسىز ەتەتىندىگىن اتاپ ءوتتى.

"سوندىقتان مەن بۇگىن سولاردىڭ بارلىعىنا، قازاقستاندا تۇراتىن قازاقتارعا ۇندەۋ تاستايمىن. ءبىز سولتۇستىك كاۆكازدان كەلگەن بالقارلاردى، شەشەندەردى، بارلىعىن ۇيىمىزگە اكەپ تىعىپ تاستاعاندا، قۇشاعىمىزدى جايدىق قوي. ال ەندى ءوزىمىزدىڭ قازاقتارعا نەگە سولاي جاسامايمىز. قانى قازاق سول بيزنەسمەندەرگە وسى قورعا  ءارقايسىسى ءوز ۇلەسىن قوسۋعا شاقىرامىن. ونى ۇيىمداستىرۋدى قۇرىلتاي باسشىلىعىنا، پرەزيدەنت اپپاراتىنا، ۇكىمەتكە تاپسىرامىن"، - دەدى ن.نازاربايەۆ.

شولۋشى: گۇلىم جاقان